ސިޔާސީ ގޮތުން ހިޔާލުތަފާތުވި ނަމަވެސް އަންނަ ހޮނިހިރު ދުވަހު ބާއްވާ ރިޔާސީ އިންތިހާބުގައި އެމަނިކުފާނަށް ވޯޓު ދެއްވުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިރޭ އެދިވަޑައިގަނެވި އެވެ.
ރިޔާސީ އިންތިހާބުގެ ކެމްޕެއިނަށް ރ. އަލިފުއްޓަށް ވަޑައިގެން ވާހަކަ ދައްކަވަމުން ރައީސް ވިދާޅުވީ އެމަނިކުފާނުގެ އަމާޒަކީ ރާއްޖެއަށް "ބޮޑު ހެޔޮ ބަދަލެއް" ގެނައުން ކަމަށާއި އެކަމުގައި ހުރިހާ ރައްޔިތުން ބައިވެރިވުމަކީ އެމަނިކުފާނުގެ އެދިވަޑައިގަތުމެއް ކަމަށެވެ.
"އަޅުގަނޑުގެ އިލްތިމާސަކީ ސިޔާސީ ހިޔާލު ތަފާތުވިޔަސް ރާއްޖޭގެ ތަރައްގީއަށް ކުރާ މަސައްކަތުގައި މިފަހަރު ހުރިހާ ބޭފުޅުން ބައިވެރިވެވަޑައިގެން އަޅުގަނޑަށް ވޯޓު ދެއްވަން،" ރައީސް ވިދާޅުވި އެވެ.
ރައީސް ވިދާޅުވީ ކުރީގެ ރައީސް އަބްދުﷲ ޔާމީންގެ ސަރުކާރުގައި ކުދި ރަށްތައް އޮތީ ބާކީކޮށްފައި ކަމަށެވެ. ނަމަވެސް އެމަނިކުފާނުގެ ޕޮލިސީއަކީ ހުރިހާ ރަށެއް ތަރައްގީ ކުރުން ކަމަށް ރައީސް އަނެއްކާ ވެސް ފާހަގަ ކުރެއްވި އެވެ.
"ކޮންމެ ރައްޔިތަކު އިހުސާސް ކުރަންޖެހުނީ ބިރުވެރިކަމާއި ނާމާންކަމާއި ހިތްދަތިކަން. އަދި ހާއްސަކޮށް ވަކިވަކިން މި އޮންނަ މިފަދަ ރަށްތަކުގެ ރައްޔިތުންނަށް އަޅަ ނުލައި އެކަހެރިކޮށް ދޫކޮށްލާފައި އޮތީ. އެބޭފުޅުންނަށް މުހިންމު ބަޔަކަށް މި ރަށްތަކުގައި ދިރިއުޅޭ ރައްޔިތުން ނުވި،" ރައީސް ވިދާޅުވި އެވެ.
ރައީސް ސޯލިހުގެ އިތުރުން އިންތިހާބުގައި ވާދަ ކުރައްވަނީ ޖުމްހޫރީ ޕާޓީގެ ގާސިމް އިބްރާހިމް އާއި ޑިމޮކްރެޓްސްގެ އިލްޔާސް ލަބީބާއި ޕީޕީއެމް/ޕީއެންސީގެ ޑރ. މުހައްމަދު މުއިއްޒާއި އެމްއެންޕީގެ މުހައްމަދު ނާޒިމެވެ. އޭގެ އިތުރުން އުމަރު ނަސީރާއި ފާރިސް މައުމޫނާއި ހަސަން ޒަމީލު އަމިއްލަ ގޮތުން ވާދަ ކުރައްވަ އެވެ.
