އަންނަ ސެޕްޓެމްބަރު 9, ގައި އޮންނަ ރިޔާސީ އިންތިހާބުގައި ވޯޓުލުމުގެ ހައްގު ލިބިގެންވާ މީހުންގެ ތެރެއިން 130,000 މީހުންގެ ވޯޓު ކަށަވަރު ކުރައްވާފައިވާ ކަމަށާއި އަދި އިންތިހާބު އެއްބުރުން ކާމިޔާބު ކުރައްވާނެ ކަމަށް އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ސަރުކާރުން ސިޔާސީ ހަލަބޮލިކަމުގެ ތެރެއަށް ނުވަދެ ވީ ވައުދުތައް ފުއްދަން މަސައްކަތް ކުރުމަކީ މިއަދު އެމްޑީޕީއަށް ތާއިދު އިތުރުވެފައިވާ އެއް ސަބަބު ކަމަށް ރ. އަނގޮޅިތީމުގައި ހުންނަވައި ރައީސް ވިދާޅުވި އެވެ. ސިޔާސީ ހަލަބޮލިކަމުގެ ތެރެއަށް ވަދެވުނު ނަމަ ތަރައްގީ މަޑުޖެހުނީސް ކަމަށް އެމަނިކުފާނު ވިދާޅުވި އެވެ.
"އަޅުގަނޑަށް ފެންނަ މަންޒަރަކީ ހުރިހާ ރަށަކުން ވެސް ކުރިން އޮތް ބިރުވެރިކަމާއި އަނިޔާގެ ތެރެއަށް ދާން ބޭނުން ނުވާކަން. ރަށްރަށުގެ ތަރައްގީއަށް ފަށާފައިވާ މަސައްކަތްތަކާ އެކު ކުރިއަށްދާން ތައްޔާރަށް ތިބިކަން," އެމަނިކުފާނުގެ ދަތުރުފުޅު ނިމޭއިރު ރާއްޖޭގެ އުތުރުގެ ހުރިހާ ރަށަކަށް ޒިޔާރަތް ކުރެއްވޭނެކަން ފާހަގަކުރައްވަމުން ރައީސް ވިދާޅުވި އެވެ.
ގައުމަށް އެންމެ ފައިދާ ހުރި ގޮތަކީ ތަފާތު ހިޔާލުގެ މީހުންނާއެކު ކުރިއަށް ދިޔުން ކަމަށާއި ކުރިއަށް އޮތް ތަނުގައި ވެސް މަސައްކަތް ބައްޓަން ވެފައި އޮންނާނީ އެގޮތަށް ކަމަށް ރައީސް ވިދާޅުވި އެވެ. އެގޮތުން, އަދާލަތު ޕާޓީ އާއި އެމްޑީއޭގެ ހިޔާލާއި މަޝްވަރާ އާއި ބައިވެރިވުން ދެން އަންނަ ސަރުކާރެއްގައި ވެސް އޮންނާނެ ކަމުގެ ޔަގީންކަން އެމަނިކުފާނު ދެއްވި އެވެ.
"ފުރިހަމަ ޔަގީންކަން އެބަ އޮތް މި އިންތިހާބު އެއްބުރުން ނެގޭނެ ކަމަށް. 90 ޕަސެންޓު މީހުން ވޯޓުލާނެ ކަމަށް ބެލިޔަސް މިއަދު ވެސް މިތިބީ 130,000 ވޯޓު ކަށަވަރު ކޮށްގެން. މިއަކީ އެއްވެސް ވާދަވެރިޔަކަށް ކުރިއަށް އޮތް ތަނުގައި އަރާ ހަމަ ކުރެވޭނެ އަދަދެއް ނޫން," ރައީސް ވިދާޅުވި އެވެ.
ފެނާއި ނަރުދަމާގެ ނިޒާމުތައް ނިންމައި ކަރަންޓުގެ ދަތިކަން ވެސް ހުރިހާ ރަށަކުން ފޮހެލެވެމުންދާ ކަމަށް ރައީސް ވިދާޅުވި އެވެ. އަދި އެއްވެސް ރައްޔިތަކު ތަފާތު ނުކޮށް ތަރައްގީގެ މަަޝްރޫއުތައް ކުރިއަށްގެންދާނެ ކަމަށާއި މައިގަނޑު ސިޔާސަތަކީ އުފާވެރި ދިރިއުޅުމެއް ރައްޔިތުންނަށް ހޯދައިިދިނުން ކަމަށް ރައީސް ވިދާޅުވި އެވެ.
އެގޮތުން, ފުދުންތެރިކަން އިތުރުކޮށް އިގްތިސާދު ފުޅާކުރާނެ ގިނަ ޕްލޭންތަކެއް ރާވާފައިވާ ކަމަަށް ރައީސް ވިދާޅުވި އެވެ. އަދި, އިންތިހާބުގައި ވާދަކުރާ ކެންޑިޑޭޓުންގެ ތެރެއިން ވެސް އެމަނިކުފާނުގެ މެނިފެސްޓޯއާ ވާދަކުރެވޭ ވަރުގެ މެނިފެސްޓޯއެއް ހުށަހަޅާފައިވާ އެއްވެސް ކެންޑިޑޭޓަކު ނެތް ކަމަށް ރައީސް ވިދާޅުވި އެވެ.
އަނގޮޅިތީމުގެ ވައުދު ލިސްޓު
- ނެރު އިރު މައްޗަށް ބަދަލުކޮށް ޓީޖެޓީއެއް ގާއިމުކުރުން
- މޫދަށް އެރޭ ސަރަހައްދެއް ތަރައްގީކުރުން
- ރަށުގެ ގިރާ ސަރަހައްދު ހިމާޔަތްކުރުން
- ބޮޑެތި ތިން މަގާއި ރިންގް ރޯޑެއް ތާރު އަޅައިގެން ހެދުން
- ކައުންސިލުގެ އޮފީސް އިމާރާތް އެޅުން
- ހޭންޑްބޯލް ކޯޓު އެޅުން
- ފުލުހުންގެ ހިދުމަތް ފެށުމަށް ޕޮލިސް ޕޯސްޓެއް އެޅުން
