ހޮނިހިރު ދުވަހު ބާއްވާ ރިޔާސީ އިންތިހާބުގައި ވާދަކުރެއްވުމަށް އެމްޑީޕީގެ ރިޔާސީ ޓިކެޓު ރައީސް އިބްރާހިމް މުހައްމަދު ސޯލިހަށް ލިބިވަޑައިގަތީ މި އަހަރުގެ ޖެނުއަރީ 28 ގައި ބޭއްވި އެ ޕާޓީގެ ރިޔާސީ ޕްރައިމަރީ ބޮޑު ތަފާތަކުން ކާމިޔާބު ކުރައްވައިގެންނެވެ. އެއީ މީގެ ހަ މަސް ދުވަސް ކުރި އެވެ.
ރިޔާސީ އިންތިހާބަށް 72 ގަޑިއިރަށް ވެފައިވަނިކޮށް "އަދަދު" އިން ގެނެސްދޭ "އެތެރެފުށް" ޕްރޮގްރާމުގައި ރައީސް ވަނީ އެ ދުވަހުން ފެށިގެން މިހާތަނަށް އާންމު ރައްޔިތުންގެ ތެރެއިން ގާތްގަނޑަކަށް އަށެއްކަ ހާސް މީހުންނަށް ވަކިން ގުޅުއްވާ ވާހަކަދެއްކެވި ކަމަށް ވިދާޅުވެފަ އެވެ.
"އަޅުގަނޑު ޕާސަނަލީ ވަރަށް ގިނަ މީހުންނާ ވާހަކަދެއްކިއްޖެ، ގާތްގަނޑަކަށް ޖެނުއަރީ ފެބްރުއަރީއިން ފެށިގެން މިހާތަނަށް ހަތްހާސް، އަށްހާސް ވަރަކަށް މީހުންނާ ވަކިވަކިން ފޯނުން ވާހަކަދެއްކިއްޖެ، ވަކިވަކިން އެ ބޭފުޅުން ރާއްޖެއަށް ބޭނުންވާ ކަމަކީ ކޮބައިތޯ، ރާއްޖެ ދާންވީ ކޮން މިސްރާބަކަށްތޯ އަހާ ހެދިއްޖެ،" ރައީސް ވިދާޅުވި އެވެ.
ރައީސް ވިދާޅުވީ އެމްޑީޕީގެ މެނިފެސްޓޯ ވެސް ހެދީ އެގޮތަށް ކުރެވުނު މަސައްކަތުން ކަމަށެވެ. ހިސާބެއް ހަދާ ނަމަ އެއީ ގާތްގަނޑަކަށް ދުވާލަކު 38 ފޯނު ކޯލެވެ. އެއިން ކޯލަކަށް މަދުވެގެން ތިން މިނެޓު ހޭދަކުރެއްވި ނަމަވެސް ދެ ގަޑިއިރެއްހާ ވަގުތު ނަގާނެ އެވެ.
"ގުޅުއްވާފަ ރައީސޭ ވިދާޅުވީމަ ގަބޫލުކުރަންވެސް އުނދަގޫވި، ދައްތަ ކައިރީގަ އެހީ ހާލު ކިހިނެއްހޭ، މަސައްކަތެއް ކުރަންހޭ، ކަސްރަތުކޮށް ހެލިފެލިވެ، ދުޅަހެޔޮކޮށް އުޅެވޭތޯ ބެލުމަށް ރައީސް ވިދާޅުވި. ދެތިން މިނެޓު ކޯލުގައި ރައީސް ހުރި،" ރައީސްގެ ކޯލެއް ލިބުނު މީހަކު މި ނޫހާ ވާހަކަ ދައްކަމުން ބުންޏެވެ.
އެ ދައްތަ އަކީ ހަމަ މި މަހު އުމުރުން 65 އަހަރު ފުރުނު މީހެކެވެ.
ރައީސްގެ އެ 7،000 ކޯލުގެ ތެރޭގައި ހުރިހާ އުމުރެއްގެ، ދެ ޖިންސުގެ މީހުންނާއި ތަފާތު އުމުރުފުރައިގެ މީހުން ވެސް ހިމެނޭ ކަމަށް ކެމްޕޭނު ޓީމުން ބުނެ އެވެ.
ކޮންމެ ކޯލެއްގައި ވެސް ރައީސް ރައްޔިތު މީހާގެ ހާލު އޮޅުންފިލުވަ އެވެ. އެކަނިވެރި މައެއް ނަމަ އެލަވެންސް ލިބޭތޯ އައްސަވަ އެވެ. ދަރިންގެ ބައްޕަ ހަރަދުކުރޭތޯ، ނުކުރާ ނަމަ އެ ހޯދަން މަސައްކަތް ކުރޭތޯ ވެސް އައްސަވަ އެވެ. ޒުވާނަކު ނަމަ ވަޒީފާގެ ސުވާލާއި ތައުލީމީ ސުވާލުތައް ރައީސް ކުރެއްވި އެވެ.
އެމްޑީޕީގެ ކެމްޕޭނުން މައުލޫމާތު ދޭ ގޮތުގައި ރައީސްގެ 7،000 ކޯލުގެ ތެރެއިން މަދުން ނަމަވެސް ނުރުހުން ފާޅުކުރި ރައްޔިތުން ވެސް ހިމެނުނެވެ. އެ ފަރާތްތަކުގެ ބަސްތައް ވެސް ރައީސް ނޯޓުކުރެއްވީ ދެ ވަނަ ދައުރެއްގައި ރަނގަޅު ކުރެވޭނެ، މެނިފެސްޓޯގައި ހިމެނޭނެ ކަންކަމުގެ ގޮތުގައި ކަމަށް ރައީސްގެ ކެމްޕޭނު އޮފީހުން ބުންޏެވެ.
