ރިޔާސީ ދެވަނަ ދައުރަކަށް އިންތިހާބުވެވަޑައިގެންފި ނަމަ އެދައުރަށް ފަހު ސިޔާސީ މަސައްކަތުން ރިޓަޔާކުރައްވާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރާއްޖެޓީވީގެ "ފަށާއިރު" ޕްރޮފްރާމުގައި ކުރި ސުވާލަކަށް ޖަވާބު ދެއްވަމުން ރައީސް ސޯލިހު ވިދާޅުވީ ސިޔާސީ މަސައްކަތުން ރިޓަޔާކުރެއްވުމަށް ފަހު ވެސް ރައްޔިތުންނަށް ހިދުމަތް ކުރެއްވުމުގައި ދުވަސްކޮޅަކު ހުންނަވަން ގަސްދުކުރައްވާ ކަމަށެވެ. އެހެން ނަމަވެސް ސިޔާސީ އެއްވެސް މަސައްކަތެއްގައި އެއްގޮތަކަށް ވެސް ނޫޅުއްވާނެ ކަަމަށް ވެސް އެމަނިކުފާނު ވިދާޅުވި އެވެ.
"އަޅުގަނޑު ސިޔާސީ މަސައްކަތުން ރިޓަޔާކުރާނީ. ސިޔާސީ އެއްވެސް މަސައްކަތެއް، މިދައުރަށް ފަހަކު [ދެވަނަ ދައުރަށް ފަހަކު] އަޅުގަނޑަކަށް ނޯންނާނެ. އެކަމަކު އަަޅުގަނޑަށް ރައްޔިތުންނަށް ކޮށްދެވޭނެ ބައެއް މަސައްކަތްތައް ހުންނާނެ، ވޮލަންޓިއާ [މަސައްކަތްތައް]،" ރައީސް ސޯލިހު ވިދާޅުވި އެވެ.
ރައީސް ވިދާޅުވި ގޮތުގައި އެމަނިކުފާނުގެ ސިޔާސީ ކެެރިއަރު އެ ހިސާބުން ނިންމަވައިލައްވާނެ އެވެ.
ރައީސް ކަމަށް ވަޑައިގެންނެވުމުގެ ކުރިން އެމަނިކުފާނު ވަނީ ރައްޔިތުންގެ މަޖިލީހުގައި ފަސް ދައުރެއްގައި މަސައްކަތްކުރައްވައިފަ އެވެ. އެއީ ޅ.އަތޮޅުގެ މެމްބަރުގެ ގޮތުގަޔާއި އުފަންރަށް ހިންނަވަރު ތަމްސީލުކުރާ ހިންނަވަރު ދާއިރާގެ މެމްބަރުގެ ގޮތުގަ އެވެ. ރިޔާސީ މިދައުރު ނިމޭ އިރު ސިޔާސީ މަސައްކަތުގައި އެމަނިކުފާނު އުޅުއްވާތާ 30 އަހަރު ވާނެ އެވެ.
ރިޔާސީ ދެވަނަ ދައުރަކަށް ފަހު މަސައްކަތްކުރައްވާނެ ގޮތާ ބެހޭ ގޮތުން ސުވާލުކުރި ނަމަވެސް މިދައުރަށް އިންތިހާބުވެވަޑައިނުގެންފި ނަމަ މަސައްކަތްކުރައްވާނެ ގޮތަކާ ބެހޭ ގޮތުން ރާއްޖެ ޓީވީގެ ޕްރޮގްރާމްގައި ސުވާލެއް ނުކުރެ އެވެ.
އެމަނިކުފާނުގެ ސިޔާސީ މަސައްކަތްޕުޅާއި ޒާތީ ދިރިއުޅުއްވުމާ ބެހޭ ގިނަ ސުވާލުތަކެއް އެ ޕްރޮގްރާމްގައި ކުރި އެވެ.
"[ރައީސް ކަމަށް ވަޑައިގެންނެވުމުން] މިޒާޖަށް ބަދަލުތަކެއް އައިތޯ"، މިއީ އެ ގޮތުން ކުރި އެެއް ސުވާލެވެ.
އެ ސުވާލުގެ ޖަވާބުގައި ރައީސް ސޯލިހު ވިދާޅުވީ އައި ބަދަލަކީ އާއިލީ ދިރިއުޅުއްވުމަށް ކުރިން ދެއްވާ ވަރަށް ވަގުތު ނުދެއްވޭ ގޮތް ވުން ކަމަށެވެ.
"އަޅުގަނޑަށް ވަގުތު ނުދެވެނީ، އިނގޭތޯ، އަޅުގަނޑަކީ ވަރަށް ބޮޑަށް އާއިލާއާ އެކު، ހާއްސަކޮށް ދަރިންނާ އެކު ވަގުތު ހޭދަކުރާ މީހެއް ކުރީގައި،" ރައީސް ވިދާޅުވި އެވެ.
ރައީސްކަމަށް ވަޑައިގެންނެވުމުން ދިރިއުޅުއްވުމަށް އައި ބަދަލު އެމަނިކުފާނު ސިފަކުރެއްވީ "ހީނުކުރާ ވަރުގެ ބަންދެއް"ގެ ގޮތުގަ އެވެ.
ރައީސް ސިޔާސީ ހަޔާތް ފެއްޓެވީ ޅ. އަތޮޅުގެ މެމްބަރުގެ ގޮތުގަ އެވެ. ރައްޔިތުންގެ މަޖިލީހުގެ މެމްބަރުކަމުގައި ވިދިވިދިގެން ފަސް ދައުރު އެ މަނިކުފާނު ފުރިހަމަ ކުރެއްވެވި އެވެ. އަދި ހާއްސަ މަޖިލީހުގެ މެމްބަރުގެ ގޮތުގައި ހުންނެވި އެވެ. ފެހި ގާނޫނު އަސާސީ އެކުލަވާލި ކޮމިޓީގެ މެމްބަރެއްގެ ގޮތުގައި ވެސް ރައީސް ސޯލިހު ހުންނެވި އެވެ.
