އަންނަ މަހުން ފެށިގެން ލޯކަލް ކައުންސިލްތަކުގެ މުވައްޒަފުންނަށް 35 ޕަސަންޓު އެލަވަންސް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ނިންމަވައިފި އެވެ.
ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ސަރުކާރުގެ ވުޒާރާތަކުގައި 35 ޕަސަންޓް އެލަވަންސް ނުލިބި ތިބި ހުރިހާ މުވައްޒަފުންނަށް, މިއަހަރު މޭ މަހުން ފެށިގެން އެ އެލަވަންސް ދިނުމަށް ނިންމިއިރު, އޭގެ ތެރޭގައި ކައުންސިލުތަކުގެ މުވައްޒަފުން ނުހިމެނޭތީ އެ މުވައްޒަފުންގެ ކަންބޮޑުވުންތަކެއް ހުރި ކަމަށެވެ.
އެ ކަންބޮޑުވުންތައް ހައްލުކޮށް އަންނަ އޮކްޓޯބަރު މަހުން ފެށިގެން ކައުންސިލްތަކުގެ މުވައްޒަފުންނަށް ވެސް އެލަވަންސް ލިބޭ ގޮތަށް ހަމަޖައްސަން ރައީސް ނިންމަވާފައިވާ ކަމަށް އޭނާ ވިދާޅުވި އެވެ.
މިއުވާން ވިދާޅުވީ ރައީސް މި ނިންމެވުން ނިންމެވީ ކައުންސިލްތަކުގެ މުވައްޒަފުންގެ ފަރާތުން ލިބިފައިވާ ޝަކުވާތަކަށް ރިއާޔަތް ކުރުމަށްފަހު ކަމަށެވެ. އަދި މި އެލަވަންސް ނުލިބުމީ ލާމަރުކަޒީގޮތިން ރައްޔިތުންނާ އެންމެ ގާތުން ހިދުމަތް ފޯރުކޮށްދިނުމަށް މުވައްޒަފުން ކުރާ މަސައްކަތަށް އެޅޭ ހުރަހެއް ކަަމަށް ރައީސް ގަބޫލުކުރައްވާ ކަމަށް ވެސް އޭނާ ވިދާޅުވި އެވެ.
"ކައުންސިލްތަކުގެ މުވައްޒަފުންނަށްވެސް މި އެލަވަންސް ލިބޭނެ ގޮތަށް ހަމަޖެއްސެވުމަކީ އެންމެ ރަނގަޅު ގޮތްކަމަށް އެމަނިކުފާނަށް ގަބޫލުފުޅުކުރެއްވޭ" މިއުވާން ވިދާޅުވި އެވެ.
ލޯކަލް ކައުންސިލްތަކުގެ މުވައްޒަފުންނަށް 35 ޕަސަންޓު އެލަވަންސް ދޭން ރައީސް ނިންމެވިއިރު, އެމަނިކުފާނު ވަނީ މިދިޔަ ހަފްތާގައި, ނަރުހުންނާއި މެޑިކަލް އޮފިސަރުންނަށް އެޓެންޑެންސް އެލަވަންސް ލިބޭ ގޮތަށް މުސާރައިގެ އޮނިގަނޑަށް ބަދަލުތަކެއް ގެންނަވާފަ އެވެ.
