އިގުތިސާދީ ގޮތުން ރާއްޖެ މީގެ ކުރިން އޮތީ ވަކި ދިމާލަކަށް އުސްކޮށް ކަަމަށާއި މިސަރުކާރުން އަންނަނީ އެކަން ބަދަލުކޮށް މުޅި ރާއްޖެއަށް އިގުތިސާދު ހަމަހަމަކުރަމުން ކަމަށް ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
އަންނަ ހޮނިހިރު ދުވަހު ބާއްވާ ރިޔާސީ އިންތިހާބަށް ކެމްޕެއިންކުރަން އެމްޑީޕީ އާއި ގުޅިފައިވާ ޕާޓީތަކުން މިރޭ އައްޑޫ ހިތަދޫގައި ބޭއްވި ބޮޑު ޖަލްސާގައި ރައީސް ވިދާޅުވީ އިގުތިސާދީ ކުރިއެރުން މުޅި ރާއްޖެއަށް ހަމަހަމަކޮށް ފަތުރައިލަން ހިންގާ މަަޝްރޫއުތައް މިހާރު ވެސް ކުރިއަށްދާ ކަމަށެވެ. ހަނިމާދޫ އެއާޕޯޓް ބޮޑުކުރަން ހިންގާ މަޝްރޫއު އާއި އައްޑޫގައި ހިންގަމުން އަންނަ މަޝްރޫއުތަކީ އޭގެ މިސާލުތައް ކަމަށް ވެސް އެމަނިކުފާނު ވިދާޅުވި އެވެ.
އެމްޑީޕީން ބޭއްވި އައްޑޫ ބޮޑު ޖަލްސާ. ފޮޓޯ:މިރާން ނާޝިމް/އަދަދު
"މިހައިތަނަށް އައި އިރުގައި ރާއްޖޭގެ އިގުތިސާދު އޮތީ ވަކި ދިމާއަކަށް އުފުލި، ދެކޮޅަށް ތިރިވެފައި. ހަގީގަތަކީ އެއީ. އުތުރުގައި އެހެން، ދެކުނުގައި ވެސް އެހެން، މެދަށް އެކަނި އުފުލިފައި. އަޅުގަނޑުމެން މިދަނީ އެކަން ހަމަހަމަ ކުރަމުން. އޭގެ މިސާލު މިހާރު އުތުރާއި ދެކުނުން ފެންނާނެ," ރައީސް ވިދާޅުވި އެވެ.
އެއާއެކު އެމަނިކުފާނު ދެއްވީ އުތުރާއި ދެކުނުގައި ކުރިއަށް ގެންދާ އަދި ގެންދަން ރާވާފައިވާ ތަރައްގީގެ މަޝްރޫއު ތަކުގެ ލިސްޓެކެވެ. މަޝްރޫއުތައް ހިންގާ އަދި ހިންގަން ރާވާފައިވާ ރަށްތަކުގެ ލިސްޓްގައި ހަނިމާދޫ، ކުޅުދުއްފުށި، ނ.މާފަރު، ލ.ކައްދޫ، ގއ. ވިލިނގިލި، ތިނަދޫ ސިޓީ އަދި އައްޑޫ ސިޓީ އެމަނިކުފާނު ހިމެނުއްވި އެވެ.
ރައީސް ސިފަކުރެއްވި ގޮތުގައި މިހާރު ހިންގާ މަޝްރޫއުތަކާ އެކު އައްޑުއަށް އެ އަންނަނީ މީން ޒަމާނަކު ނާންނަ ވަރުގެ ތަރައްގީ އެކެވެ.
"އަޅުގަނޑު ދެކޭ ގޮތުގައި އޭރުން، އަދި ކިރިޔާ މި ރާއްޖޭގެ އަސްލު ފައިދާ ރައްޔިތުންނަށް ލިބެން ފަށާނީ،" އެމަނިކުފާނު ވިދާޅުވި އެވެ.
ފަށާފައިވާ މަސައްކަތްތައް ނިންމާނީ ރާއްޖޭގެ ހުރިހާ ރައްޔިތުންނަށް އިންސާފުވެރިކަމާ އެކު ތަރައްގީ ގެނެސްފައި ކަމަށް ވެސް އެމަނިކުފާނު ވިދާޅުވި އެވެ.
