ރައްޔިތުންގެ މަޖިލީހުގެ ވިލުފުށީ ދާއިރާގެ ކުރީގެ މެމްބަރު ރިޔާޒު ރަޝީދު، ރިޔާސީ އިންތިހާބުގެ ދެ ވަނަ ބުރުގައި ރައީސް އިބްރާހިމް މުހައްމަދު ސޯލިހަށް ތާއިދު ކުރެއްވުމަށް ނިންމަވައި އެކަން ހާމަ ކުރައްވައިފި އެވެ.
"ހާއްސަ މަޖިލިހުގަ އާއި ރައްޔިތުންގެ މަޖިލިހުގައި އަޅުގަނޑާއެކު އިސްލާހީ ގިނަ މަސައްކަތްތަކެއް ކުރައްވާފައިވާ މިހާރުގެ ރައީސުލްޖުމްހޫރިއްޔާ އަޅުގަނޑުގެ އަޚް އިބްރާހިމް މުހަ އްމަދު ސޯލިހަށް މި ރިޔާސީ އިންތިހަބުގެ ދެވަނަ ބުރުގައި ތާއީދުކުރަން އަޅުގަނޑު ނިންމައިފިން،" ރޭ ކުރެއްވި ޓްވީޓެއްގައި ރިޔާޒު ވިދާޅުވި އެވެ.
ޕީޕީއެމްގެ މެމްބަރެއްގެ ގޮތުގައި ކުރިން ހުންނެވި ރިޔާޒު އެ ޕާޓީ ދޫކޮށް ޖޭޕީއާ ގުޅުވަޑައިގަތީ، ކުރީގެ ރައީސް އަބްދުﷲ ޔާމީންގެ ވެރިކަން ނިމުމަށް ފަހު، ނޮވެމްބަރު 2018 ގަ އެވެ.
މިހާރު ވެސް ޖޭޕީގެ ކައުންސިލް މެމްބަރެއްގެ ގޮތުގައި ހުންނެވި ރިޔާޒު، ރައީސް ސޯލިހަށް ތާއިދުކުރާކަން އިއުލާނު މި ކުރެއްވީ، ޖޭޕީން، މި ފަހަރުގެ ރިޔާސީ އިންތިހާބުގައި އެއްވެސް ކެންޑިޑޭޓަކަށް ތާއިދު ނުކުރަން ނިންމާފައި ވަނިކޮށެވެ.
މިދިޔަ އަންގާރަ ދުވަހު ރައީސް ސޯލިހު މުލިއާގޭގައި ރިޔާޒުއާ ވަނީ ބައްދަލު ވެސް ކުރައްވައިފަ އެވެ. ރިޔާޒުގެ އިތުރުން ވެސް ޖޭޕީގެ އިސް ބައެއް ބޭފުޅުން ރައީސް ސޯލިހަށް ތާއިދު ކުރާން ވަނީ ނިންމަވައިފަ އެވެ.
ފީފާ ރެފްރީއެއްގެ ގޮތުގަ އާއި ވިޔަފާރީގެ ދާއިރާގައި ހަރަކާތްތެރިވަމުން ގެންދެވި ރިޔާޒު އެންމެ ފުރަތަމަ އިންތިހާބުވީ ފެހި ގާނޫނު އަސާސީ އެކުލަވާލި ރައްޔިތުންގެ ހާއްސަ މަޖިލީހަށެވެ. އެ މަޖިލީހުގެ ތ. އަތޮޅު މެމްބަރުކަމަށް ފަހު، 17، އަދި 18 ވަނަ ރައްޔިތުންގެ މަޖިލީހުގެ ވިލުފުށީ ދާއިރާގެ ގޮނޑި އޭނާ ކާމިޔާބު ކުރެއްވި އެވެ.
ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ވާދަ ކުރައްވަނީ ރައީސް ސޯލިހު އާއި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު އެވެ.
