ބަދަލެއް ގެންނަން ޖެހޭ ކަމަށް ގަބޫލުކޮށްގެން އެކަމަށް ބަަޔަކު ބުރަކޮށް މަސައްކަތްކުރާތަން ފެނިވަޑައިނުގަންނަވާ ކަމަށް ރައީސް އިބްރާހީމް ސޯލިހު މިއަދު ވިދާޅުވެއްޖެ އެވެ.
އަދަދު ނޫހުގެ "އެތެރެފުށް" ޕްރޮގްރާމްގައި ރައީސް މިއަދު ވިދާޅުވީ ކުރިން (2018 ވަނަ އަހަރުގެ ރިޔާސީ އިންތިހާބުގައި) ގާތްގަނޑަކަށް ހުރިހާ އެންމެން ކޯލިޝަނެއް ހަދައިގެން މަސައްކަތްކުރީ އޭރު އޮތް ނާމާންކަމުން ސަލާމަތްވާން ކަމަށެވެ. އޭރު އެއީ ކޮންމެހެން ކޮށްލަން ޖެހޭ ވަރަށް ބޮޑު މަސައްކަތެއް ކަމަށް މީހުން ދުށް ކަމަށް ވެސް އެމަނިކުފާނު ވިދާޅުވި އެވެ.
"މިފަހަރު އަޅުގަނޑުމެންނަކަށް އެ މަންޒަރެއް އެގޮތަކަށް ނުފެނޭ. އެއްގޮތަކީ އަޅުގަނޑުމެންނަށް މި ގެނެވުނު ސުލްހަ، އަމާންކަން. ޕީސްފުލްކޮށް މީހުންނަށް އުޅެވޭކަން މީހުންނަށް އިހުސާސް ކުރެވޭ. އެހެންވީމަ، ކޮންމެހެން އަދި ކެންޑިޑޭޓުންތަކެއް ރަށަށް އެރިޔަސް، އަޔަސް، ވަޑައިގަތަސް އެ ފޯރީގައި ނުކުންނަން ބޭނުން ނުވަނީހެން ހީވަނީ،" ރައީސް ވިދާޅުވި އެވެ.
އޭރު އޮތް ނާމާންކަން ކަމަށް އެމަނިކުފާނު އެ ވިދާޅުވީ ކުރީގެ ރައީސް އަބްދުﷲ ޔާމީނުގެ ވެރިކަމުގައި އޭރުގެ އިދިކޮޅު ފަރާތްތަކާ މެދު ސަރުކާރުން އަމަލުކުރަމުން ގެންދިޔަ ގޮތަށެވެ.
ރައީސް ޔާމީނަށް ފާޑުވިދާޅުވާ ގާތްގަނޑަކަށް ހުރިހާ ބޭފުޅުންނާ ދެކޮޅަށް އެކިއެކި ދައުވާތައް އުފުލައި ބޮޑެތި ހުކުމްތައް ކުރި އިރު، އޭރުގެ އިދިކޮޅު ފަރާތްތަކުން ތުހުމަތުކުރާ ގޮތުގައި އެގޮތަށް ހުކުމްތައް ކުރީ ޝަރުއީ ނިޒާމަށް ސަރުކާރުން ނުފޫޒު ފޯރުވައިގެންނެވެ.
ޔާމީނުގެ ވެރިކަމުގައި ޖަލުހުކުމް އައި ބޭފުޅުންގެ ތެރޭގައި ކުރީގެ ރައީސް އަދި އެމްޑީޕީގެ އޭރުގެ ރައީސް މުހައްމަދު ނަޝީދާއި އަދާލަތު ޕާޓީގެ ރައީސް އިމްރާން އަބްދުﷲ އާއި ޖުމްހޫރީ ޕާޓީގެ ލީޑަރު ގާސިމް އިބްރާހީމް ހިމެނެ އެވެ.
ޔާމީނުގެ ވެރިކަމުގެ ވަކި ހިސާބަކުން އެމަނިކުފާނަށް ތާއީދުކުރުން ހުއްޓަވައިލައްވައި އިދިކޮޅު ފަރާތްތަކާ އެކު މަސައްކަތް ކުރައްވަން ފެށްޓެވުމުން އެއްބަފާ ބޭބޭފުޅު، ކުރީގެ ރަައީސް މައުމޫނު އަބްދުލް ގައްޔޫމު ވެސް ޖަލަށް ލި އެވެ.
ރައްޔިތުންގެ މަޖިލީހުގައި ސަރުކާރަށް މެޖޯރިޓީ އޮއްވައި، 12 މެމްބަރަކު އިދިކޮޅު ވުމުން، ގާނޫނަށް ގެނައި ބަދަލަކާ އެކު އެ މެމްބަރުންގެ ގޮނޑި ގެއްލިއްޖެކަމަށް ކަނޑައަޅައި އެކަން ތަންފީޒުކުރަން މަޖިލީހަށް ސިފައިން ވެސް އޭރު ވެއްދި އެވެ.
ސިޔާސީ ލީޑަރުން މިނިވަންކުރަން ސުޕްރީމްކޯޓުން ނެރުނު އަމުރަކާ އެކު އެކޯޓުގެ ފުރާޅުން ޓިނު ނަގައިގެން އުއްތަމަފަނޑިޔާރާއި އެހެން ފަނޑިޔާރަކު ހައްުޔަރު ކުރުމަކީ ވެސް އޭރު ހިނގި ހަމަނުޖެހުމެކެވެ.
އެފަދަ ކަންކަމާ ގުޅިގެން އޭރު އިދިކޮޅު ފަރާތްތަކުން ކޯލިޝަން ހަދައި މަސައްކަތް ކުރާން ފެށީ 'ބަދަލަކަށް އެދި' އެވެ. ރައީސް ވިދާޅުވީ މި އިންތިހާބާ ހަމައަށް އައިއިރު މި ވެރިކަމާމެދު އެފަދަ ވިސްނުމެއް އާންމު ރައްޔިތުން ގެންގުޅޭ ތަނެއް ނުފެންނަ ކަމަށެވެ. އޭރުގެ ހާލަތު ތަޖުރިބާ ކުރެވުނު ކޮންމެ މީހަކަށްވެސް މިހާރު މިއޮތް އަމާންކަމުގެ މުހިންމުކަން އިހުސާސު ކުރެވޭނޭކަމަށް ރައީސްގެ ވާހަކަފުޅުގައި ވިދާޅުވި އެވެ.
