ކުރިން އެންގުމަކާ ނުލައި ވެރި ރަށް މާލޭގައި އެއްވުން މަނާ ކުރަން ކުރީގެ ރައީސް އަބްދުﷲ ޔާމީންގެ ސަރުކާރުގައި ގާނޫނަށް ގެނެސްފައި އޮތް އިސްލާހު އުވާލަން ހުށަހަޅާފައި އޮތް ބިލު ފާސް ކުރަން އިންސާނީ ހައްގުތަކާ ބެހޭ ކޮމިޝަނުން މިއަދު ގޮވާލައިފި އެވެ.
ހިއުމަން ރައިޓްސް ކޮމިޝަނުން މިއަދު ނެރުނު ބަޔާނެއްގައި ބުނެފައި ވަނީ ކުރިން އެންގުމަކާ ނުލައި، ހުއްދަ ހޯދުމެއް ނެތި އެއްވުން މަނާކޮށްފައި ވަނީ ގާނޫނު އަސާސީ އާއި މުއާހަދާތަކާ ހިލާފަށް ކަމަށެވެ.
"ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ހައްގު މިހާރު ހަނިކޮށްފައި ވަނީ އިސްވެ ހަވާލާދެވުނު ގާނޫނު އަސާސީގެ މާއްދާ އާއި [އައިސީސީޕީއާރުގެ] ޖެނެރަލް ކޮމެންޓު 37 އާ ތައާރަޒުވާ ގޮތަށް ކަމުގައި މި ކޮމިޝަނުން ފާހަގަ ކުރަން،" އެޗްއާރްސީއެމުން ބުނެފައިވެ އެވެ.
ކުރިން ހުއްދަ ހޯދުމަކާ ނުލައި އެއްވުން މަނާ ކުރާ މާއްދާ އުވާލުމުގެ ބިލު 2019 ވަނަ އަހަރު ރައްޔިތުންގެ މަޖިލީހަށް ހުށަހަޅުއްވާފައި ވަނީ ކާށިދޫ ދާއިރާގެ މެމްބަރު އަބްދުﷲ ޖާބިރެވެ.
ކޮމިޝަނުން ބުނީ އެއްވެ އުޅުމުގެ މިނިވަންކަން ދިނުމަށް ގާނޫނުތައް އަވަހަށް ރިވިއުކޮށް ގެންނަންޖެހޭ އިސްލާހުތައް އަވަހަށް ގެނައުމަށް އެ ކޮމިޝަނުން ގޮވާލާ ކަމަށެވެ. އަދި އެ އިސްލާހު އުވާލުމަށް ހުށަހަޅާފައިވާ ބިލު އަވަސް ކުރުމަށް އޯގަސްޓް 14، ގައި ރައްޔިތުންގެ މަޖިލީހުގައި އެ ކޮމިޝަނުން އެދިފައިވާނެ ކަމަށް ވެސް އެ ބަޔާނުގައި ބުނެފައިވެ އެވެ.
ކުރިން ހުއްދަ ހޯދުމަކާ ނުލައި މާލޭގެ ކާނިވާ ނޫން ސަރަހައްދަކަށް އެއްވުން މަނާ ކުރީ އޯގަސްޓް 17، 2016 ގައި ކުރީގެ ރައީސް އަބްދުﷲ ޔާމީނުގެ ވެރިކަމުގަ އެވެ. އެ އިސްލާހު އުވާލުމަކީ ރައީސް އިބްރާހިމް މުހައްމަދު ސޯލިހު 2018 ވަނަ އަހަރު ވެވަޑައިގަންނަވާފައިވާ ވައުދެކެވެ.
