ވެރިކަން ހިންގާ އެމްޑީޕީގެ ފަހި ދިރިއުޅުން, ވިޔަފާރި, ޓޫރިޒަމް އަދި އިޖުތިމާއީ ކުރިއެރުމުގެ ސިޔާސަތުތައް ހިމެނޭ "އުފާވެރި އައްޑޫ" މެނިފެސްޓޯ ނެރެފި އެވެ.
މިރޭ އައްޑޫ ސިޓީގައި ބާއްވާ "އުފާވެރި އައްޑޫ" ޖަލްސާގައި، ރައީސް އިބްރާހިމް މުހައްމަދު ސޯލިހު, ދެ ވަނަ ދައުރެއްގައި އައްޑޫ ސިޓީގެ ކުރިއެރުމަށް ކޮށްދެއްވާނެ ކަންކަން ވަނީ ހާމަކުރައްވާފަ އެވެ. އޭގެ ތެރޭގައި, ޒަމާނީ ވިޔަފާރީގެ ހަބަކަށް އައްޑޫ ހެދުމާއި އިންޓަގްރޭޓެޑް ޓޫރިޒަމް ޒޯނެއް ތަރައްގީ ކުރުން ވެސް ހިމެނެ އެވެ.
ރައްޔިތުންނަށް ފަހި ދިރިއުޅުން ކަށަވަރުކޮށްދޭ އިންފްރާންސްޓްރަކްޗާ:
- ބޯހިޔާވަހިކަމަށް ހައުސިން ޔުނިޓުތައް
- ގޯތީގައި ގެދޮރު އިމާރަތް ކުރުމުގެ ލުއި ފަސޭހަކަން
- އާރްޓީއެލް ނިޒާމާއެކު އައްޑޫ ސިޓީ ގުޅުވާލުން
ޒަމާނީ ވިޔަފާރީގެ ހަބަކަށް އައްޑޫ ހަދަން ސިނާއަތް:
- ހަބްތަކަށް އިންވެސްޓްމަންޓްތައް ގެންދިއުމަށް ބާރު އެޅުން
- ޕޯޓު ތަރައްގީކޮށް ޓެކްސް ފްރީ ޒޯނަކަށް ހެދުން
- އިގްތިސޯދީ ކުރިއެރުމާއި ވަޒީފާގެ ފުރުސަތުތައް
އިންޓަގްރޭޓެޑް ޓޫރިޒަމް ޒޯނެއް ތަރައްގީ ކުރުން:
- "ސަވާހިލި" ޓޫރިޒަމްއަށް ތަރައްގީ ކުރުން
- ޓޫރިޒަމަށް ވެލިއު އެޑްކުރާނެ އިތުރު ވަސީލަތްތައް
- ސްޕޯޓސް ޓޫރިޒަމަށް ފަހި މާހައުލެއް ގާއިމުކުރުން
އުފާވެރި އައްޑޫގެ އިޖުތިމާއީ ކުރިއެރުން:
- ކުޅިވަރަށް ބޭނުންވާ ވަސީލަތްތަކާއި އިންޑޯ ސްޕޯޓްސް ކޮމްޕްލެކްސް
- އައްޑޫ އިކުއިޓޯރިއަލް ހޮސްޕިޓަލްގެ ހިދުމަތްތައް ފުޅާކޮށް ފެންވަރު މަތިކުރުން
- ޑިސެބިލިޓީ މެނޭޖްމަންޓް އެންޑް ރިހެބިލިޓޭޝަން ސެންޓަރެއް
މިރޭ އައްޑޫ ސިޓީގައި ކުރިއަށްދާ ކެމްޕޭނު ޖަލްސާގައި ވާހަކަ ދައްކަވަމުން ރައީސް އިބްރާހިމް މުހައްމަދު ސޯލިހު ވިދާޅުވީ އައްޑޫ ސިޓީ ތަރައްގީ ކުރައްވަނީ ރާއްޖޭގެ އެއް މައި ހަބުގެ ގޮތުގައި ކަމަށެވެ. އަދި މިހާތަނަށް އައިއިރު ރާއްޖޭގެ އިގްތިސޯދު އޮތީ ވަކި ދިމާއަކަށް މަތިވެ, ދެކޮޅަށް ތިރިވެފައިވާކަން ފާހަގަކުރައްވާ އެމަނިކުފާނު ވިދާޅުވީ މަސައްކަތް ކުރައްވަނީ އެކަން ބަދަލުކުރުމަށް ކަމަށެވެ.
ރައީސް ވިދާޅުވި ގޮތުގައި 2018 ވަނަ އަހަރުގެ ކެމްޕޭނުގެ އެންމެ ފަހު ޖަލްސާގައި ވެސް ވާހަކަދައްކަން ޖެހުނީ އައްޑޫ ސިޓީގަ އެވެ. އަދި އެ ދުވަހު ވެސް އައްޑޫ ސިޓީގެ ރައްޔިތުން އެ ސިޓީކަން ކުރަންވީ ކަންތައްތަކުގެ މެނިފެސްޓޯ ހަވާލުކުރި ކަމަށާއި ތަންފީޒު ކުރެއްވީ އެ މެނިފެސްޓޯ ކަމަށެވެ.
"އެ ދުވަހު [2018ގެ ކެމްޕޭނުގައި] ވެސް އަޅުގަނޑު ދެންނެވިން, އައްޑޫ ސިޓީ ތަރައްގީ ކުރުމުގައި އަޅުގަނޑުމެން ތަންފީޒު ކުރާނީ ތިބޭފުޅުން މިއަދު އަޅުގަނޑާ ހަވާލުކުރި މެނިފެސްޓޯ އޭ. މިރޭ އަޅުގަނޑު އަނެއްކާވެސް ދަންނަވާނަން ދެންމެ އެ ފެނިގެން ދިޔަ މެނިފެސްޓޯއަކީ ކުރިއަށް އޮތް ފަސް އަހަރު ދުވަހު ތެރޭގައި އައްޑޫ ސިޓީއަށް ތަންފީޒު ކުރާނެ މެނިފެސްޓޯ ކަމުގައި،" ރައީސް ވިދާޅުވި އެވެ.
ރިޔާސީ އިންތިހާބަށް ކެމްޕޭން ކުރުމުގެ ވަގުތު މާދަމަ ހަވީރު 6:00 އަށް ހަމަވާއިރު, މިރޭ އައްޑޫ ސިޓީގައި ރައީސް ބޭއްވީ, ކެމްޕޭން ނިންމާލުމަށް ބާއްވާ ފަހު ޖަލްސާ އެވެ.
