ސެޕްޓެމްބަރު 9 ގައި ބާއްވާ ރިޔާސި އިންތިހާބުގެ ޕްރައިމަރީގައި ޕީއެންސީން ވާދަ ކުރައްވާ ޑރ. މުހައްމަދު މުއިއްޒު ހިމެނިވަޑައިގެންނެވި ކުރީގެ ރައީސް އަބްދުﷲ ޔާމީންގެ ވެރިކަމުގެ އަނިޔާ އާއި ބޭއިންސާފު ވާހަކަތައް އަމުނާލުމަށް ފަހު ރައީސް އިބްރާހިމް މުހައްމަދު ސޯލިހު ރޭ ދޫކޮށްލެއްވީ ސުވާލެކެވެ.
"ކާކުތޯ އެނބުރި ދެން އެ ދުވަސް ދެކެން ބޭނުންވާނީ،" ރިޔާސީ ދެ ވަނަ ދައުރެއް ހޯއްދަވަން ކެމްޕޭނު ކުރައްވަމުން ގެންދަވާ ރައީސް ސޯލިހަށް ތާއިދު ހޯދުމަށް ރޭ މާލޭ ކާނިވާ ސަރަހައްދުގައި ބޭއްވި ބޮޑު ޖަލްސާއަށް އެއްވެ ތިބި އެތައް ހާސް ބައެއްގެ ކުރިމަތީގައި އެ މަނިކުފާނު ވިދާޅުވި އެވެ.
އެ ވާހަކަ އެ މަނިކުފާނު ވިދާޅުވީ ބައެއް މިސާލު ދެއްކެވުމަށް ފަހު އެވެ. ހިޔާނާތާއި މަނީލޯންޑަކުރި ކަމުގެ ކުށް ޔާމީންގެ މައްސަލަ ސާބިތުވީ އެމްއެމްއެމްޕީއާރުސީން ދޫކުރި ރަށްތަކުގެ މުއާމަލާތްތަކުގައި ހިޔާނާތުގެ އަމަލާއި މަނީލޯންޑަކޮށްފައިވާތީ އެވެ. އެމްއެމްޕީއާރުސީގެ ހިޔާނާތުގެ މައްސަލަ ޔާމީންގެ ވެރިކަމުގައި، އޭރުގެ އޮޑިޓަ ޖެނެރަލް ނިޔާޒު އިބްރާހިމް ހުށަހެޅުއްވުމުން، މައްސަލަ ބެލުމުގެ ބަދަލުގައި މަގާމުން ބޭރުކޮށްލީ ނިޔާޒެވެ.
އޭގެ އިތުރުން ފެބްރުއަރީ 1، 2018 ގެ ހުކުމާ ގުޅިގެން، ސުޕްރީމް ކޯޓަށް ސިފައިން ވައްދައި އުއްތަމަ ފަނޑިޔާރު ހައްޔަރުކޮށް ޖަލަށް ލުމާއި، ޕްރޮސިކިއުޓާ ޖެނެރަލް މުހްތާޒު މުހްސިން ހައްޔަރުކޮށް ޖަލަށް ލުމާއި، އޭރުގެ ޕޮލިސް ކޮމިޝަނުން މަގާމުން ދުރުކުރި ހަނދާން ރައީސް ސޯލިހު އާ ކުރެއްވި އެވެ.
ރިޔާސީ އިންތިހާބު ބޯމަތިވެފައިވާއިރު 2003 އިން ފެށިގެން މިއަދާ ހަމައަށް ކަންކަން ހިނގާފައިވާ ގޮތަށް ވިސްނުމަށް ރައީސް އިލްތިމާސް ކުރެއްވި އެވެ.
"މިއަދަކު ރައްޔިތުންނެއް ބޭނުމެއް ނުވޭ ކުއްލި ނުރައްކަލުގެ ހާލަތު ދެ ދުވަހުން އެއް ދުވަހު ހިންގާފައި އޮންނަ ގައުމަކަށް މި ގައުމު ވާކަށެއް. ކައުންސިލްތައް ގަނޑުކޮށް ސަސްޕެންޑުކުރާ ގައުމަކަށް މި ގައުމު ދެނެއް ވާކަށް ބޭނުމެއް ނުވޭ. މުވައްސަސާތައް އަޅުވެތިކޮށް، ކޯޓުތަކުގެ ފުރާޅުން ޓިނު ނަގައި، ފަނޑިޔާރުން ބިންމަތި ކުރާތަން ދެކެން ރައްޔިތުން ބޭނުމެއް ނުވޭ. ޖުޑިޝަރީ އާއި ރައްޔިތުންގެ މަޖިލީހަކީ ގުޅަކުޅޭ ފަސްގަނޑަކަށް ހަދާކަން ރައްޔިތުން ބޭނުމެއް ނުވޭ،" ރައީސް ސޯލިހު ވިދާޅުވި އެވެ.
ރައީސް ޔާމީނުގެ ވެރިކަމުގައި އޮތީ ނާމާން ހާލަތެއް ކަމަށާއި މިހާރު މި ވަނީ އެކަން މާޒީއަށް ދޫކޮށްލާފައި ކަމަށާއި ދެން އެކަން ދެކޭކަށް ދިވެހި އެއްވެސް ރައްޔިތަކު ބޭނުން ނުވާނެ ކަމަށް އެ މަނިކުފާނު ވިދާޅުވި އެވެ.
މި ވޭތުވެދިޔަ ތަނުގައި ރައްޔިތުން އިންތިހާބުކޮށްފައި ވަނީ ކޯލިޝަން ސަރުކާރެއް ކަމަށާއި، ނަމަވެސް ވޭތުވެދިޔަ ކޯލިޝަންތައް ގިނަ ދުވަހެއް ނުވެ އުވާލާފައިވެ އެވެ.
"އެހެން ނަމަވެސް މި ފަސް އަހަރު އަޅުގަނޑުމެން މި ހޭދަކުރަނީ ރައްޔިތުން އަޅުގަނޑާ އެ ހަވާލުކުރި އަމާނާތް އެގޮތުގައި. އިރާދަ ކުރެއްވިއްޔާ ކުރިއަށް އޮތް ތަނުގައި ވެސް އަޅުގަނޑު މަސައްކަތް ކުރަމުން ގެންދާނީ އެގޮތުގައި،" ރައީސް މިހެން ވިދާޅުވުމާއެކު އެއްވެފައި ތިބި އެންމެންގެ ތަރުހީބު ގުގުމައިގެން ދިޔަ އެވެ.
މީގެން ދުވަހަކު ވެސް ރާއްޖެ އަށް ގެނެވިފައި ނުވާ ތަރައްގީ ވޭތުވެދިޔަ ފަސް އަހަރު ދުވަހުގެ ތެރޭގައި ގެނެސްދެވިފައިވާ ކަމަށް އެތައް ބަޔަކު ބުނަމުންދާ ކަމަށާއި، އެއީ ތެދެއް ކަމަށް އެ މަނިކުފާނު ވެސް ވިދާޅުވި އެވެ. އެ ބަދަލުގެ ތެރެއިން ރައީސް ވިދާޅުވީ ދެ މިސާލެކެވެ. އެއީ ހިލޭ ޑިގްރީ ޕްރޮގްރާމާއި ހުރިހާ ރަށެއްގައި ގާއިމުކުރާ ފެނާއި ނަރުދަމާ އެވެ.
ރައްޔިތުން ބޭނުންވާ ކަންކަން އެނގިވަޑައިގަންނަވާ ކަމަށައި އެކަންކަން ތަޖުރިބާ ކުރައްވާފައިވާ ކަަމަށެވެ. އެ ވިދާޅުވީ ރައީސް ސޯލިހުގެ ރަށްފުށުގެ ދިރިއުޅުމުގެ ވާހަކަ އެވެ
ރޭގެ ޖަލްސާގެ ބައިވެރިން
ވަޅުކޮނެގެން ބޯފެން ހޯދަން ރައްޔިތުން އުފުލި ތަކުލީފު ތަޖުރިބާ ކުރެއްވިފައިވާ ކަމަށާއި ފެނާއި ނަރުދަމާ ރަށްރަށުގައި އަޅާއިރު އެއީ ބޭކާރު ކަމެއް ކަމަށް ދެކޭނީ އެކަންކަން ތަޖުރިބާ ނުކުރާ މީހުން ކަމަށް އެ މަނިކުފާނު ވި އެވެ.
"އަޅުގަނޑު މާލޭގައި އުޅޭތާ 50 އަހަރު މި ވަނީ. މި މާލޭގެ ރައްޔިތުންގެ ހާލަތު ވެސް އެންމެ ރަނގަޅަށް އެނގޭނެ އެކަކީ ވެސް އަޅުގަނޑު. މާލެއަށް ގެންނަންޖެހޭ ބަދަލު ވެސް އެނގޭނީ އަޅުގަނޑަށް އެންމެ ރަނގަޅަށް،" ރައީސް ސޯލިހު ވިދާޅުވި އެވެ.
"ބޯހިޔާވެހިކަމުގެ ދަތިކަން. ޓްރެފިކްގެ މައްސަލަ. ގޭންގުތަކުގެ މައްސަލަ. މިހުރީ ހައްލުކުރަން ޖެހިފައި ހުރި މައްސަލަ،"
ޓްރެފިކް މައްސަލަ ހައްލުކުރުމުގެ ޒިންމާ އޮތީ ސިޓީ ކައުންސިލަށް ކަމަށް ވިޔަސް، އެ މައްސަލަ ހައްލު ނުކޮށްދީ، ރަށްރަށާއި ފަޅު ވިއްކި ގޮތަށް މާލޭ މަގުމަތި ވަނީ ވިއްކާލާފައި ކަމަށް ރައީސް ސޯލިހު ވިދާޅުވި އެވެ. އެ މަނިކުފާނު އެ ވިދާޅުވީ ޕާކިން ޒޯންތައް ވިއްކި ވާހަކަ އެވެ.
މި އިންތިހާބު ކާމިޔާބު ކުރައްވާނެ ކަމަށް ވެސް ރައީސް ސޯލިހު ވިދާޅުވި އެވެ. ރަށްރަށުން ފެންނަނީ ހެޔޮ ބަދަލު ކަމަށާއި ސިޔާސީ ހަމަޖެހުމުގެ ފައިދާ ހުރިހާ ރަށަކުން ފެންނަމުންދާ ކަމަށާއި އަނިޔާވެރިކަމަށް ދާން ބޭނުން ނުވާ މަންޒަރު ފެންނަ ކަމަށް އެ މަނިކުފާނު ވިދާޅުވި އެވެ.
"ރައްޔިތުން ތިބީ ވަކި ގޮތަކަށް ނިންމައިގެން. އެއީ މިރޭ ތިބޭފުޅުން ވެސް ނިންމައިގެން ތިބި ގޮތް. އިރާދަ ކުރެއްވިއްޔާ އެމްޑީޕީ އާއި ގުޅިފައިވާ ޕާޓީތައް ނޫން ބައެއް. އެއްބުރުން ނޫން ބުރެއް މި ފަހަރަކު ނެތް،" ރައީސް ސޯލިހު ވިދާޅުވި އެވެ.
އިންތިހާބުގައި ރައީސް ސޯލިހާ އެންމެ ކައިރިން ވާދަ ކުރައްވާނެ ކެންޑިޑޭޓު ކަމުގައި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު ވިދާޅުވެފައި ވަނީ ޔާމީން ވެރިކަމުގައި ގާނޫނާ ހިލާފު އަދި އަނިޔާވެރި ވެރިކަމެއް ކުރައްވާފައި ނުވާ ކަމަށެވެ.
