ރިޔާސީ އިންތިހާބަށް ދެން ބާކީ އޮތީ ފަސް ދުވަހެވެ. ރާއްޖޭގެ ތާރީހުގައި އެންމެ ގިނަ ކެންޑިޑޭޓުން ވާދަކުރާ މި އިންތިހާބުގެ ކެމްޕޭން އަންނަ ހުކުރު ދުވަހު އިރުއޮއްސި 6:00 އަށް ހަމަވާއިރު ހުރިހާ ކެންޑިޑޭޓުންވެސް ދަނީ ފަހު ފަސް ދުވަހަށް ވަރުގަދަ ހަރަކާތްތަކެއް ރާވަމުންނެވެ.
އެގޮތުން އާބާދީ ބޮޑެތި ސިޓީތަކަށް ބައެއް ކެންޑިޑޭޓުން ދަތުރުކުރައްވާއިރު ދެން ތިބި ކެންޑިޑޭޓުންގެ އެ ސިޓީތަކަށް ވަޑައިގަތުމުގެ ކުރިން ނުދެވި ހުރި އަތޮޅުތަކަށް ވަޑައިގަތުމަށް ވަނީ ދަތުރުތައް ރާއްވަވާފަ އެވެ.
ރިޔާސީ ކެމްޕޭނުގައި އެންމެ ގިނަ ރަށްރަށް މިހާތަނަށް ވަޑައިގެންފައިވަނީ އެމްޑީޕީގެ ކެންޑިޑޭޓު އިބްރާހިމް މުހައްމަދު ސޯލިހު އެވެ. އެމަނިކުފާނު މިހާތަނަށް 137 ރަށަކަށް ވަޑައިގެންފި އެވެ. ރައީސް އަށްފަހު ޖޭޕީގެ ކެންޑިޑޭޓު ގާސިމް އިބްރާހިމް، ޑިމޮކްރެޓުންގެ ކެންޑިޑޭޓު އިލްޔާސް ލަބީބު، އަދި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ވެސް ވަނީ ގިނަ އަތޮޅުތަކަށް ވަޑައިގެންފަ އެވެ.
ރައީސް އިބްރާހިމް މުހައްމަދު ސޯލިހު - އެމްޑީޕީ
އެމްޑީޕީ އާއި ގުޅިފައިވާ ޕާޓީތަކުގެ ރިޔާސީ ކެމްޕޭނުގައި ރައީސް ސޯލިހު މިއަދު ވަޑައިގަންނަވާނީ ހދ. އަތޮގެ ރަށްތަކަށެވެ. މި ދަތުރު މިއަދާއި މާދަމާ ކުރިއަށްދާއިރު ޖުމްލަ 13 ރަށަކަށް ވަޑައިގަންނަވާނެ އެވެ.
ސެޕްޓެމްބަރު 3
- ހދ. ނޮޅިވަރަންފަރު
- ހދ. ނޮޅިވަރަމު
- ހދ. ހިރިމަރަދޫ
- ހދ. ފިނޭ
- ހދ. ނެއްލައިދޫ
- ހދ. ނާވައިދޫ
- ހދ. މަކުނުދޫ
ސެޕްޓެމްބަރު 4
- ހދ. ކުމުންދޫ
- ހދ. ނޭކުރެންދޫ
- ހދ. ވައިކަރަދޫ
- ހދ. ކުރިނބި
- ކުޅުދުއްފުށި ސިޓީ
ހދ. އަތޮޅުގެ ދަތުރަށްފަހު ރައީސް ދެން ވަޑައިގަންނަވާނީ ރ. އަތޮޅުން މިހާތަނަށް ވަޑައިނުގެންނެވި ހުރި ރަށްތަކަށެވެ. ރައީސް ރ. އަތޮޅަށް ވަޑައިގަންނަވާނީ މާދަމާ އެވެ.
ސެޕްޓެމްބަރު 5
- ރ. މާކުރަތު
- ރ. އުނގޫފާރު
- ރ. ރަސްގެތީމު
- ރ. އަނގޮޅިތީމު
- ރ. ވާދޫ
- ރ. އަލިފުށި
މި ދަތުރުފުޅަށްފަހު ރައީސް މާލެ ވަޑައިގަންނަވާނީ މި މަހުގެ ފަސް ވަނަ ދުވަހުގެ ރޭ އެވެ. އެމްޑީޕީގެ ކެމްޕޭނު އޮފީހުން މައުލޫމާތު ދިން ގޮތުގައި ހަ ވަނަ ދުވަހު ރައީސް ހުންނަވާނީ މާލޭގަ އެވެ. އެއަށްފަހު އެމަނިކުފާނު ކެމްޕޭނުގެ ފަހު ދަތުރެއްގެ ގޮތުން މި މަހު ހަތް ވަނަ ދުވަހު ވަޑައިގަންނަވާނީ އައްޑޫ ސިޓީ އަށެވެ. އައްޑޫ ސިޓީ އަކީ މި އިންތިހާބުގައި ދެވަނަ އަށް ވޯޓުލެވޭ އާބާދީ އެންމެ ބޮޑު ސިޓީ އެވެ.
ޑރ. މުހައްމަދު މުއިއްޒު - ޕީއެންސީ
ޕީއެންސީގެ ކެންޑިޑޭޓު ޑރ. މުއިއްޒު މިހާރު ހުންނެވީ ތ. އަތޮޅުގަ އެވެ. ޕީޕީއެމް/ޕީއެންސީ ކެމްޕޭނުން މައުލޫމާތު ދޭ ގޮތުގައި މިއަދު ފެއްޓެވި މި ދަތުރުފުޅުގައި މުއިއްޒު ތ އަތޮޅު، ލ އަތޮޅު، އއ އަތޮޅު، އދ އަތޮޅު، ކ އަތޮޅުގެ ރަށްތަކަށާއި އައްޑޫ ސިޓީއަށް ވަޑައިގަންނަވާނެ އެވެ.
ސެޕްޓެމްބަރު 3
- ތ. ތިމަރަފުށި
- ތ. ވޭމަންޑޫ
- ތ. ހިރިލަންދޫ
- ތ. ވިލުފުށި
- ތ. ގުރައިދޫ
- ލ. މާވަށް
- ލ. ހިތަދޫ
- ލ. މާއެނބޫދޫ
- ލ. ފޮނަދޫ
- ލ. ގަން
ސެޕްޓެމްބަރު 4
- ލ. މާބައިދޫ
- ލ. އިސްދޫ
- އއ. ތޮއްޑޫ
- އއ. ރަސްދޫ
- އއ. މަތިވެރި
- އދ. މާމިގިލި
- އދ. މަހިބަދޫ
ސެޕްޓެމްބަރު 5
- ކ. ކާށިދޫ
- ކ. ގާފަރު
- ކ. ތުލުސްދޫ
- އައްޑޫ ސިޓީ
ރިޔާސީ ކެމްޕޭނުގައި މުއިއްޒު އައްޑޫ ސިޓީއަށް ވަޑައިގަތުމަށްފަހު ފަސްވަނަ ދުވަހުގެ ރޭ އެނބުރި މާލެ ވަޑައިގަތުމަށް ވަނީ ހަމަޖެހިފަ އެވެ. އެ ދުވަހަށް ފަހު ދަތުރުތަކާއި ޕްރޮގްރާމްތައް ހުރި ގޮތުގެ އިތުރު ތަފުސީލެއް ކެމްޕޭނު އޮފީހުން އަދި ދީފައެއް ނުވެ އެވެ.
ގާސިމް އިބްރާހިމް - ޖޭޕީ
ރިޔާސީ ކެމްޕޭނުގައި ޖޭޕީގެ ކެންޑިޑޭޓު މިއަދު ވަޑައިގަންނަވާނީ އައްޑޫ ސިޓީ އަށެވެ. އެއަށްފަހު މާދަމާ ފުވައްމުލަކު ސިޓީއަށް ވަޑައިގަންނަވާނެ ކަމަށް ޖޭޕީގެ ކެމްޕޭނުން ވަނީ ބުނެފަ އެވެ. އޭގެ ފަހުން ފަސް ވަނަ ދުވަހު ގއ، ގދ އަށް އަދި ހަ ވަނަ ދުވަހު ލ އަށް ގާސިމް ވަޑައިގަންނަވާނެ އެވެ.
އެއަށްފަހު މާލެ ވަޑައިގަތުމަށްފަހު ގާސިމް ކެމްޕޭނުގައި ވަޑައިގަންނަވަނީ ހއ. އަތޮޅަށެވެ. ގާސިމްގެ ރިޔާސީ ކެމްޕޭނުގެ ފަހު ދަތުރަކަށްވެގެންދާނީ މި ދަތުރެވެ.
އިލްޔާސް ލަބީބު - ޑިމޮކްރެޓްސް
ރިޔާސީ ކެމްޕޭނުގައި ޑިމޮކްރެޓުންގެ ކެންޑިޑޭޓު އިލްޔާސް ލަބީބު މާދަމާ ވަޑައިގަންނަވާނީ ބ. އަތޮޅަށެވެ. އެއަށްފަހު ފަސްވަނަ ދުވަހު ޅ. އަތޮޅަށް އަދި ހަ ވަނަ ދުވަހު ފުވައްމުލަކު ސިޓީ އަދި އައްޑޫ ސިޓީއަށް ވަޑައިގަތުމަށް ހަމަޖެހިފައިވާ ކަމަށް އެ ޕާޓީގެ ކެމްޕޭނުން ވަނީ ބުނެފަ އެވެ.
އިލްޔާސްގެ އިތުރުން ރަނިން މޭޓު ހުސެއިން އަމްރު އަދި ޕާޓީ ހިންގުމުގައި އިސްކޮށް އުޅުއްވާ ރައްޔިތުން މަޖިލީހުގެ ރައީސް މުހައްމަދު ނަޝީދުވެސް އެކި ރަށްރަށް ވަކިން ވަޑައިގެން ކެމްޕޭން ކުރައްވަމުން ގެންދަވަ އެވެ.
ރިޔާސީ ކެމްޕޭން ނިންމުން ހުކުރު ދުވަހު އޮންނައިރު، އެ ދުވަހު ހުރިހާ ކެންޑިޑޭޓުންވެސް މާލޭގައި ކެމްޕޭން ނިންމުމުގެ ހިނގާލުން ބާއްވާނެ ކަމަށް ބެލެވެ އެވެ.
