މި ސަރުކާރަށް ލޯނު ހޯދެނީ ގައުމުތަކާ ގުޅުން ބާއްވާތީ ކަމަށާއި ދިމާވާ ކަމަކުން މި ސަރުކާރު ގެއްލިއްޖެ ނަމަ ރާއްޖެ ބަނގުރޫޓުވާ ތަން ފެނިވަޑައިގަންނަވާ ކަމަށް އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރަށް ތާއިދު ހޯއްދެވުމަށް މާފަންނުގައި ބޭއްވި ކަންމަތީ ބައްދަލުވުމުގައި ރައީސް ސޯލިހު ވިދާޅުވީ "ފައިސާ ފޮތީގެ އެއް ފުށް ފެންނަ ބަޔަކަށް" އިގުތިސާދު ނުދެމެހެއްޓޭނެ ކަމަށެވެ.
އެމްޑީޕީގެ ސަރުކާރަށް ލޯނާއި އެހީ ލިބޭތީ ވާދަވެރިން އެ ވާހަކަ ދައްކާ ކަަމަށާއި ޕީޕީއެމްގެ ސަރުކާރަށް އެކަން ނުކުރެވުނީ ހާރިޖީ ސިޔާސަތު ރަނގަޅުނުވުމުން ކަމަށް އެމަނިކުފާނު ވިދާޅުވި އެވެ.
އިތުބާރުކުރެވޭ ހާރިޖީ ސިޔާސަތެއް ޕީޕީއެމްގެ ސަރުކާރުގައި ނެތްކަމުގެ މިސާލެއްގެ ގޮތުގައި ރައީސް ދެއްކެވީ ކޮމަންވެލްތު ފަދަ ބައިނަލްއަގުވާމީ ޖަމާއަތްތަކާއި ބައެއް ގައުމުތަކާއި ރާއްޖެއާ ދެމެދު އޮތް ގުޅުން ކަނޑައިލުމެވެ.
"މިއަދު އަޅުގަނޑުމެން އެދުނީމާ ފައިސާ ދޭނެ ކިތަންމެ ފަރާތެއް އެބަހުރި، މާލީ މުއައްސަސާތަކުން. މާލީ އިދާރާތަކުން ލޯނު އެ ދެނީ އެހެންވެގެން. އެ ފައިސާ ދެއްކޭނެކަން އެބޭފުޅުންނަށް އެނގޭތީ. މިއަދު އަޅުގަނޑުމެންނަށް މި އިންތިހާބު އަދި ކުރެވޭ ކަމަކުން ގެއްލިއްޖެ ނަމަ މި ގައުމު ބަނގުރޫޓުވެގެން ދާތަން އަޅުގަނޑަށް ފެނޭ،" ރައީސް ވިދާޅުވި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ތަޖުރިބާކުރި އަނިޔާވެރި ކަމަށް ވެސް އަލުން އަނބުރާ ނުދެވޭނެ ކަމަށާއި އެހެންވެ، ވިސުނުންތެރިކަމާއެކު މަސައްކަތްކޮށް ދެ ވަނަ ބުރު ކާމިޔާބު ކުރުމަށް އާއްމު މެމްބަރުންނަށް ރައީސް ސޯލިހު އިލްތިމާސް ކުރެއްވި އެވެ.
