މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގައި ވޯޓުލާން ނުކުތް މީހުންގެ އަދަދު މަދުވި ވަރަށް މީގެ ކުރިން ބޭއްވި އެއްވެސް އިންތިހާބެއްްގައި މަދުވެފައި ނުވާ ކަމަށާއި ވޯޓްލާން ނުކުންނަ މީހުންގެ އަދަދު އިތުރުކުރަން މަސައްކަތް ކޮށްފި ނަމަ އެކަން ރަނގަޅުކުރެވޭނެ ކަމަށް ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
އެމްޑީޕީގެ ކެމްޕޭންޓީމްތަކާ އެކު މިރޭ ބޭއްވި ބައްދަލުވުމުގައި ރައީސް ވިދާޅުވީ މީގެ ކުރިން ބޭއްވި ކޮންމެ އިންތިހާބެއްގައި، ވޯޓުލުމުގެ ހައްގު އޮތް މީހުންގެ 87 ޕަސެންޓުން ފެށިގެން 90 ޕަސެންޓާ ހަމައަށް ވޯޓުލާފައިވާ ކަަމަށެވެ. މިފަހަރުގެ އިންތިހާބުގައި 80 ޕަސެންޓް މީހުން ވެސް ވޯޓުލާން ނުނިކުތް ކަން އެމަނިކުފާނު ފާހަގަކުރެއްވި އެވެ.
"މިއީ ދިވެހިރާއްޖޭގައި އިންތިހާބުތަކުގައި މީގެ ކުރިން ދިމާވެފައި ހުރި ގޮތެއް ނޫން. އަޅުގަނޑަށް ހަމަ ޔަގީން އަޅުގަނޑުމެންނަށް މަސައްކަތް ކުރެވިއްޖެއްޔާ މިއަށް ވުރެ ރަނގަޅު ޓާންއައުޓެއް ނެރެވޭނެ. ހިސާބުތައް ބަލާއިރުގައި މީގެ ތެރޭގައި އަޅުގަނޑުމެންގެ ޕްލެޖް، އަޅުގަނޑުމެންނަށް ތާއީދުކުރާ އެތައް ބައެއްގެ ވޯޓު ނުލެވި އެބަހުރި،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި ވޯޓުލާން މީހުންނަށް ނުނިކުމެވުނު ސަބަބު ދެނެގަންނަން ޖެހެ އެވެ. އެމީހުންނަށް ވޯޓުލާން ނުދެވުނީ ދަތުުރު ހަމަޖައްސައިނުދެވިގެންތޯ ނުވަތަ ގަޑިއަށް ފަރުވާކުޑަކުރެވިގެންތޯ ބަލަން ޖެހޭ ކަމަށް ވެސް އެމަނިކުފާނު ވިދާޅުވި އެވެ.
"މިގޮތުން ބަލައިގެން އެ ލިސްޓްތައް އެހެރީ ތައްޔާރުކުރެވިފައި. ކޮންމެ ފޮށްޓެއް ވަކިން މިހާރު އަޅުގަނޑުމެން ވާނެ ތައްޔާރުކޮށްފައި. އެއާ އެކީގައި ކުރިއަށް ވަޑައިގަންނަވަންވީ އަޅުގަނޑަށް ޔަގީން އިރާދަކުރެއްވިއްޔާ ބާކީ މިއޮތް 17 ދުވަހުގެ ތެރޭގައި މީތި މުޅިން އަނބުރާލާފައި އަޅުގަނޑުމެންނަށް ބޮޑު ތަފާތަކުން މި އިންތިހާބު ކާމިޔާބުކުރެވޭނެ،" ރައީސް ވިދާޅުވި އެވެ.
