ފުޓްބޯޅަ މެޗެއްގެ ފުރަތަމަ ހާފުން ބަލިވުމުން އެ މެޗު ނިމުނީ ކަމަށް ނިންމައިގެން ނުވާނެ ކަމަށާއި ދެވަނަ ހާފުގައި ނުކުމެ އިތުރަށް ލަނޑު ޖަހައި ނަތީޖާ ބަދަލުކުރާ އުސޫލުން ރިޔާސީ އިންތިހާބުގެ ދެވަނަ ބުރު އެމްޑީޕީން ކާމިޔާބުކުރާނެ ކަމަށް އެ ޕާޓީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އިންތިހާބުގެ ފުރަތަމަ ބުރުގައި އެމްޑީޕީން އުންމީދުކުރި ނަތީޖާ ނެރެވިފައި ނުވާއިރު ދެވަނަ ބުރުގައި އެ ޕާޓީން ވާދަކުރަނީ އިދިކޮޅު ކޯލިޝަންގެ ރިޔާސީ ކެންޑިޑޭޓު ޑރ. މުހައްމަދު މުއިއްޒުއާ އެވެ.
ރައީސް ވިދާޅުވާ ގޮތުގައި އެމްޑީޕީން ދެވަނަ ބުރާ ކުރިމަތިލަނީ އާ އަޒުމަކާއި, ރޫހާއި ޖޯޝާ އެކު އެވެ. އެކަން އެމްޑީޕީގެ ކުރީގެ ހަރަކާތްތެރިން ކެމްޕެއިނާ ގުޅިވަޑައިގަތުމުން ހާމަވާ ކަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑުމެން އަނެއްކާ ވެސް ތައްޔާރުވަނީ ދެވަނަ ބުރުގެ ވޯޓުލުން ބޮޑު އަގުލަބިއްޔަތަކުން ކާމިޔާބުކުރުމަށް. މިރޭ މި ހަރުގެއަށް ހާޒިރުވެ ތިއްބެވި ބޭފުޅުންނާ އަޅުގަނޑުމެންގެ ޒަމާންވީ ޕާޓީ އުފެއްދުމުގައި އުޅުނު އެތައް މޫނެއް ފެންނަމުންދާ ކަމީ އުފަލެއް," ރައީސް ވިދާޅުވި އެވެ.
"އަޅުގަނޑުމެން ނުކުމެ މިތިބީ މެޗަކަށް. ފުރަތަމަ ހާފު ނިމިއްޖެ. ފުރަތަމަ ހާފު ނިމުމަކީ މެޗު ނިމުމެއް ނޫން. ބައެއް ފަހަރު ފުރަތަމަ ހާފުގައި 3-1 އިން 4-2 އިން ބަލިވޭ. އެއް ބަޔަކު މޮޅުވޭ. މިއަދު މިތިބީ އެގޮތަށް ބަލާނަމަ 3-1 ގެ ތަފާތަކުން," ރައީސް ވިދާޅުވި އެވެ.
އެއަށްފަހު އެމަނިކުފާނު ވަނީ ފަހަތުން އަރައި އިންތިހާބު ކާމިޔާބު ކުރައްވާނެ ކަމަށް ވަރަށް ޖޯޝުގައި ވިދާޅުވެފަ އެވެ.
"ދެވަނަ ހާފުގައި ނުކުމެ އެވަރަށް ހަމަކޮށް އިތުރަށް ދެ ލަނޑު ޖަހައި ފަސް ލަނޑުން އިރާދުކުރެއްވިއްޔާ ކާމިޔާބުކުރާނީ,"
އެގޮތުން, އެ ނަތީޖާ ނެރުމަށް ބޭނުންވާ ބަދަލުތައް މިދިޔަ ދުވަސްތަކުގެ ތެރޭގައި ގެނެސްފައިވާނެ ކަމަށް ވެސް އެމަނިކުފާނު ވިދާޅުވި އެވެ.
"ހާފް ޓައިމްގައި އަޅުގަނޑުމެން ޗޭންޖިން ރޫމަށް ވަދެ ރާވާލައިފިން. ދެވަނަ ހާފު ކުޅޭނެ ގޮތް އިންތިޒާމު ކޮށްލައިފިން...ބައެއް މަގާމުތަކަށް ކުޅޭ މީހުން ބަދަލުވެސް ކޮށްލައިފިން. ބުންވަރު ހުރި މީހުން ކުރިއަށް ނެރެފިން," ކެމްޕޭނަށް ބަދަލުތަކެއް ގެނެސްފައިވާކަން ހާމަކުރައްވަމުން ރައީސް ވިދާޅުވި އެވެ.
"މިހާރު މި ދަނީ އެޓޭކް މޯޑްގަ. އިރާދު ކުރެއްވިއްޔާ ދެން ގޯލު ޖަހާނީ. ގޯލަކަށް ފަހު ގޯލެއް,"
އެންމެ އިސްކަމެ ދީގެން ކުރަން ޖެހޭ ކަމަކީ ވޯޓުލުމަށް ރީރެޖިސްޓްރީ ކުރުން ކަމަށާއި އަދި އެއަށްފަހު އެމްޑީޕީގެ ޓީމުތަކުން ގޭގެއަށް ޒިޔާރަތްކޮށް އެ ޕާޓީއަށް ވޯޓު ދޭން ޖެހޭ ސަބަބުތައް ބަޔާންކޮށްދިނުމަށް ރައީސް އެދިވަޑައިގަތެވެ.
