ސެޕްޓެމްބަރު 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ވޯޓު ލުމަށް ގިނަ އަދަދެއްގެ ރައްޔިތުން ރީ-ރެޖިސްޓާކޮށް ވޯޓުލާން މަސައްކަތް ކުރުމަކީ ކަންބޮޑުވާން ޖެހޭ ކަމެއް ނޫން ކަމަށާއި ރީ-ރެޖިސްޓަ ކުރުމަށް ކުރިއަށް ގެންދާ މަސައްކަތުގައި އިލެކްޝަންސް ކޮމިޝަނަށް ފުރިހަމައަށް އިތުބާރު ކުރާ ކަމަށް، ސަރުކާރު ހިންގާ މައި ޕާޓީ، އެމްޑީޕީން ބުނެފި އެވެ.
ރީ-ރެޖިސްޓްރޭޝަންގެ މުއްދަތު މިއަދު 4:00 އަށް ހަމަވާއިރު އިއްޔެއާ ހަމައަށް ދެ ދުވަހުގެ ތެރޭގައި 25،000 މީހުން ވަނީ ފޯމު ހުށަހަޅައިފަ އެވެ.
ދެ ދުވަހުގެ ތެރޭ އެހާ ގިނަ ބަޔަކު ރީ-ރެޖިސްޓަ ކުރުމުން ކަންބޮޑުވުން ފާޅުކޮށް، އެކަމަށް ޕާޓީތަކާއި ބައިނަލްއަގުވާމީ މޮނިޓަރުން ސަމާލުކަން ދިނުމަށް އެދި އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ގޮވާލެއްވުމުން އެކަމާ ގުޅޭ ގޮތުން އެމްޑީޕީގެ ތަރުޖަމާނު އަނަސް އަބްދުއްސައްތާރު ވިދާޅުވީ ރީ-ރަޖިސްޓްރޭޝަންގެ މަސައްކަތް ދަނީ ވަރަށް ފުރިހަމައަށް ކަމަށާއި ވެރިފިކޭޝަން ޕްރޮސެސްއަށް ފުރިހަމަ އިތުބާރު ކުރައްވާ ކަމަށެވެ.
"އެބޭފުޅުން [އީސީ] އެ ވިދާޅު ވަނީ ފޯމުތައް ހުށަހަޅާ ފަރާތްތަކަށް ގުޅާނެ ކަމަށް، އޮންލައިންކޮށް ފޯމު ހުށަހަޅާއިރު ފޮޓޯއެއް އެބަ ނަގަންޖެހޭ، މެސެޖް އެބަ ލިބޭ" އީސީގެ މަސައްކަތަށް އެމްޑީޕީން އިތުބާރު ކުރާ ސަބަބުތައް އަނަސް ތަފުސީލުކޮށްދެއްވި އެވެ.
ގިނަ ބަޔަކު ރީ-ރެޖިސްޓަކޮށް، ވޯޓުގައި ވެސް ބައިވެރިވުމަކީ ބޮޑު ކާމިޔާބެއް ކަމަށް އަނަސް ވިދާޅުވި އެވެ.
ރިޔާސީ އިންތިހާބުގެ ފުރަތަމަ ބުރު ސެޕްޓެމްބަރު 9 ގައި ބޭއްވިއިރު އެއީ ރާއްޖޭގެ ތާރީހުގައި މިހާތަނަށް އެންމެ މަދު މީހުން ވޯޓުލާން ނުކުތް ރިޔާސީ އިންތިހާބެވެ. އެ ބުރުގައި ވޯޓުލީ ވޯޓުލެވޭ އާބާދީގެ 80 ޕަސެންޓު މީހުންނެވެ.
މުއިއްޒުގެ ކަންބޮޑުވުމާއެކު އީސީއިން ވަނީ ރީ-ރެޖިސްޓްރޭޝަނަށް ހުށަހެޅޭ ފޯމުތައް ވެރިފައިކުރާނެ ކަމަށާއި ސުވާލު އުފެދޭނެ ޖާގައެއް ނުދޭނެ ކަމަށް ބުނެފަ އެވެ. އަދި ފުރަތަމަ ބުރުގައި ވޯޓުލީ މީހުން މަދުވުމަކީވެސް ރީ-ރެޖިސްޓްރޭޝަން އިތުރުވާ ސަބަބެއް ކަމަށްވެސް އެ ކޮމިޝަނުގެ ނައިބު ރައީސް އިސްމާއިލް ހަބީބު ވިދާޅުވި އެވެ.
"ފުރަތަމަ ބުރުގައި 60،000 އެއްހާ މީހުން ފުރަތަމަ ބުރުގައި ވޯޓުލާން ނުނިކުމޭ، އޭގެ ތެރޭގައި އުޅޭނެ ރާއްޖެއިން ބޭރުގަ ތިބި މީހުންވެސް، ގިނައިން ރީ-ރެޖިސްޓަ ކުރަނީ ދެވަނަ ބުރުގައި އޭގެތެރެއިން ވޯޓުލާން ބޭނުންވާ މީހުން ކަމަށްވެސް ވެދާނެ، އެއީ ވަރަށް ރަނގަޅު ކަމެއް،" އޭނާ ވިދާޅުވި އެވެ.
