ޖުމްހޫރީ ޕާޓީގެ ލީޑަރި ގާސިމް އިބްރާހިމްގެ ސްޕެޝަލް އެންވޯއީ އިލްހާމް އަހުމަދު, ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހަށް ތާއިދު ކުރައްވައިފި އެވެ.
ގާސިމްގެ އެންވޯއީގެ އިތުރުން އޭނާގެ ކެމްޕޭން ވެސް މެނޭޖުކުރެއްވި އިލްހާމް މިއަދު ކުރެއްވި ޓްވީޓެއްގައި ވިދާޅުވީ, މި ވަގުތު ރައީސުލްޖުމްހޫރިއްޔާ ކަމުގެ މަގާމަށް އިންތިހާބުކުރަން އެންމެ ރަނގަޅީ ރައީސް ސޯލިހު ކަމުން, އެމަނިކުފާނަށް ތާއިދުކުރައްވަން ނިންމަވާފައިވާ ކަމަށެވެ.
"[ރައީސް ސޯލިހަށް ތާއިދު ކުރަން ނިންމީ] ގައުމު މިއަދު މިއޮތް ހާލަތަށް ބަލައި، އަނިޔާވެރިކަމާއި ބަދަލުހިފުމުގެ ރޫހު މާޒީން ފެނިފައިވާތީ، އަދި ބަދަލު ހިފުމުގެ ގޮތުން ކަންކަން ކުރާނެކަމަށް މިހާރުވެސް ބުނަމުންދާތީ، އެފަދަ ބަޔަކު ވެރިކަމަށް އައިސްފިނަމަ ނުކުންނާނެ ނަތީޖާއާމެދު ވިސްނައި" ރައީސަށް ތާއިދުކުރައްވަން ނިންމެވި ސަބަބަކަށް އިލްހާމް ދެއްކެވީ, އިދިކޮޅު ކެންޑިޑޭޓް އިންތިހާބުކުރަން ބޭނުން ނުވުމެވެ.
އިލްހާމް ވިދާޅުވި ގޮތުގައި އެ ނިންމުން ނިންމެވީ, ސިޔާސީ ބޭފުޅުންނާއި, އެހެނިހެން ފަރާތްތަކާ މަޝްވަރާ ކުރުމަށްފަހު ކަމަށެވެ.
ރައީސަށް ތާއިދުކުރެއްވިކަން ހާމަކުރައްވާ އިލްހަމް ވަނީ އެމަނިކުފާނަށް ތައުރީފު ވެސް ކުރައްވާފަ އެވެ. އޭނާ ވިދާޅުވި ގޮތުގައި ރައީސް ވަނީ, ނިމިގެން މިދާ ރިޔާސީ ދައުރުގައި ގައުމު ހަލަބޮލިނުކޮށް، ސުލްހަވެރި ކަމާއެކު ވެރިކަން ކުރެއްވޭނެކަން ސާބިތުކޮށްދެއްވާފަ އެވެ. އޭނާ ވިދާޅުވީ ވާދަވެރި ސިޔާސީ ހަރަކާތްތައް ހިންގަން ފުރުސަތު ދެއްވައިގެން ވެސް ވެރިކަން ކުރެވިދާނެކަން ރައީސް ދައްކަވާފައިވާ ކަމަށެވެ.
އިލްހާމްގެ އިތުރުން ޖުމްހޫރީ ޕާޓީގެ އިސް ބައެއް ބޭފުޅުންނާއި އެ ޕާޓީއަށް ނިސްބަތްވާ ރައްޔިތުންގެ މަޖިލީހުގެ ކުރީގެ ބައެއް މެމްބަރުން ވެސް ވަނީ ރިޔާސީ އިންތިހާބުގެ ދެ ވަނަ ބުރުގައި ރައީސަށް ތާއިދުކުރަން ނިންމަވާފަ އެވެ.
