މިއަދު ކުރިއަށް ގެންދިޔަ ރިޔާސީ އިންތިހާބުގެ ވޯޓުލުން މިހާރު ބަންދުކޮށް ފޮށިތައް ގުނަން ފެށިއިރު މިއީ 2008 ވަނަ އަހަރުގެ ފަހުން އެންމެ މަދުން މީހުން ވޯޓުލީ އިންތިހާބުކަން ހިސާބުތަކުން ދައްކައިފި އެވެ.
އިލެކްޝަންސް ކޮމިޝަނުގެ ސެކެޓްރީ ޖެނެރަލް ހަސަން ޒަކަރިއްޔާ "އަދަދު" އަށް ވިދާޅުވި ގޮތުގައި މިއަދު ވޯޓުލާން ނުކުތީ ގާތްގަނޑަކަށް 75 ޕަސެންޓު މީހުންނެވެ. މި އިންތިހާބުގައި ޖުމުލަ 282,395 މީހުންނަށް ވޯޓުލުމުގެ ހައްގު ލިބެ އެވެ.
އެންމެ ފުރަތަމަ 2008 ވަނަ އަހަރު ބޭއްވި މަލްޓި ޕާޓީ ރިޔާސީ އިންތިހާބުގައި 209،294 މީހުންނަށް ވޯޓުލުމުގެ ހައްގު ލިބިނުއިރު، ޖުމްލަ 86.5 ޕަސެންޓު މީހުން އެ އިންތިހާބުގައި ވޯޓުލި އެވެ.
އެއަށްފަހު 2013 ގައި ބޭއްވި ރިޔާސީ އިންތިހާބުގައި 218,619 މީހުންނަށް ވޯޓުލުމުގެ ހައްގު ލިބިނުއިރު ޖުމުލަ 91.4 ޕަސެންޓު މީހުން ވޯޓު ދިނެވެ.
މިއަދުގެ އިންތިހާބުގެ ކުރިން 2018 ވަނަ އަހަރު ބޭއްވި ރިޔާސީ އިންތިހާބުގައި 233,889 މީހުންނަށް ވޯޓުލުމުގެ ހައްގު ލިބިނުއިރު، 89.2 ޕަސެންޓު މީހުން އެފަހަރު ވޯޓުލި އެވެ.
ރިޔާސީ އިންތިހާބުގައި 570 އަށް ވުރެ ގިނަ ވޯޓު ފޮށި ބެހެއްޓިއިރު އެ ހުރިހާ ފޮއްޓެއް ވެސް ބަންދު ކުރުމަށްފަހު ގުނުމުގެ މަސައްކަތް މިވަގުތު ދަނީ ކުރަމުންނެވެ.
