ރައްޔިތުންގެ މަޖިލީހުގައި މިއަދު ބާއްވަން ތާވަލުކުރި ޖަލްސާ ފަށަން އޮތް ގަޑިން ފެށިގެން ގާތްގަނޑަކަށް 45 މިނެޓް ހޭދަވި އިރު ވެސް މެމްބަރުން ތަޅުމަށް ވަޑައިނުގެންނެވުމުން ޖަލްސާ ފެށޭ ގޮތެއް ނުވި އެވެ.
މިއަދުގެ ޖަލްސާ ވެސް ފަށަން އޮތީ މަޖިލީހުގެ ޖަލްސާތައް އާއްމުކޮށް ފަށާ ގަޑި، 9:00 ގަ އެވެ. ޖަލްސާއެއް ފަށަން ހަމަވާން ޖެހޭ ކޯރަމް ކަމަށްވާ 22 މެމްބަރުން އޭރު ތަޅުމުގައި ނެތުމުން ރިޔާސަތުގައި މަޖިލީހުގެ ރަައީސް މުހައްމަދު ނަޝީދު އިންނަވައި، މެމްބަރުންނަށް އެތައް އިރަކު އިންތިޒާރުކުރެއްވި އެވެ. އެތައް އިރަކު އިންތިޒާރު ކުރެއްވުމަށް ފަހު އެމަނިކުފާނު ވިދާޅުވީ މެމްބަރުން ތަޅުމަށް ވަޑައިނުގެންނެވި ނަމަވެސް ގޯތިތެރޭގައި، ކުޑަދަށުގައި މެމްބަރުން އެބަ ތިއްބެވި ކަމަށެވެ.
"އިއްޒަތްތެރި މެމްބަރުން އެބަ އިއުތިރާޒުކުރައްވާ މަޖިލީހުގެ ތަޅުމަށް ވެދެވަޑައިގަތުމަށް. މީގައި އެމްޑީޕީގެ ޕާލަމެންޓްރީ ގްރޫޕް އެބަ ތިއްބެވި ކުޑަދަށުގައި. އަޅުގަނޑު އަނެއްކާ ވެސް މަސައްކަތްކުރާނަން އެބޭފުޅުންނާ ވާހަކަ ދައްކައިގެން މަޖިލިސް ފެށޭނެ ގޮތެއް އޮތްތޯ،" ނަޝީދު ވިދާޅުވި އެވެ.
އެމަނިކުފާނު އެ މޭރުމުން ދެ ފަހަރަކު ވާހަކަ ދެއްކެވުމަށް ފަހު 9:45 އެހާ އިރު ވިދާޅުވީ ޖަލްސާ އަލުން ފެށޭތޯ 10:00 ގައި އަލުން މަސަައްކަތްކުރައްވާނެ ކަމަށެވެ.
އޭގެ ފަހުން ރިޔާސަތަށް ވަޑައިގެން އެމަނިކުފާނު ދެއްކެވި ވާހަކަފުޅުން އެނގުނީ އެމްޑީޕީގެ މެމްބަރުން ޖަލްސާގައި ބައިވެރިވެވަޑައިގަންނަވަން ދެކޮޅު ހެއްދެވީ މިއަދުގެ ޖަލްސާއަށް އެކުލަވައިލާފައި އޮތް އެޖެންޑާއާ މެދު ހިތްހަމަނުޖެހިގެން ކަމެވެ. ވިދާޅުވީ އެޖެންޑާއާ ދޭތެރޭ ޝަކުވާތަކެއް އެބަހުރި ކަމަށާއި އެހެން ނަމަވެސް އެޖެންޑާގައި މަޖިލީހުގެ ގަވައިދާ ހިލާފު އެއްވެސް ކަމެއް ނެތް ކަމަށެވެ.
"މިއަދުގެ އެޖެންޑާގައި އަޅުގަނޑަށް ފެންނަ ތަނުގައި އެއްވެސް މައްސަލައެއް ނެތް. އެޖެންޑާ މިއޮތީ ހަމަ އެހެން ދުވަސްދުވަހެކޭ ވެސް އެއްފަދައިން، މަޖިލީހުގެ ގަވައިދުގައިވާ ގޮތުގެ މަތިން އެކުލަވައިލެވިފައި،" ނަޝީދު ވިދާޅުވި އެވެ.
އެެއަށް ފަހު އަނެއްކާ ވެސް އިލްތިމާސްކުރެއްވީ މެމްބަރުން ވަަޑައިގެން ޖަލްސާގައި ބައިވެރިވެވަޑައިގަތުމަށެވެ.
މަޖިލީހުގައި 87 މެމްބަރުން ތިއްބަވާ އިރު މި ފަހުން ބޭއްވި ގިނަ ޖަލްސާތަކަށް ގަވައިދުން ވަޑައިގަންނަވަމުން ގެންދެވީ ތިރީހަކަށް މެމްބަރުންނެވެ.
