ރިޔާސީ އިންތިހާބުގެ ދެވަނަ ބުރަށް އެކުގައި މަސައްކަތްކުރަން ޕީޕީއެމް/ޕީއެންސީ އާ ކުރި މަޝްވަރާތައް ކުރިއަށް ނުގޮސް ހުއްޓިފައިވާ ކަމަށާއި އެހެން ނަމަވެސް އެމްޑީޕީއާ އެކު މަޝްވަރާތައް އަދިވެސް ކުރިއަށްދާ ކަމަށް ދަ ޑިމޮކްރެޓްސް އިން މިރޭ ބުނެފި އެވެ.
ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ލިބިވަޑައިގެންނެވީ ޕީއެންސީގެ ކެންޑިޑޭޓް ޑރ.މުހައްމަދު މުއިއްޒަށެވެ. ދެވަނަ އަށް އެންމެ ގިނަ ވޯޓު އެމްޑީޕީގެ ކެންޑިޑޭޓް، ރައީސް އިބްރާހީމް މުހައްމަދު ސޯލިހަށް ލިބިވަޑައިގެންނެވި އިރު ދަ ޑިމޮކްރެެޓްސްގެ ކެންޑިޑޭޓް އިލްޔާސް ލަބީބަށް ލިބިވަޑައިގެންނެވީ ތިން ވަަނަ އެވެ.
ހ.މައިޒާންދޮށުގޭ ގައި މިރޭ ބޭއްވި މީޑިއާ ބްރީފިންއެއްގައި ދަ ޑިމޮކްރެޓްސްގެ ވަގުތީ ޗެއާޕާސަން ހަސަން ލަތީފު ވިދާޅުވީ އެއްވެސް ކަމަކާ އެއްބަސްވެ، ސޮއިކޮށްގެން ކުރިއަށް ދާން ޕީޕީއެމުން އެއްބަސްނުވާ ކަމަށާއި އެހެންވެ، އެ މަޝްވަރާތައް މިހާރު ކުރިއަށް ނުދާ ކަމަށެވެ.
"އެހެންވީމާ އަޅުގަނޑުމެންނަށް ވަރަށް ދަތި އެއްޗެއްގައި ސޮއިނުކޮށް، ޕީޕީއެމްއާ އެކީ ޑިމޮކްރެޓުންނަށް މަސައްކަތެއް ކުރަން. އެނގިވަޑައިގަންނަވާނެ ސިޔާސީ ޕާޓީއެއް ޑިމޮކްރެޓްސް އަކީ ވެސް. ޕާޓީގައި އޮންނަން ޖެހޭނެ، ޕާޓީން އެއްބަސްވާ ކަންކަން [ލިއުމުން ފެންނަން]،" ހަސަން ވިދާޅުވި އެވެ.
ހަސަން ވިދާޅުވި ގޮތުގައި ޕީޕީއެމްއަށާއި އެމްޑީޕީއަށް ވެސް ވެސް ޑިމޮކްރެޓުން ހުށަހެޅި ހުށަހެޅުމަކީ ރާއްޖޭގައި ވެރިކަންކުރުމުގެ ނިޒާމު އަލުން ކަނޑައެޅުމާއި މެދު ފެންނަ ނުފެންނަ ވޯޓެއް ނެގުމުގެ ހުށަހެޅުމެވެ.
"އަޅުގަނޑުމެން މިހުށަހަޅާ ގޮތަކީ ސެޕްޓެމްބަރު 25 ގައި ، އެއީ ދެވަނަ ބުރުގެ ކުރިއަށް ނިޒާމީ ވޯޓެއް ނަގަން، އެއީ ފެންނަ ނުފެންނަ ވޯޓެއް ނަގަން،" ހަސަން ވިދާޅުވި އެވެ.
އޭނާ ވިދާޅުވީ އެ ހުށަހެޅުމަށް އެމްޑީޕީން އަދި ނޫނެކޭ ނުބުނާ ކަމަށާއި އެ މަޝްވަރާތައް އެމްޑީޕީއާ އެކު ކުރިއަށް އެބަދާ ކަމަށެވެ. އެހެން ނަމަވެސް އެއީ ދިގުލައިގެންދާ މަޝްވަރާތަަކެއްގެ ގޮތުގައި ޑިމޮކްރެޓުން ނުބާއްވާނެ ކަމަށް ވެސް އޭނާ ވިދާޅުވި އެވެ.
ވެރިކަން ކުރުމުގެ ނިޒާމު އަލުން ކަނޑައެޅުމުގެ ވާހަކަ މިހާރު ދައްކަނީ ހަަސަން ވިދާޅުވި ގޮތުގައި ރާއްޖެއަށް ރަނގަޅީ ބަރުލަމާނީ ނިޒާމުކަމަށް އެޕާޓީން އަބަދުވެސް ދައްކާ ހާލަތު މިވަގުތު ކުރިމަތިވެފައި އޮތީމަ އެވެ. ޑިމޮކްރެޓްސްގެ ލީޑަރު އަދި ރައްޔިތުންގެ މަޖިލީހުގެ ރައިސް މުހައްމަދު ނަޝީދު މީގެ ކުރިން ތަކުރާރުކޮށް ވިދާޅުވެފައިވާ ގޮތުގައި ރާއްޖެއަށް ރިޔާސީ ނިޒާމު ކަމުނުދާ މައިގަނޑު އެއް ސަބަބަކީ ރިޔާސީ އިންތިހާބުތަކުގައި އެއްވެސް ޕާޓީއަކަށް އެކަނި ވެރިކަމަށް އާދެވޭ ވަރަށް ވޯޓު ނުލިބޭކަމެވެ.
ދެވަނަ ބުރުގައި ޕާޓީތަކުން ކޯލިޝަން ހަދާ އިރު އެެއީ ރާއްޖޭގެ ގާނޫނު އަސާސީ ދަންނަ ކަމެއް ނޫންކަން އެމަނިކުފާނު ތަކުރާރުކޮށް ފާހަގަކުރައްވަ އެވެ.
ހަސަން ލަތީފު ތަކުރާރުކުރެއްވީ އެވާހަކަ އެވެ.
