ސެޕްޓެމްބަރު މަހު 30 ދުވަހު އޮންނަ ރިޔާސީ އިންތިހާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރުމަށް، ރިޔާސީ އިންތިހާބުގައި އަމިއްލަ ގޮތުން ވާދަ ކުރެއްވި އުމަރު ނަސީރު ނިންމަވައިފި އެވެ.
މިމަހުގެ ނުވަ ވަނަ ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި ވާދަކޮށް ހަތަރު ވަނަ އަށް އެންމެ ގިނަ ވޯޓު ހޯއްދެވި އުމަރު ވިދާޅުވީ ދެވަނަ ބުރުގައި އެއްވެސް ޕާޓީއެއްގެ ފަހަތަށް ނާރާނެ ކަމަށެވެ.
"މި ދެބައިގެ ވެރިކަންވެސް އަޅުގަނޑުމެން ހަނދާނުގައި އެބަހުރި. ހުރިހާ ޕާޓީއެއްގެ ވެރިކަމުގައި ވެސް ދިވެހިރާއްޖޭގެ ދަރަނި ވީ އިތުރު. އިންތިހާއަށް ބޮޑެތި ލޯނުތައް ނަގައި ބޭކާރު ޕްރޮޖެކްޓުތައް ހިންގީ،" ރައީސް އަބްދުﷲ ޔާމީންގެ ވެރިކަމުގައި ހޯމް މިނިސްޓަރަކަށް ހުންނެވި އުމަރު ވިދާޅުވި އެވެ.
ޕީޕީއެމް/ޕީއެންސީ، އަދި އެމްޑީޕީއާ ތާއީދުކޮށް އެ ޕާޓީތައް އިތުރަށް ވަރުގަދަކޮށް ދޭން ބޭނުން ނުވާ ކަމަށް އޭނާ ވިދާޅުވި އެވެ.
އިންތިހާބުގެ ފުރަތަމަ ބުރުގައި މާ ބޮޑު ކެމްޕޭނެއް ނުކުރެވޭ ކަމަށާއި، ހަމައެކަނި 120 ބެނާ ޕްރިންޓުކޮށް ދުއިސްތައެއްހާ ޓީޝާޓު ހަދައިގެން ނިކުތުމުން ވެސް ލިބުނު ބޮޑު ތާއީދަށް، ސަޕޯޓަރުންނަށް އުމަރު ޝުކުރު ދެންނެވި އެވެ.
އެކަމުން އެނގިގެން ދިޔައީ ސިޔާސީ ޖަގަހަތައް ހުރިހާ ރަށެއްގައި ހެދުމާއި، ކެމްޕޭނަށް މިލިއަނުން ހަރަދު ކުރުމަކީ ބޭކާރު ހަރަދެއް ކަމަށް އުމަރު ވިދާޅުވި އެވެ.
"ބޮޑެތި ޖަގަހަ ޖަހާފަ، އެތާ ލަވަޖަހައި ކެރަމް ކުޅުނަކަސް އަދި ސިޔާސީ މަސައްކަތެއް ނުއެއް ކުރެވޭނެ. އެހެންވީމަ ސިޔާސީ މެސެޖެއް ހިފައިގެން ހިތްވަރާއެކު ބަޔަކު މަސައްކަތް ކޮށްފި ނަމަ އެކަން ކާމިޔާބުވާނެކަން މިފަހަރު އިންތިހާބުގައި ފެނިގެން މިދިޔައީ،" އޭނާގެ ކެމްޕޭނަށް އިޝާރާތް ކުރައްވައި އުމަރު ވިދާޅުވި އެވެ.
މި އިންތިހާބުގެ ފުރަތަމަ ބުރުގައި އުމަރަށް ލިބިވަޑައިގަތީ 6،343 ވޯޓެވެ. އެއީ 2.8 ޕަސެންޓު ވޯޓެވެެ.
ފެހި ގާނޫނު އަސާސީގެ ދަށުން ބޭއްވި ފުރަތަމަ ރިޔާސީ އިންތިހާބުގައި ވެސް އުމަރު ވާދަ ކުރެއްވި އެވެ. 2008 ވަނަ އަހަރު ބޭއްވި އެ އިންތިހާބުގެ ފުރަތަމަ ބުރުގައި ހަ ކެންޑިޑޭޓުން ވާދަ ކުރެއްވި އިރު ދެ ވަނައަށް އެންމެ މަދުން ވޯޓު ލިބިވަޑައިގަތީ އުމަރަށެވެ. އޭނާއަށް އެފަހަރު ލިބިވަޑައިގަތީ 2،472 ވޯޓު ނުވަތަ ޖުމްލަ ވޯޓުގެ 1.4 ޕަސެންޓެވެ.
ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ވާދަކުރަނީ އެމްޑީޕީގެ ރިޔާސީ ކެންޑިޑޭޓު، ރައީސް އިބްރާހިމް މުހައްމަދު ސޯލިހު އާއި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒެވެ.
