މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރަށް ތާއިދު ހޯއްދަވަން މިއަދު ރައީސް އިބްރާހިމް މުހައްމަދު ސޯލިހު މާލޭގެ ބައެއް ގޭގެއަށް ޒިޔާރަތް ކުރެއްވިއިރު، އެގޭބިސީތަކުގައި ތިރިއުޅޭ ފަރާތްތަކުން ކުރި ސުވާލުތަކަށް ޖަވާބު ދެއްވި އެެވެ.
ރައީސް ސޯލިހު މިއަދު ދޮރުން ދޮރަށް ހިންގެވުމުގެ ހަރަކާތް ފައްޓަވާފައި ވަނީ މައްޗަންގޮޅިންނެވެ. އެ ހަރަކާތުގެ ތެރެއިން މާލޭގެ މައްޗަންގޮޅީގެ އިތުރުން މާފަންނު އުތުރުގެ ބައެއް ގޭގެއަށް ވަދެވަޑައިގެން މީހުންނާ ބައްދަލު ކުރެއްވެވި އެވެ.
ބައެއް ގެތަކުން އެ މަނިކުފާނާ ތަފާތު ސުވާލުތައް ކުރި އެވެ. ވާދަ ކުރައްވަނީ ކީއްވެގެންތޯ އާއި ގެންނާނެ ބަދަލުތަކާއި އިންޑިއާގެ ސިފައިން އަސްކަރީ ބޭނުމުގައި ރާއްޖޭގައި ތިބޭ ކަމަށް ދައްކާ ވާހަކައާ ގުޅޭ ގޮތުން ސުވާލު ކުރުމުން ޖަވާބު ދެއްވި އެވެ.
މިއަދު ޒިޔާރަތް ކުރެއްވި ގެއެއްގައި ރައީސް ސޯލިހު މީހަކާ ވާހަކަ ދައްކަވަނީ. -- ފޮޓޯ: އެމްޑީޕީ
އިންޑިއާ ސިފައިން އަޝްކަރީ ބޭނުމަށް، ގާއިމުވެ ތިބޭ ކަމަށް އިދިކޮޅު ޕީޕީއެމް/ޕީއެންސީ ބުނަމުން ދިޔަސް، އެފަދަ ކަމެއްގައި ސިފައިން ނެތްކަމުގެ ޔަގީންކަށް މިއަދު ވެސް ދެއްވި އެވެ.
އަދި އެ މަނިކުފާނަށް ދެ ވަނަ ދައުރެއް ލިބިވަޑައިގެންފި ނަމަ ގެންނާނެ ބައެއް ބަދަލުތައް ވެސް، ކުރިއެރުން ވެސް ހިއްސާކޮށް ދެއްވި އެވެ
މީގެ ކުރިން އިންތިހާބުގެ ފުރަތަމަ ބުރުގައި ވެސް ރައީސް ސޯލިހު ވަނީ މާލޭގައި ދޮރުންދޮރަށް ހިންގަވައިފަ އެވެ. ނަމަވެސް ފުރަތަމަ ބުރުގައި އެމަނިކުފާނު ބޮޑަށް އިސްކަން ދެއްވާފައި ވަނީ އަތޮޅުތެރޭގެ ރަށްރަށަށެވެ. އެގޮތުން އެމަނިކުފާނު ވަނީ ފުރަތަމަ ބުުރުގެ ކެމްޕޭނުގައި ރާއްޖޭގައި މީހުން ދިރިއުޅޭ 187 ރަށުގެ ތެރެއިން 170 އަށްވުރެ ގިނަ ރަށަށް އެ މަނިކުފާނު ވަޑައިގެންނެވި އެވެ.
މިއަދު ޒިޔާރަތް ކުރެއްވި ގެއެއްގައި ތުއްތު ކުއްޖަކާ ރައީސް ސަލާމްކުރައްވައި، ސަމާސާ ކުރައްވަނީ. -- ފޮޓޯ: އެމްޑީޕީ
ރައީސް ސޯލިހުގެ އިތުރުން އެމަނިކުފާނުގެ އަނބިަނބަލުންގެ އިތުރުން ކެމްޕޭނު ތަރުޖަމާނު، މާރިޔާ ދީދީ ވެސް ދަނީ މާލޭގައި ދޮރުންދޮރަށް ހިންގެވުމުގެ ހަރަކާތްތައް ކުރިއަށް ގެންދަވަމުންނެވެ.
އެމްޑީޕީއެކޭ އެއްގޮތަށް އިދިކޮޅު ޕީޕީއެމް/ޕީއެންސީގެ ކެންޑިޑޭޓު، މުހައްމަދު މުއިއްޒުގެ ކެމްޕޭނު ހަރަކާތްތައް ވެސް ދަނީ ބާރު ދުވެލީގައި ހިންގަމުންނެވެ. މުއިއްޒު މިވަގުތު ކެމްޕޭނު ކުރައްވަމުން ގެންދަވަނީ ށ. އަތޮޅުގެ ރަށްތަކުގަ އެވެ.
