ބުދަ ދުވަހާއި ބުރާސްފަތި ދުވަހަކީ ރަސްމީކޮށް ސަރުކާރު ބަންދު ދުވަހެއް ނަމަވެސް 18 އަހަރުން މަތީގެ އެންމެނަށް އައިޑީ ކާޑު ދޫކުރުމުގެ ހިދުމަތް ދޭނެ ކަމަށް ޑިޕާޓްމަންޓް އޮފް ނެޝަނަލް ރަޖިސްޓްރޭޝަނުން މިއަދު ބުނެފި އެވެ.
ޑީއެންއާރުން މިރޭ ކުރި އިއުލާނެއްގައި ބުނީ ކުރިއަށް އޮތް ސަރުކާރު ބަންދު ދެ ދުވަހުގައި ވެސް 18 އަހަރުން މަތީގެ މީހުންނަށް އައިޑީ ކާޑު ދޫކުރަނީ ހޮނިހިރު ދުވަހު ރިޔާސީ އިންތިހާބު ބާއްވާތީ، ވޯޓުލުމުގެ ފުރުސަތު ތަނަވަސްކޮށްދިނުމަށް ކަމަށެވެ.
އެ ޑިޕާޓްމަންޓުން ބުނީ ބުދަ ދުވަހާއި ބުރާސްފަތި ދުވަހު ހެނދުނު 10:00 އިން ފެށިގެން ހަވީރު 4:00 ޖަހަންދެން އައިޑީ ކާޑު ދޫކުރުމުގެ ހިދުމަތް އެ އޮފީހުން ކުރާނެ ކަމަށެވެ.
ބުދަ ދުވަސް ސަރުކާރު ބަންދުކޮށްފައި ވަނީ ކީރިތި ރަސޫލާގެ އީދުމީލާދީއާ ފާހަގަ ކުރުމުގެ ގޮތުންނެވެ. ބުރާސްފަތި ދުވަސް ބަންދު ކުރީ އީދުމީލާދީއާ ގުޅުވައިގެނެވެ.
އަންނަ ހޮނިހިރު ދުވަހު ބާއްވަނީ ރިޔާސީ އިންތިހާބުގެ ދެ ވަނަ ބުރެވެ. އިންތިހާބުގެ ފުރަތަމަ ބުރު ބާއްވާފައި ވަނީ ސެޕްޓެމްބަރު 9، ގަ އެވެ.
