ރާއްޖޭގައި ވެރިކަން ކުރާ ނިޒާމު އަލުން ކަނޑައެޅުމާއި މެދު ފެންނަ ނުފެންނަ ވޯޓެއް ނަގަން ދަ ޑިމޮކްރެޓްސް އިން ހުށަހެޅި ހުށަހެޅުމަށް ރައީސް އިބްރާހީމް މުހައްމަދު ސޯލިހު އެއްބަސްވެވަޑައިގެންފި އެވެ.
ރިޔާސީ އިންތިހާބުގެ ދެވަނަ ބުރަށް ކުރައްވާ ކެމްޕެއިނުގައި މާލޭގައި މިއަދު ދޮރުން ދޮރަށް ހިންގަވަން ނުކުމެވަޑައިގެން ނޫސްވެރިންގެ ސުވާލުތަކަށް ޖަވާބުދެއްވަމުން ރައީސް ވިދާޅުވީ ދަ ޑިމޮކްރެޓްސްް އާ އެކު ކުރިއަށް ގެންދަވާ މަޝްވަރާގައި އެޕާޓީން ބާރު އަޅަނީ ނިޒާމު ކަަނޑައެޅުމުގެ ފެންނަ ނުފެންނަ ވޯޓު ނަގަން ކަމަށެވެ.
ޑިމޮކްރެޓްސްގެ ލީޑަރު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގަންނަވަނީ އިންތިހާބުގެ ދެވަނަ ބުރުގެ ކުރިން، މިމަހުގެ 25 ގައި އެ ވޯޓް ނަގަން ކަމަށާއި އެހެން ނަމަވެސް އެއީ އެހާ ޕްރެކްޓިކަލް ކަމެއް ނޫން ކަމަށް ވިދާޅުވެފައި ވާނެ ކަމަށް ވެސް ރައީސް ވިދާޅުވި އެވެ.
"އަޅުގަނޑު ދެންނެވިން އެއީ [އިންތިހާބުގެ ކުރިން ނިޒާމީ ވޯޓު ނެގުމަކީ ] އެހާ ޕްރެކްޓިކަލް ކަމަކަށް ނުވާނޭ، ހިނގާށޭ ވޯޓަށް ފަހުގައި އެއާ ދޭތެރޭގައި ޑޭޓެއް ކަނޑައަޅަން. ޑޭޓަކާ ދޭތެރޭ ވެސް އަޅުގަނޑުމެން ވާހަކަ ދެއްކިން،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ވެރިކަމުގެ ނިޒާމު ބަރުލަމާނީއަށް ބަދަލުކުރަން ފެނޭތޯ ވޯޓެއް ނަގަން ގޮވާލައި ރައްޔިތުންގެ މަޖިލީހަށް މިހާރު ހުށަހަޅާފައިވާ ގަރާރު ފާސްކޮށް، އެ ގަރާރު ފޮނުވުމުން، އެމަނިކުފާނު އެކަން އިލެކްޝަންސް ކޮމިޝަނަށް ހުށަހަޅުއްވާނެ އެވެ.
ނިޒާމު ކަނޑައަޅާ ވޯޓު ވަކި ތާރީހެއްގައި ބާއްވަން އީސީއަށް ލިއުމުން ހުށަހަޅުއްވާނެ ކަމަށް ވެސް އެމަނިކުފާނު ވިދާޅުވި އެވެ.
"އެހެންވީމާ ރިޔާސީ އިންތިހާބު ނިމުމާ އެކީގައި އެކަން ކުރެވޭނެ [ވޯޓު ނެގޭނެ] ގޮތްތަކެއް ހޯދައިދީފައި އަޅުގަނޑު ބާއްވާނަމޭ، އެ ހުށަހެޅުން އަަޅުގަނޑު ހުށަހަޅާފައި އޮންނާނީ،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި އެގޮތަށް ހުށަހެޅުއްވި ފަހުން ދަ ޑިމޮކްރެޓްސް އިން އަދި ވަކި ޖަވާބެއް ނުދެ އެވެ.
ދަ ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ކުރިމަތިވެވަޑައިގެންނެވި ނާކާމިޔާބީއަށް ފަހު އެމްޑީޕީގެ އިސް ބޭފުޅުން ތަކެއް އެޕާޓީން ވަކިވެވަޑައިގެން އުފެއްދެވި ޕާޓީ އެކެވެ. އެހައިތަނަށް އެމްޑީޕީގެ ރައީސްގެ ގޮތުގައި ހުންނެވި ނަޝީދާއި ރައީސް ސޯލިހާ ދެމެދު އޭގެ ފަހުން އޮތީ ވަރަށް ބޮޑަށް ގުޅުން ގޯސްވެފަ އެވެ.
އެހެން ނަމަވެސް އެ ދެބޭފުޅުން އިއްޔެ ވާހަކަ ކުރެއްވި މަޝްވަރާ ރައީސް ސިފަކުރެއްވީ "ފަސޭހަ މަޝްވަރާތަކެއް"ގެ ގޮތުގަ އެވެ.
"ދެން އަޅުގަނޑުމެން ވަރަށް ދުވަސް ކޮށްފައި އިއްޔެ މި ވާހަކަ ދެއްކީ. އަނެއްހެން އަޅުގަނޑަކަށް ނުފެނޭ މާ ދުރުގައި ތިބި ތަނެއް. ހަމަ ކުރިއެކޭ އެއްގޮތަށް ފުރަތަމަ ވެސް ފަށައިގަނެވުނު ވާހަކަ ދައްކަން،" ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި އިއްޔެ މަޝްވަރާކުރެއްވީ ހަމަ އެކަނި ނިޒާމު ބަދަލުކުރުމުގެ ހުށަހެޅުމާ ބެހޭ ގޮތުންނެވެ.
