ކުރިއަށް އޮތް ރިޔާސީ އިންތިހާބުގެ ދެވަނަ ބުރުގައި ކޯލިޝަން ހެދުމަށް ޖުމްހޫރީ ޕާޓީއާއެކު ރަސްމީ މަޝްވަރާ ކުރުމަށް ޕީޕީއެމް/ޕީއެންސީ ކޯލިޝަނުން އެ ޕާޓީގެ ލީޑަރު ގާސިމް އިބްރާހިމާ މިރޭ ބައްދަލުކުރާނެކަން ހާމަކޮށްފި އެވެ.
ރިޔާސީ އިންތިހާބުގެ ފުރަތަމަ ބުރުގައި ގާސިމަށް ލިބުނީ އެންމެ 5،460 ވޯޓެވެ. އެއީ ވޯޓް ލީ މީހުންގެ 2.47 ޕަސެންޓް ވޯޓެވެ. ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް 101،635 ވޯޓެވެ. އެއީ 46 ޕަސެންޓް ވޯޓެވެ.
ދެވަނަ ބުރު ކާމިޔާބު ކުރުމަށް ބޭނުންވާ ކެންޑިޑޭޓުންގެ ތާއިދު ހޯދުމަށް ކުރަމުންދާ މަސައްކަތްތަތަކުގެ ތެރެއިން ގާސިމްއާ ބައްދަލުކުރަން ދިޔަ ޕީޕީއެމްގެ ވަފުދުގެ އިސްކޮށް ހުންނެވީ ޑރ. މުއިއްޒުގެ ރަނިން މޭޓު އަދި ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފެވެ.
އޭނާގެ އިތުރުން ޕީޕީއެމްގެ ޕީޖީ ލީޑަރު އަހްމަދު ސަލީމް (ރެޑްވޭވް ސަލީމް) އާއި އެ ޕާޓީގެ ނައިބު ރައީސް އަހްމަދު ޝިޔާމް (ނައިފަރު ޝިޔާމް) އާއި މާވަށު ދާއިރާގެ މެމްބަރު އަހްމަދު ސައީދާއި މަހިބަދޫ ދާއިރާގެ މެމްބަރު އަހްމަދު ތޯރިގު އެ ވަފުދުގައި ހިމެނެ އެވެ.
މިއަދު މެންދުރުފަހު ޕީޕީއެމުން ވަނީ މޯލްޑިވްސް ނޭޝަނަލް ޕާޓީއާ އެކު ކޯލިޝަން އެއްބަސްވުމެއްގައި ސޮއިކޮށްފަ އެވެ. ދަނގެތި ދާއިރާގެ މެމްބަރު މުހައްމަދު ނާޒިމް ރިޔާސީ ކެންޑިޑޭޓެއްގެ ގޮތުގައި ނެރެގެން ރިޔާސީ އިންތިހާބުގެ ފުރަތަމަ ބުރުގައި ލިބުނީ 1907 ވޯޓެވެ. އެއީ ވޯޓު ލީ މީހުންގެ 0.8 ޕަސެންޓް ވޯޓެވެ.
ރިޔާސީ އިންތިހާބެއްގެ ފުރަތަމަ ބުރު ފަހަނައަޅައި ގާސިމަށް މިހާތަނަށް ދެވިފައިނުވާއިރު ދެވަނަ ބުރު މިހާތަނަށް ކާމިޔާބުކޮށްފައިވަނީ އޭނާ އާއި ޖޭޕީގެ ތާއިދުކުރި ކެންޑިޑޭޓުންނެވެ.
އެގޮތުން, 2008 ގައި ރައީސް މުހައްމަދު ނަޝީދު ވެރިކަމަށް އައީ ޖޭޕީ އޮތް ކޯލިޝަނެއްގެ ތެރެއިންނެވެ. އޭގެ ފަހުން 2013 ގައި ރައީސް އަބްދުالله ޔާމީނާއި ޕީޕީއެމް ވެސް ވެރިކަމަށް އައީ ޖޭޕީގެ ގިނަ އަދަދެއްގެ ވޯޓާ އެކު އެވެ. މިހާރުގެ ރައީސް އިބްރާހިމް މުހައްމަދު ސޯލިހު ވެސް ވެރިކަމަށް އައީ ގާސިމްގެ ތާއިދާ އެކު އެވެ.
