ދައުރު ނިމުމަށްފަހު ނާއިބު ރައީސުންނަށް ވެސް އިނާޔަތް ލިބޭ ގޮތަށް ގާނޫނު އިސްލާހު ކުރައްވާނެ ކަމުގައި ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
އަދަދު ނޫހުގެ "އެތެރެފުށް" ޕްރޮގްރާމްގައި ރައީސް މިއަދު ވިދާޅުވީ ރާއްޖޭގެ ނާއިބު ރައީސްކަން ކުރައްވާފައި ތިބޭ ބޭފުޅުންނަށް ލިބެންޖެހޭ ރައްކާތެރިކަމާއި އިނާޔަތް ލިބެންޖެހޭކަމަށް ގަބޫލުކުރައްވާ ކަމަށެވެ. އަދި ގަނޫނަށް ބަދަލު ގެނެސްގެން އެކަން ކުރެވެން އޮތް ކަން އެމަނިކުފާނު ފާހަގަކުރެއްވި އެވެ.
އެގޮތުން ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ އިނާޔަތާއި ރައްކާތެރިކަމުގެ ގާނޫނު އެކުލަވާލާފައި އޮތީ ވަކި މީހަކަށް ފައިދާކުރާނެ ގޮތަށް ކަމުގައި ރައީސް ވިދާޅުވި އެވެ.
"މިހާރު އެކުލަވާލާފަ މިއޮތް ގާނޫނު ގަ (ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ އިނާޔަތާއި ރައްކާތެރިކަމުގެ ގާނޫނު) އެކަން ވެސް ކުރެވިފަ އެ އޮތީ ވަކި މީހަކަށް އަމާޒުކޮށްގެން، ވަކި މީހަކަށް އެއްޗެއް ދޭން ވެގެން އެހެންވެ އޭރު އެބައި [ނާއިބު ރައީސުންނަށް އިނާޔަތް ދިނުން] ނައިސް އެ އޮތީ،" ރައީސް ސޯލިހު ފާހަގަކުރެއްވި އެވެ.
ރައީސް ވިދާޅުވީ އެ ގާނޫނު ފުރިހަމަކުރުމުގެ ގޮތުން އިތުރު އިސްލާހުތައް ހިމަނައި، އެ ގާނޫނު އިސްލާހުކުރަން ރައްޔިތުންގެ މަޖިލީހަށް ފޮނުވާފައިވާ ކަމަށެވެ.
މީގެ އިތުރުން ރައީސް ވިދާޅުވީ ވެރިކަމުގެ ފުރަތަމަ ކޮޅު އެ ގާނޫނު ތަސްދީގު ނުކުރެވުނީ ރައީސަކަށް އިނާޔަތް ލިބުމުގެ މުއްދަތާއި، ނާއިބު ރައީސަށް އިނާޔަތް ދޭ މުއްދަތުގައި ހުރި ތަފާތުގެ ސަބަބުން ކަމަށެވެ.
"އަޅުގަނޑަށް އޭރު އެ [ނާއިބު ރައީސުންނަށް އިނާޔަތް ދޭ ގާނޫނު] ތަސްދީގުނުކުރެވުނީ، ރައީސަކަށް އިނާޔަތް ދޭ ގާނޫނޫގަ އޮންނާނެ ދައުރެއް ނިންމިކަމަށް ބަލާނީ ތިން އަހަރު ވެރިކަމުގަ ހުރީމައޭ. އެކަމަކު ފަހުން އައި ނާއިބު ރައީސަށް އިނާޔަތް ދޭ ގާނޫނުގަ އޮތީ އެންމެ ދުވަހަކު [ވެރިކަމުގަ] ހުއްޓަސް އިނާޔަތްތައް ލިބެން ޖެހޭ ގޮތަށް،" ރައީސް ސޯލިހު ވިދާޅުވި އެވެ
އަދި ރައީސަށް އިނާޔަތް ދޭ އުސޫލުން ނާއިބު ރައީސަށް ވެސް ދޭންޖެހޭކަން ފާހަގަކުރައްވައި، އެ ބަދަލު ދެވަނަ ދައުރެއްގައި ގެންނަވާނެ ކަމަށް ރައީސް ސޯލިހު ވިދާޅުވި އެވެ.
ނައިބު ރައީސުންނަށް އިނާޔަތް ދޭން މަޖިލީހަށް ކުރިން ހުށަހެޅި ބިލުގައިވާ ގޮތުން ނައިބު ރައީސުންނަށް ދައުލަތުން ކޮންމެ މަހަކު 35،000 ރުފިޔާގެ އިނާޔަތެއް ދޭން ޖެހެ އެވެ. އަދި ސަލާމަތީ ހިދުމަތްތަކުން އެ ފަރާތްތަކަށް ރައްކާތެރިކަން ދޭން ޖެހެ އެވެ.
އެ ބިލު މަޖިލީހުން ފާސްވި ނަމަވެސް، ރައީސް ސޯލިހު ބިލު ތަސްދީގު ނުކޮށް އަނބުރާ މަޖިލީހަށް ފޮނުވި އެވެ. އަދި ޖޫން 12، 2019 ގައި، ނައިބު ރައީސްކަން ކުރައްވާފައިވާ ބޭފުޅުންނަށް އިނާޔަތާއި ރައްކާތެރިކަން ދިނުމުގެ ބިލް ވަނީ ވޯޓުގައި ބައިވެރިވެވަޑައިގެންނެވި 80 މެންބަރުންގެ ތެރެއިން 74 މެންބަރުންގެ އަގުލަބިއްޔަތުން މަޖިލީހުން ބޭރުކޮށްލައިފަ އެވެ. އޭރު އެގޮތަށް އަމަލުކުރީ އެ ބިލު ފަރުމާކުރެވިފައި އޮތްގޮތުންކަމަށް މެންބަރުން ބުންޏެވެ.
