ހައި ކޯޓުގައި ކުރިއަށްދާ ކުރީގެ ރައީސް އަބްދުالله ޔާމީންގެ އިސްތިއުނާފު މައްސަލައިގެ އަޑުއެހުން މިއަދަށް ތާވަލުކުުރުމަށްފަހު ކެންސަލްކޮށްފި އެވެ.
ޔާމީނުގެ އިސްތިއުނާފު މައްސަލައިގެ އަޑުއެހުން މިއަދު ހައި ކޯޓުގައި ތާވަލު ކުރީ މެންދުރުފަހު 2:00 އަށެވެ. ނަމަވެސް ޕީޖީ އޮފީހުން އެދިގެން އެ އަޑުއެހުން މިހާރު ވަނީ ކެންސަލްކޮށްފަ އެވެ. ފަހު ވަގުތު އަޑުއެހުން ކެންސަލް ކުރުމާ ގުޅިގެން ރައީސް ޔާމީނުގެ ވަކީލުން ވެސް ގެންދަވަނީ ކަންބޮޑުވުން ފާޅުކުރައްވަމުންނެވެ.
ވަކީލުންގެ ޓީމުގައި އިސްކޮށް ހުންނަވާ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު މިއަދު ވިދާޅުވީ, ޕީޖީ އޮފީހުގެ ވަކީލުން ބިޒީވެގެން ސުންގަޑީގައި އަޑުއެހުން ކެންސަލް ކުރުމަކީ ބޮޑުވެގެންވާ އަނިޔާއެއް ކަމަށެވެ.
ޖަމީލު ތުހުމަތު ކުރެއްވި ގޮތުގައި އަޑުއެހުން ކެންސަލް ކުރުމަކީ އިސްތިއުނާފު ލަސްކުރުމަށް އިންތިޒާމީ ގޮތެއްގައި ރޭވިގެން, ގިނަ ބަޔަކު ހިމެނޭހެން ކުރަމުންދާ ކަމެކެވެ.
ރައީސް ޔާމީނުގެ އަޑުއެހުން މިއަދު ކެންސަލް ކޮށްފައިވާއިރު, މިދިޔަ އަންގާރަ ދުވަހު, ޕީޕީއެމް/ޕީއެންސީގެ ލީޑަރުން ވަނީ އެ މައްސަލައިގެ އަޑުއެހުން ނުބާއްވާ ސަބަބު ސާފު ކުރުމަށް ހައި ކޯޓަށް ގޮސްފަ އެވެ. އެއަށްފަހު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވިދާޅުވީ, އިންތިހާބުގެ ކުރިން އަޑުއެހުމެއް ނުބާއްވާނެކަން އެނގިފައިވާ ކަމަށް ވިދާޅުވެފަ އެވެ.
އަބްދުއް ރަހީމް ވިދާޅުވި ގޮތުގައި ރައީސް ޔާމީންގެ އަޑުއެހުންތައް ލަސްވަނީ, ފަނޑިޔާރަކު ޗުއްޓީއަށް ވަޑައިގަންނަވާތީ އާއި, އެ ކޯޓުގެ ރަސްމީ ދަތުރެއް ތާވަލުކޮށްފައި އޮތުމުންނެވެ.
"އަޅުގަނޑުމެންނަށް މައުލޫމާތު ލިބުނު ގޮތުގައި ބެންޗުގައި ހިމެނޭ ތިން ފަނޑިޔާރުންގެ ތެރެއިން އެއް ފަނޑިޔާރަކު 23 އިން ފެށިގެން އެބަ ޗުއްޓީ ނަންގަވާ. އަނެއްކާ ދެންމެ މި ލިބުނު މައުލޫމާތަކީ 25 އިން ފެށިގެން ހައިކޯޓުގެ ބޭފުޅުން ރަސްމީ ދަތުރުފުޅެއްގައި އެބަ ވަޑައިގަންނަވައޭ." އަބްދުއްރަހީމް ވިދާޅުވި އެވެ.
ރައީސް ޔާމީންގެ ފަރާތުން ހައި ކޯޓަށް ހުށަހަޅަފައިވާ އިސްތިއުނާފު މައްސަލައަކީ ވ. އާރަށް ކުއްޔަށް ދިނުމުގައި ހިޔާނާތްތެރިވެފައިވާކަން ސާބިތުވެ, ކްރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމުގެ މައްސަލަ އެވެ. އެމަނިކުފާނު މިހާރު ގެންދަވަނީ މާފުށީ ޖަލުގައި އެ ހުކުމް ތަންފީޒު ކުރައްވަމުންނެވެ.
އާރަށުގެ އިސްތިއުނާފު މައްސަލާގައި އެންމެ ފަހުން އަޑުއެހުމެއް ބޭއްވި މިމަހު ހަ ވަނަ ދުވަހު އެވެ.
