ޖުމްހޫރީ ޕާޓީގެ ލީޑަރު ގާސިމް އިބްރާހިމް ހުންނެވީ ރިޔާސީ އިންތިހާބަށް ކުރިމަތިލައްވާ ގޮތަކަށް ނޫން ކަމަށާއި އެހެންނަމަވެސް ކައިރީގައި ތިބޭ ބޭފުޅުންނާ ހެދި މަޖުބޫރިވީ ކަމަށް ގާސިމް ވިދާޅުވި ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ރާއްޖެ ޓީވީގެ ޕްރޮގްރާމެއްގައި ވާހަކަ ދައްކަވަމުން ރައީސް ސޯލިހު ވިދާޅުވީ ގާސިމް ކުރިމަތިލައްވަނީ މަޖުބޫރީ ހާލަތެއްގައޭ އެމަނިކުފާނުގެ އަރިހުގައި ވިދާޅުވި ކަމަށެވެ.
"ކައިރީގައި ތިއްބެވި ގާސިމަށް ލަފާ އަރުވާ ބޭފުޅުންގެ ވިސްނުން އެއާ ތަފާތު ކަމަށް ވިދާޅުވި. އެހެންވީމާ މަޖުބޫރީ ހާލަތެއްގައޭ ތިމަންނަ މި ކުރިމަތިލަނީ. އެއީ ގާސިމް ވިދާޅުވާ ވާހަކައަކީ،" ރައީސް ވިދާޅުވި އެވެ.
ރައީސް ވިދާޅުވީ ގާސިމްއާއެކީ އެގްރިމެންޓަކަށް ނާދެވުނީ އެއްވެސް ވަކި ކަމަކަށް އެއްބަސްނުވެވިގެން ނޫން ކަމަށެވެ.
"ގާސިމާއެކީ އެގްރީމަންޓަކަށް ނާދެވުނީ ވަކި ކަމަކާ އެއްބަސްނުވެވިގެން ކަމަށް އަޅުގަނޑަކަށް ނެތް ދެންނެވޭކަށެއް. އަޅުގަނޑުމެންގެ ސިޔާސަތުތައް ކުރިއަށްދާ ދޭތެރޭގައި ވެސް ހަމަ ހިތްހަމަޖެހޭ ކަމަށް އެބޭފުޅުން ވިދާޅުވޭ. އަދި ކުރިއަށް އޮތް ދައުރު މަސައްކަތް ކުރެވޭނީ އެމްޑީޕީއާއެކީގައި ކަމަށް ވެސް ގަބޫލު ކުރެވޭ. އެކަމަކު ކައިރީގައި ތިއްބެވި ބައެއް ބޭފުޅުން އެއާ އެއްގޮތް ނޫން ކަމަށް އަޅުގަނޑަށް ގަބޫލު ކުރެވުނީ،" ރައީސް ވިދާޅުވި އެވެ.
އޭގެ އިތުރުން، އެ ޕްރޮގްރާމުގައި ވާހަކަ ދައްކަވަމުން ރައީސް ވިދާޅުވީ މިއަދު ވޯޓެއް ނެގި ނަމަވެސް އެމަނިކުފާނަށް އެއްބުރުން ކާމިޔާބު ލިބޭނެ ކަމަށެވެ.
"މިއަދު ވޯޓު ނެގި ކަމުގައިވިޔަސް އެއްބުރުން ކާމިޔާބު ކުރެވޭތަން ނަމްބަރުން ފެނޭ. އިރާދަކުރެއްވިޔާ މިއަދު ވެސް މިތިބީ 130،000 ވޯޓު ޔަގީންކޮށްގެން،" ރައީސް ވިދާޅުވި އެވެ.
