މާދަމާ ބާއްވާ ރިޔާސީ އިންތިހާބުގެ ކެމްޕެއިން ނިންމުމަށް މާލޭ އުސް ފަސްގަނޑު ސަރަހައްދުގައި ބޭއްވި އެންމެ ފަހު ހަރަކާތުގައި ވެސް، އަނިޔާވެރިކަމަށް ފުރުސަތު ނުދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދު ހަވީރުގެ އިވެންޓުގައި ވާހަކަ ދައްކަވަމުން އިދިކޮޅު ކެންޑިޑޭޓް ޑރ. މުހައްމަދު މުއިއްޒަށް އިޝާރާތް ކުރައްވަމުން ރައީސް ވިދާޅުވީ، މުއިއްޒު ހޮވިއްޖެ ނަމަ ރާއްޖެ ދާނީ އަނބުރާ ބިރުވެރިކަމަކަށް ކަމަށެވެ.
"އަޅުގަނޑުމެންގެ އެކަކުވެސް ނޭދޭ އެ ބިރުވެރިކަމަށް އަނބުރާ ދާކަށް، ނަމަނަމަ، ނަމަނަމަ އެކަން ނުކުރައްވައްޗޭ،" ރައީސް ވިދާޅުވި އެވެ.
އޭގެ އިތުރުން އެ އިވެންޓުގައި ވާހަކަ ދައްކަވަމުން ރައީސް ވިދާޅުވީ އެމަނިކުފާނުގެ ކެމްޕެއިން "ނިންމަލަނީ މި ވެފައިވާ ވައުދުތައް ފުއްދައިދީފައިވާކަމުގެ ހިތްހަމަޖެހުމާއެކު" ކަމަށެވެ. އަދި ވިދާޅުވީ ވެއެތުވެދިޔައީ "ރާއްޖޭގެ މިނިވަންކަން ހިމާޔަތް ކުރުމަށް އެންމެ ބުރަ މަސައްކަތް ކުރި ފަސް އަހަރު" ކަމަށެވެ.
ގައުމިއްޔަތާ އިސްލާމް ދީނާއި ބަހާއި ތަރިކައާ ހިމާޔަރް ކުރުމަށް އެންމެ ގިނަ މަސައްކަތް ކުރެވުނީ މި ފަސް އަހަރު،" ރައީސް ވިދާޅުވި އެވެ.
ރައީސް ސޯލިހާއި ޑރ. މުއިއްޒުގެ އިތުރުން ވާދަ ކުރައްވާ ޖުމްހޫރީ ޕާޓީގެ ގާސިމް އިބްރާހިމާއި ދަ ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމް ވެސް މާލޭގައި ދަނީ ހަރަކާތްތައް ހިންގަމުންނެވެ.
އޭގެ އިތުރުން އަމިއްލަ ގޮތުން، ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫނާއި ކުރީގެ ހޯމް މިނިސްޓަރު އުމަރު ނަސީރާއި ޑިފެންސް މިނިސްޓްރީގެ ކުރީގެ ޑެޕިއުޓީ ހަސަން ޒަމީލް ވާދަ ކުރައްވަ އެވެ.
