ރިޔާސީ އިންތިހާބުގައި ވާދަކުރައްވާ ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުގެ ގެ, މ. ދިމްޔާތަށް މަސްތުވާތަކެތި ވައްދައި ފުލުހުން ރެއިޑް ޖަހަން އުޅޭ ކަމަށް ބުނެ ފަތުރަމުންދާ ހަބަރުތައް އެ އިދާރާއިން ދޮގުކޮށްފި އެވެ.
މިއަދު ނެރުނު ބަޔާނެއްގައި ފުލުހުން ވަނީ "ޗެނަލް 13" އިން އެފަދަ މޭރުމަކުން ހަބަރު ގެނެސްދީފައިވާ ކަމަށް ބުނެފަ އެވެ. އޭގެ އިތުރުން, ބައެއް ފަރާތްތަކުން ވެސް ވަނީ އެފަދަ މެސެޖުތަކެއް ސޯޝަލް މީޑިއާގައި ދައުރުކޮށްފަ އެވެ.
"ޗެނަލް 13 ގެ އެ ހަބަރަކީ އެއްވެސް ހަގީގަތެއް އެކުލެވިފައިނުވާ, ސިޔާސީ މަގްސަދެއް ހާސިލުކުރުމަށްޓަކައި ދިވެހި ފުލުހުންގެ ހިދުމަތުގެ އަގު ވައްޓާލުމުގެ ގޮތުން ގެނެސްފައިވާ ކަނޑައެޅިގެން ދޮގު ހަބަރެކެވެ," ފުލުހުންގެ ބަޔާނުގައި ބުނެފައިވެ އެވެ.
އެ އިދާރާއިން ވަނީ މައުލޫމާތުގެ ސައްހަކަން ކަށަވަރު ކުރުމަށް އެއްވެސް މަސައްކަތެއް ނުކޮށް ހަގީގަތާ ހިލާފު ދޮގު މައުލޫމާތު ފެތުރުން ކުށްވެރިކޮށްފަ އެވެ.
