މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)ގެ މުވައްޒަފުންނަށް މުސާރައިގެ 50 ޕަސެންޓު އަނެއްކާވެސް ޑޮލަރުން ދޭން ނިންމައިފި އެވެ.
ކޮވިޑު-19ގެ ކުރިންވެސް އެމްއޭސީއެލްއިން މުވައްޒަފުންނަށް މުސާރަ ދެމުންދިޔައީ 50 ޕަސެންޓު ޑޮލަރުންނެވެ. ނަމަވެސް ކޮވިޑާއެކު އެކަން ހުއްޓާލާފައި އޮތުމަށްފަހު މިހާރު ވަނީ އެކަން އަލުން އިއާދަކުރަން ނިންމާފަ އެވެ.
އެމްއޭސީއެލްގެ އޮފިޝަލަކު "އަދަދު" އަށް ވިދާޅުވިގޮތުގައި ކުންފުނީގެ މެނޭޖުމެންޓުން މި ގޮތައް ނިންމީ މިއަދު އެވެ. އަދި މި ބަދަލާއެކު މި މަހުން ފެށިގެން އެ ކުންފުނީގެ ހުރިހާ މުވައްޒަފުންނަށް މުސާރަ ދެމުންގެންދާނީ، މުވައްޒަފަށް ލިބޭ މުސާރައިގެ ދެބައިކުޅަ އެއްބައި ޑޮލަރުން ކަމަށް ވިދާޅުވި އެވެ.
ރާއްޖޭގެ މައި އެއާޕޯޓް، ވެލާނާ އިންޓަނޭޝަނަލް އެއާޕޯޓް އެމްއޭސީއެލް އަކީ ރާއްޖޭގެ އެންމެ ބޮޑު އެއް އެމްޕްލޯޔަރެވެ. ކުންފުނީގެ އެކި މަގާމުތަކުގައި ގާތްގަނަޑަކަށް 3،500 އަށް ވުރެ ގިނަ މުވައްޒަފުން ބުރަކޮށް މަސައްކަތް ކުރަމުން އަންނައިރު، އެ ކުންފުނިން އަބަދުވެސް އިސްކަން ދެނީ މުވައްޒަފުންގެ ވެލްފެއާ އާއި އިނާޔަތްތަކަށެވެ.
އެގޮތުން އެ ކުންފުންޏަަކީ މުވައްޒަފުންނަށް އެންމެ ބޮޑު ބޯނަސްއެއް ދޭ އެއް ކުންފުންޏެވެ. ފާއިތުވި ދެ އަހަރު އަހަރީ ބޯނަސްގެ ގޮތުގައި އެ ކުންފުނީގެ މުވައްޒަފުންނަށް 25،000ރ. ދީފައިވެ އެވެ.
