ރިޔާސީ އިންތިހާބުގެ ދެވަނަ ބުރުގައި އެކުގައި މަސައްކަތް ކުރުމުގެ މަޝްވަރާތަކަށް، ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ސަން އައިލެންޑް ރިސޯޓަށް ވަޑައިގެން ދެ ދުވަސް ވަންދެން އުޅުއްވުމަށް ފަހު ރައީސް އިބްރާހިމް މުހައްމަދު ސޯލިހު، މިއަދު މާލެއަށް ވަޑައިގެންފި އެވެ.
ރިޔާސީ އިންތިހާބުގެ ފުރަތަމަ ބުރުގެ ވޯޓުލުން މިދިޔަ ހޮނިހިރު ދުވަހު ބޭއްވި އިރު، އިންތިހާބު ކާމިޔާބުކުރެއްވޭ އަދަދަށް އެއްވެސް ކެންޑިޑޭޓަކަށް ވޯޓެއް ލިބިވަޑައެއް ނުގަންނަވަ އެވެ. އެންމެ ގިނަ ވޯޓު ހޯއްދެވި ދެ ކެންޑިޑޭޓުން ވާދަކުރައްވާ ގޮތަށް ރިޔާސީ އިންތިހާބުގެ ދެވަނަ ބުރު ބާއްވާނީ މިމަހުގެ 30 ވަނަ ދުވަހު އެވެ.
ރައީސް މިއަދު މާލެއަށް އެނބުރި ވަޑައިގެންނެވި ނަމަވެސް ފޮރިން މިނިސްޓަރު އަބްދުﷲ ޝާހިދު އަދިވެސް ހުންނެވީ ސަންއައިލެންޑް ގަ އެވެ.
އެމްޑީޕީގެ ކެންޑިޑޭޓް، ރައީސް އިބްރާހީމް މުހައްމަދު ސޯލިހަށް ދެވަނަ ބުރަށް ވަޑައިގެންނެވުނީ ދެވަނަ އަށް އެންމެ ގިނަ ވޯޓު ލިބިވަޑައިގެންނެވި ކެންޑިޑޭޓުގެ ހައިސިއްޔަތުންނެވެ. ޖޭޕީގެ ލީޑަރު ގާސިމް އިބްރާހީމަށް މިފަހަރު ލިބިވަޑައިގެންނެވީ ނިސްބަތުން ވަރަށް މަދު އަދަދެއްގެ ވޯޓެވެ. އެހެން ނަމަވެސް އޭނާގެ ތާއީދު ހޯއްދެވުމަށް ޓަކައި މަޝްވަރާކުރައްވަން ރައީސް މިދިޔަ ބުދަ ދުވަހު ސަން އައިލެންޑަށް ވަޑައިގެންނެވި އެވެ.
އެ ރިސޯޓަށް ވަޑައިގެން ދެ ދުވަހު އުޅުއްވުމަށް ފަހު މިއަދު އެނބުރި ވަޑައިގެންނެވި އިރު، މަޝްވަރާތަކުގެ ނަތީޖާއާ ބެހޭ ގޮތުން ދެ ޕާޓީން ވެސް އަދި ރަސްމީކޮށް ވަކި އެއްޗެއް ނުބުނެ އެވެ.
