ބޭންކް އޮފް މޯލްޑިވްސް (ބީއެމްއެލް)ގެ އިންޓަނެޓް ބޭންކިންއަށް ލޮގިންކޮށްފައިވާ ޑިވައިސްތައް އެނގޭނެ، ހާއްސަ ފީޗާ ތައާރަފުކޮށްފި އެވެ.
ބީއެމްއެލްއިން ބުނި ގޮތުގައި މިއީ ކަސްޓަމަރުން ސްކޭމްތަކުން ރައްކާތެރި ކުރުމަށާއި ސެކިއުރިޓީ އިތުރަށް ހަރުދަނާ ކުރުމުގެ ގޮތުން އަޅަމުންދާ ފިޔަވަޅުތަކުގެ ތެރެއިން އިތުރު ފިޔަވަޅެއްގެ ގޮތުގައި ތައާރަފްކުރި ފީޗާ އެކެވެ.
އަލަށް ތައާރަފުކުރި ޑިވައިސް މެނޭޖްމަންޓް ފީޗާ މެެދުވެރިކޮށް އިންޓަނެޓް ބޭންކިންއަށް ލޮގިންވެފައި ހުންނަ އެކްޓިވް ސެޝަންތަކާއި ލޮގިންވެފައިވާ ޑިވައިސްއެއްގެ މައުލޫމާތު ބަލާލެވޭނެ އެވެ. އަދި އެ ޑިވައިސްތަކުން ލޮގްއައުޓު ވެސް ކޮށްލެވޭނެ އެވެ.
މި ފީޗާ ބީއެމްއެލްގެ އިންޓަނެޓް ބޭންކިން އެޕްލިކޭޝަންގެ އެންމެ ފަހުގެ އަޕްޑޭޓުގައި މިހާރު ވަނީ ހިމަނާފަ އެވެ.
ސްކޭމްތަކުން ކަސްޓަމަރުންނަށް އިތުރު ރައްކާތެރިކަމެއް ހޯދައިދިނުމުގެ ގޮތުން ބީއެމްއެލްއިން މީގެކުރިންވެސް ތަފާތު އެތައް ސޭފްޓީ ފީޗާއެއް ވަނީ ތައާރަފުކޮށްފަ އެވެ.
އެގޮތުން އޮތެންޓިކެޓާ އެޕްތައް މެދުވެރިކޮށް ވަންޓައިމް ޕާސްވޯޑް (އޯޓީޕީ) ލިބޭނެ ގޮތް ހަމަޖެއްސުމާއި އިންޓަނެޓް އަދި ބީއެމްއެލް މުއާމަލާތްތަކަށް ޕުޝް ނޮޓިފިކޭޝަން ފޮނުވުމާއި ލޮގިން ކުރާ ކޮންމެ ފަހަރަކު އެލާޓް ލިބޭ ގޮތް ވަނީ ހަމަޖައްސާފަ އެވެ.
އޭގެ އިތުރުން ސްކޭން-ޓު-ޕޭމަންޓްތަކަށް އޯޓީޕީ ޖަހަން ޖެހޭ ގޮތް ހެދުމާއި އިންޓަނެޓް އަދި މޮބައިލް ބޭންކިން ލޮގިންއަށް ޓޫ-ފެކްޓާ އޮތެންޓިކޭޝަން ތައާރަފްކުރުމާއި އިންޓަނެޓް ބޭންކިން އަދި ކާޑުތަކުގެ ހިދުމަތް ކަސްޓަމަރުން އަމިއްލައަށް ވަގުތުން މެދުކަނޑާލެވޭ 'ކިލް ސްވިޗް' ފީޗާއެއެވެސް ވަނީ ތައާރަފުކޮށްފަ އެވެ.
