ރިޔާސީ އިންތިހާބުގެ ދެވަނަ ބުރުގައި އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހަށް ތާއީދު ކުރަން ނިންމީ، އެމަނިކުފާނަކީ އެއްބައިވަންތަ އަދި ދެ ފިކުރު އެއްކުރައްވަން ދަންނަ ބޭފުޅަކަށް ވާތީ ކަމުގައި ކުރީގެ ހެލްތް މިނިސްޓަރު އަދި ޖުމުހުރީ ޕާޓީގެ ސްޕެޝަލް އެޑްވައިޒަރު އަބްދުﷲ އަމީން ވިދާޅުވެއްޖެ އެވެ.
ރިޔާސީ އިންތިހާބަށް ކެމްޕެއިންކުރަން އެމްޑީޕީން ރޭ ބޭއްވި ޖަލްސާގައި އަމީން ވިދާޅުވީ، ރައީސް ސޯލިހާއިއެކު މަސައްކަތް ކުރުމަށް ލިބުނު ފުރުސަތުގައި، އެކި ކަންކަމުގައި އެމަނިކުފާނު ގެންގުޅުއްވި ސިޔާސަތުތައް ގާތުން ފެނުނު ކަމަށެވެ.
އެގޮތުން ރައީސް ސޯލިހަކީ އެއްބައިވަންތަ، ދެ ފިކުރު އެއް ކުރައްވާ އަދި ހިޔާލު ތަފާތު ބޭފުޅުންނާއެކީގައި ވެސް މަސައްކަތް ކުރަން ދަންނަ ބޭފުޅެއް ކަމަށެވެ.
"އެމަނިކުފާނުގެ[ރައީސް ސޯލިހުގެ] މަސައްކަތުގަ އިސްކުރެއްވި ސިޔާސަތުތަކުގެ ތެރޭގަ އަޅުގަނޑަށް ފާހަގަކުރެވޭ، އެމަނިކުފާނަކީ އެއްބައިވަންތަ ކުރައްވާ ބޭފުޅެއް. ދެ ފިކުރު އެއް ކުރައްވާ ބޭފުޅެއް. ހިޔާލު ތަފާތުވާ ބޭފުޅުންނާއެކީ މަސައްކަތް ކުރެވޭނެ ބޭފުޅެއް. ޒާތީ ގޮތުން އެމަނިކުފާނާ ދޭތެރޭގަ ކިތަންމެ ނުރަނގަޅު ވާހަކަތަކެއް ދެއްކި ކަމުގަ ވިޔަސް ސިޔާސީ ގޮތުން އެމީހުން ބައިވެރިކުރުމުގެ ހިތްވަރު ހުންނެވި ބޭފުޅެއް،" އަމީން ފާހަގަކުރެއްވި އެވެ.
އަމީން އިތުރަށް ވިދާޅުވީ ދިވެހިރާއްޖެއަށް ބޭނުންވަނީ ސިޔާސީ ގޮތުން "ހަޖަމް" ކުރެވޭނެ، ދިވެހިން އެއްބައިވަންތަކޮށް ވާދަވެރިކަން ނައްތާލައި، ގައުމީ ތަރައްގީ ކުރިއަށް ނެރެވޭނެ ވެރިއެއް ކަމަށެވެ. އަދި ދިވެހިންގެ މެދުގައި ފިތުނަ އުފެދޭނެ ފުރުސަތެއް ނުދެވޭނެ ކަމަށާއި ރައީސް ސޯލިހަށް ވޯޓު ދޭން ޖެހޭ މައިގަނޑު ސަބަބަކީ މިއީ ކަމުގައި އަމީން ފާހަގަކުރެއްވި އެވެ.
މީގެ އިތުރުން ޖޭޕީގެ ރައީސް ގާސިމް އިބްރާހިމް ފަހަތަށް ޖެހި ވަޑައިގަތުމަށް ފަހު ދިވެހި ރާއްޖެއަށް ބޭނުންވާ އިސްލާހުތައް ގެނެވޭނެ ފަރާތަކީ ރައީސް ސޯލިހު ކަމުގައި އަމީން ވިދާޅުވި އެވެ.
"ދިވެހިރާއްޖެއަށް އަދިވެސް ގެންނަންޖެހޭ ސިޔާސީ ބަދަލުތައް އެބަހުރި، މިއަދު ސިޔާސީ މަޝްރަހުގަ ތިބި ބޭފުޅުންނަށް ބަލާއިރު ގާސިމް އިބްރާހީމް މިއަދު ފަހަތަށް ޖެހިވަޑައިގަތް ފަހުން، ދެން އެކަން ކުރެވޭނެ ބޭފުޅަކީ އަޅުގަނޑުމެންގެ ރައީސް ސޯލިހު،" އަމީން ފާހަގަކުރެއްވި އެވެ.
އެމްޑީޕީއާއި ރައީސް ސޯލިހަށް ތާއީދުކުރަން ނިންމީ އެމަނިކުފާނާއިއެކު ޖޭޕީގެ ސިޔާސަތުތައް ކުރިއަށް ގެންދެވޭނެ ކަމުގެ ޔަގީންކަން އޮތުމުގެ ސަބަބުން ކަމުގައި ވެސް އަމީން ވިދާޅުވި އެވެ. އަދި 2018 ވަނަ އަހަރާއި ހަމައަށް އައި އިރު ރާއްޖެ އޮތް އަނދިރިކަމުގެ ތެރެއަށް ގެންދަން ބޭނުންނުވާ ކަން ފާހަގަކުރެއްވި އެވެ.
