މި ރިޔާސީ ކެމްޕެއިންގެ ތެރެއިން އެމަނިކުފާނުގެ ސަޕޯޓަރުންނާ އެކީ ނެގި ސެލްފީތަކުގެ އަދަދާ އެއްވަރަށް ވެސް ވާދަވެރިންނަށް ވޯޓު ނުލިބޭނެ ކަމަށް އެމްޑީޕީގެ ކެންޑިޑޭޓު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސް މިހެން ވިދާޅުވި ވާދަވެރިންނަށް ގޮންޖެއްސެވީ މާދަމާ އޮންނަ ރިޔާސީ އިންތިހާބުގެ ކެމްޕެއިން ނިންމާލުމުގެ ގޮތުން އުސްފަސްގަނޑުގައި ބޭއްވި އެމްޑީޕީ އާއި، އެ ޕާޓީއާ އިއްތިހާދުވެފައިވާ ޕާޓީތަކުގެ ބޮޑު އެއްވުމުގައި ސަޕޯޓަރުންނާ މުހާތަބުކުރައްވަމުންނެވެ.
"ސެލްފީގެ އަދަދުން އެކަނި ވެސް ބަލިވާނެ" ވަރަށް ޖޯށާއި ފޯރީގައި ހުންނަވާ ރައީސް ވިދާޅުވި އެވެ.
ރިޔާސީ ކެމްޕެއިނުގެ ތެރެއިން ރައީސް 170 ރަށަށް ވަޑައިގެންފަ އެވެ.
މި ރަށްރަށުން ފެނުނު މަންޒަރަށް ބިނާކޮށް ރައީސް ވިދާޅުވީ، އިންތިހާބު ފަސޭހައިން ކާމިޔާބު ކުރެވޭނެ ކަމުގެ ވަރަށް ބޮޑު ޔަގީންކަމެއް ލިބިފައިވާ ކަމަށެވެ. އަދި އެއް ބުރުން އިންތިހާބު ކާމިޔާބު ކުރެވޭނެ ކަމަށާއި ވާދަވެރިންނަށް އެއާ ގާތަށް ވެސް ވޯޓު ނުލިބޭނެ ކަމަށް ރައީސް ވިދާޅުވި އެވެ.
