އެގާރަ އަހަރުގެ ޖަލު ހުކުމެއް ތަންފީޒުކުރަމުން ގެންދަވާ ކުރީގެ ރައީސް އަބްދުﷲ ޔާމީން މިނިވަން ކުރުމަށް އެ މަނިކުފާނުގެ އަނބިކަނބަލުން ފާތުމަތު އިބްރާހިމްއާއެކު، ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިރޭ އަޑު އުފުލައިފި އެވެ.
ކާނިވާގައި ހުންނަ ޕީޕީއެމްގެ ޖަގަހައިގައި އޮތް ބައްދަލުވުމުގައި ބައިވެރިވެވަޑައިގަތުމަށް ފަހު ފާތުމަތު އިބްރާހިމް އެނބުރި ގެއަށް ވަޑައިގެންނެވި ވަގުތު ނަޝީދު ހުންނެވީ ޑިމޮކްރެޓްސްގެ ޖަގަހައިގަ އެވެ. އެހެންވެ، ފާތުމަތު އިބްރާހިމް ވަޑައިގެންނެވި ވަގުތުން މަގުމަތިން ސަލާމް ކުރައްވައި ވާހަކަ ދެއްކެވި އެވެ.
އެވަގުތު އެ ސަރަހައްދުގައި އޮތް ދެ ޕާޓީގެ ސަޕޯޓަރުން ވެސް ޔާމީން މިނިވަން ކުރަން އަޑުއުފުލަމުން ދިޔައިރު ނަޝީދު ވެސް ޔާމީން މިނިވަން ކުރަން ގޮވާލެއްވި އެވެ.
ޔާމީން ޖަލަށް ހުކުމްކޮށްފައި ވަނީ އެމްއެމްޕީއާރުސީން ދޫކުރި ވ. އާރަށް ކުއްޔަށް ދިނުމުގެ މުއާމަލާތުގައި ހިޔާނާތާއި މަނީލޯންޑަކުރި ކަމުގެ ކުށް ސާބިތުވެގެންނެވެ. އެ ހުކުމް ހައިކޯޓުގައި ވަނީ އިސްތިއުނާފުކޮށްފަ އެވެ.
ޕީޕީއެމްގެ ކެންޑިޑޭޓުގެ ގޮތުގައި ޔާމީނަށް ރިޔާސީ އިންތިހާބުގައި ވާދަ ނުކުރެއްވުނީ އެ މަނިކުފާނުގެ ކެންޑިޑެސީ ސައްހަ ނޫން ކަމަށް އިލެކްޝަން ކޮމިޝަނުން ނިންމި ނިންމުން ރަނގަޅު ކަމަށް ސުޕްރީމް ކޯޓުން ހުކުމް ކުރުމުންނެވެ.
ޔާމީންގެ ވެރިކަމުގައި ނަޝީދު 13 އަހަރަށް ޖަލަށްލި އެވެ. އެއަށް ފަހު ނަޝީދު ދާދި ފަހަކާ ޖެހެން ދެން ވެސް ޔާމީނަށް ދިޔައީ ވަރަށް ބޮޑަށް ފާޑުވިދާޅުވަމުންނެވެ.
