ރިޔާސީ އިންތިހާބުގެ ފުރަތަމަ ބުރުގައި ނާކާމިޔާބީއާ ކުރިމަތިލައްވަން ޖެހިވަޑައިގެންނެވި ސަބަބުތައް ދެނެގަނެވިފައިވާ ކަމަށާއި އެކަންކަން ރަނގަޅުކޮށް ދެ ވަނަ ބުރު ކާމިޔާބު ކުރުމަށް ކެމްޕޭނަށް ބަދަލުތަކެއް ގެންނަވާނެ ކަމަށް އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީގެ ގައުމީ މަޖިލީހުގެ މެމްބަރުންނާ މިއަދު މެންދުރު ރައީސް ވަނީ ބައްދަލުކުރައްވާފަ އެވެ. އެ ބައްދަލުވުމަށް ފަހު "އަދަދު" ނޫހަށް ދެއްވި އެކްސްކްލޫސިވް އިންޓަވިއުއެއްގައި ރައީސް ވަނީ އަލުން ކެމްޕޭން ފެށުމަށް މަޝްވަރާކޮށް ގޮތްތަކެއް ނިންމާފައިވާ ކަމަށް ވިދާޅުވެފަ އެވެ.
"ފުރަތަމަ ބުރުގައި ހުރި އިޝޫތައް [މައްސަލަތައް] ބަލާފައި އެ ހައްލު ކުރަން ޖެހޭ މަސައްކަތްތައް މިކުރީ. މެންދުރުފަހު އިތުރު ބައްދަލުވުންތައް ކުރިއަށްގޮސް އެއަށްފަހު ފުލްކޮށް އަޅުގަނޑުމެން ކުރިއަށްގެންދާނަން. ހެދިފައި ހުރި މިސްޓޭކްތަކާއި ރަނގަޅު ކުރަން ޖެހޭ ކަންކަން ވަރަށް ސާފުކޮށް އެނގޭ," ރައީސް ވިދާޅުވި އެވެ.
ދެވަނަ ބުރަކަށް ނުކުންނައިރު މިހާރު ވެސް އެއްވަނައިގައި އޮތް ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުއާ އެއްވަރުކުރަން ވެސް 15,000 އަށްވުރެ ގިނަ ވޯޓު ރައީސް ހޯއްދަވަން ޖެހެ އެވެ. ކޮށްފައި ހުރި މަސައްކަތްތަކުން ނަތީޖާ ރަނގަޅު ކުރެވޭނެ ކަމަށް ރައީސް ވިދާޅުވި އެވެ.
"އަޅުގަނޑުމެންނަށް މަސައްކަތްތައް ކުރެވިފައި ނެތީ, އޯގަނައިޒިންގައި ހުރި އިޝޫތަކެއް އެ އުޅެނީ. އެކަން ހައްލުކުރަން މި ވާހަކަ ދެއްކީ,"
ކެމްޕޭންގެ ތެރެއިން ހެދިފައިވާ ގޯސްތައް ދެނެގަނެވިފައިވާ ކަމަށް ވިދާޅުވެ އެމަނިކުފާނު ވަނީ އޭގެ ތެރެއިން އެއް ކަމަކީ ދާއިރާތައް ބެހުމުގައި މާ ބޮޑުކޮށް މީހުންނާ ހަވާލުކުުރުން ކަމަށް ފާހަގަކުރައްވާފަ އެވެ.
"އެކި އެކި މީހުންނާއި ވަކިވަކިން ރަށްތަކާއި އަތޮޅުތައް ހަވާލުކުރަނީ. އަަޅުގަނޑު ހިތުން ކެމްޕޭނެއްގައި މިހާތަނަށް ކުރެވޭނެ ވަރަށް މަސައްކަތް ކުރިން. އެކަމު ފަހުން ނިންމަން ހިފާލި ވަގުތު އެންމެ ފަހު ދެ ދުވަހު ބައެއް ކަންކަން ގޮސްފައި ހުރީ,"
ފުރަތަމަ ބުރުގައި ރައީސް ސޯލިހަށް ލިބިވަޑައިގަތީ 39 ޕަސެންޓު ވޯޓެވެ. އެއީ, 86،151 ވޯޓެވެ އެންމެ ގިނަ ވޯޓު ލިބުނީ އިދިކޮޅު ޕީއެންސީގެ ކެންޑިޑޭޓު ޑރ. މުހައްމަދު މުއިއްޒަށެވެ. އޭނާއަށް ވޯޓުލީ މީހުންގެ 101،613 ލިބުނުއިރު އެއީ 46 ޕަސެންޓެވެ.
އިންތިހާބުގެ ތިން ވަނަ ހޯއްދެވީ ދަ ޑިމޮކްރެޓްސްގެ ކެންޑިޑޭޓު އިލްޔާސް ލަބީބެވެ. އޭނާއަށް ލިބިވަޑައިގަތީ 15،528 ވޯޓެވެ. އެއީ ވޯޓުލީ އާބާދީގެ ހަތް ޕަސެންޓެވެ. އޭގެ އިތުރުން އުމަރު ނަސީރަށް 2.8 ޕަސެންޓު ވޯޓު އަދި ޖުމްހޫރީ ޕާޓީގެ ގާސިމް އިބްރާހިމަށް 2.4 ޕަސެންޓު ވޯޓު ލިބިވަޑައިގަތެވެ.
