ރިޔާސީ އިންތިހާބުގެ ފުރަތަމަ ބުރުގައި އިދާރީ އެކި މައްސަލަތަކާ ހުރެ އެމްޑީޕީއަށް ވޯޓު ދޭން ތިބި ގިނަ ބަޔަކު ވޯޓު ދޭން ނުނެރެވުމަކީ އެންމެ ބޮޑު އެއް މައްސަލަ ކަމަށާއި އެކަންކަން ރަނގަޅުކޮށް ދެވަނަ ބުރުގައި އެ މީހުން ނެރުމަށް އިތުރު މަސައްކަތްތައް ކުރައްވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
މިއަދު ހެދުނު ރާއްޖެ ޓީވީއަށް ދެއްވި ފޯނު އިންޓަވިއުއެއްގައި ރައީސް ވިދާޅުވީ، ފުރަތަމަ ބުރުގެ ކަންކަން ހިނގާފައިވަނީ އެމަނިކުފާނު އުންމީދުކުރި ގޮތާ ހިލާފަށް ކަމަށާއި ރަނގަޅުކުރަންޖެހޭ ބައިވަރު ކަންކަން ފާހަގަވެފައިވާ ކަމަށެވެ. އެންމެ ބޮޑަށް ފާހަގަކުރެއްވީ ވޯޓުލާން މީހުން ނުދިއުމުގެ މައްސަލަ އެވެ.
"އަޅުގަނޑުމެން ބެލިއިރުގައި ޓާން އައުޓް ދަށްވި މައްސަލަ އެންމެ ބޮޑަށް މި ފެންނަނީ، ހުރިހާ ދާއިރާއެއްގައި ވެސް އަޅުގަނޑުމެންނަށް ވޯޓުދޭން ނިންމައިގެން ތިބި މީހުންގެ ތެރެއިން ވަރަށް ގިނަ ބަޔަކު ވޯޓު ނުލާ އެބަތިބި، ނުނެރެވި، އިދާރީ ގޮތުން ނިންމަން ޖެހުނު ބައެއް ކަންތައްތައް ކުޑަކޮށް ފަރުވާކުޑަކުރެވިފަ ހުރީ"
މިއީ ހުރިހާ ދާއިރާއެއްގައިވެސް ކަން ހިނގި ގޮތް ކަމަށާއި ބައެއް ރަށްރަށުގައި ވޯޓުދޭން ނިންމައިގެން ތިބި 300 ނުވަތަ 400 މީހުން ވޯޓު ނުލެވިފަ އެބަހުރި ކަމަށާއި އެކަންކަން ހިނގި ގޮތް ބަލާ، އިދާރީ ކަންތައްތައް ރަނގަޅުކުރައްވާނެ ކަމަށް ރައީސް ވިދާޅުވި އެވެ.
މި އަހަރުގެ އިންތިހާބު ވެގެންގޮސްފައިވަނީ ރާއްޖޭގައި މިހާތަނަށް އެންމެ މަދުން މީހުން ނުކުމެ ވޯޓުލީ އިންތިހާބަށެވެ. އެގޮތުން, ހޮނިހިރު ދުވަހުގެ އިންތިހާބުގެ ފުރަތަމަ ބުރުގައި ވޯޓުލާފައިވަނީ ވޯޓުލެވޭ އާބާދީގެ 79 އިންސައްތަ އެވެ. ވޯޓުލެވޭ އާބާދީގެ 56،949 މީހުން ފުރަތަމަ ބުރުގައި ވޯޓު ނުލަ އެވެ.
ރައީސް ވަނީ މީގެ ކުރީގެ އިންތިހާބުތަކުގައި އެމްޑީޕީއިން މަސައްކަތް ކުރި ގޮތަށް ނުކުރެވި ހުރިތަން ފެނުނު ކަމަށާއި ދެވަނަ ބުރުގައި ހުރިހާ ދާއިރާތަކެއްގެ ކެމްޕޭން ޓީމުތަކުންވެސް ބަދަލުކުރަންޖެހޭ ކަމަށާއި، މިދިޔަ ދެ ދުވަހު މަޝްވަރާ ކުރެވުނީ އެކަންކަން ބަދަލުކުރާނެ ގޮތަކާ މެދު ކަމަށްވެސް ރައީސް ވިދާޅުވި އެވެ.
ވަކި ވަކި ފޮށިތަކުގެ ނަތީޖާތަކަށާއި ބޮޑެތި އާބާދީތަކަށް ބެލިޔަސް ގިނަ ބަޔަކު ވޯޓުލާން ނުނިކުންނަކަން ފާހަގަވެ އެވެ. ރައީސް ސޯލިހު ވިދާޅުވީ ނުނިކުންނަ 21 އިންސައްތައިގެ ތެރޭގައި ގިނައީ އެމަނިކުފާނަށް ވޯޓުލުމަށް ތިބި މީހުން ކަމަށް ދޭހަވާ ގޮތަށް ވާހަކަ ދެއްކެވިއިރު، އިދިކޮޅު ކެންޑިޑޭޓު ޕީއެންސީގެ ކެންޑިޑޭޓާ އަރާ ހަމަ ކުރުމަށް އެ 56،949 ގެ ތެރެއިން މަދުވެގެން 15،000 ވޯޓު ރައީސަށް ބޭނުންވާނެ އެވެ.
