އެމްޑީޕީ އުފެދިގެން އައީ ރައްޔިތުންނަށް ހިދުމަތް ކޮށްދޭން ކަމަށާއި އެ ފިކުރަށް އަދިވެސް ބަދަލެއް ނާންނަ ކަމަށް ވިދާޅުވެ އެމްޑީޕީއާއި ގުޅިފައިވާ ޕާޓީތަކުގެ ރަނިން މޭޓު، މުހައްމަދު އަސްލަމް ސަރުކާރުގެ ހިދުމަތްތައް އަދަދުތަކުން ކިޔައިދެއްވައިފި އެވެ.
މާލޭ ކާނިވާ ސަރަހައްދުގައި ރޭ ކުރިއަށްދާ ބޮޑު ޖަލްސާގައި ވާހަކަދައްކަވަމުން އަސްލަމް ވިދާޅުވީ އެމްޑީޕީ އުފެދިގެން އައީ މި ރާއްޖެ ބަދަލުކޮށް މި ރާއްޖެއަށް ހެޔޮ ގޮތް ހޯދައިދީ ދިވެހި ރައްޔިތުންނަށް އުފާވެރިކަމާއި އަމާންކަން ހޯދައިދޭން ކަމަށެވެ. އަދި މި ސަރުކާރުން ކޮށްދެމުން ގެންދަނީ އެ މަސައްކަތް ކަމަށް އޭނާ ވިދާޅުވި އެވެ.
އެމްޑީޕީގެ ފިކުރަށް ބަދަލެއް ނާންނަކަން ފާހަގަ ކުރައްވައި އަސްލަމް ވިދާޅުވީ ބަދަލުވެގެން ދުރުވެގެން ދިޔައީ ވަންހަނާވެފައިވާ ފިކުރެއް ކަމަށެވެ. އަދި އެއީ އެމްޑީޕީން ދަންނަ ފިކުރެއް ނޫން ކަމަށް ވެސް އަސްލަމް ވިދާޅުވި އެވެ.
އެއަށްފަހު އަސްލަމް ވަނީ ކެމްޕޭނުގައި ރާއްޖޭގެ އެކި ކަންކޮޅަށް ކުރި ދަތުރުތަކުގައި މި ސަރުކާރުން ހިންގާފައިވާ މަޝްރޫއުތަކާއި ކޮށްދީފައި ހުރި ކަންކަން ފެނި ސަރުކާރުގެ ހިދުމަތް އިހުސާސް ކުރެވުނުކަން ފާހަގަކުރައްވައި ވަކިވަކީން އަދަދުތަކުން އެ ވާހަކަތައް ހިއްސާ ކުރައްވައިފަ އެވެ.
"141 ރަށުގައި ފެނާއި ނަރުދަމާ ގާއިމު ކުރެވިއްޖެ، 135 ރަށުގައި އާ އިންޖީނުގެ އަޅައި ނުވަތަ އިންޖީނުގެ އަޕްގުރޭޑު ކުރެވިއްޖެ، 1578 ކުލާސް ރޫމް އެޅިއްޖެ، 85 މަލްޓި ޕާޕަސް ހޯލު އެޅިއްޖެ، 127 ރަށަށް އެމްބިއުލަންސް ފޯރުކޮށްދެވިއްޖެ، 41 ރަށުގައި ފުޓުބޯޅާ ދަނޑު އެޅިއްޖެ، 70 ރަށުގައި ފުޓުސެލް ދަނޑު އެޅިއްޖެ، 35 ރަށުގައި ވޮލީ ކޯޓު އެޅިއްޖެލ މިހެން ގޮސް މި ލިސްޓު ވެސް އިންތިހާއަށް ދިގު" އަސްލަމް ވިދާޅުވި އެވެ.
އޭނާ ވިދާޅުވީ އުމްރާނީ ތަރައްގީގައި ވެސް ރާއްޖެ މީގެ ކުރިން ދުވަހަކު ވެސް ނުދެކޭ ވަރުގެ ތަރައްގީ އެމްޑީޕީގެ މި ސަރުކާރުން ރައީސް ސޯލިހު ވަނީ ގެނެސްދީފައި ކަމަށެވެ. އަދި އެކަން ރައްޔިތުން ހެޔޮ ހިތުން ބަލައިގަނެފައިވާ ކަން ރާއްޖޭގެ އުތުރާއި ދެކުނުން ފެންނަ ކަމަށް އޭނާ ވިދާޅުވި އެވެ.
އަސްލަމްގެ ވާހަކައިގައި އޭނާ ވަނީ ކުރީގެ ރައީސް ނަޝީދުއަށް ވެސް ނުސީދާކޮށް ބަހުގެ ހަމަލާތަކެއް ރައްދު ކުރައްވައިފަ އެވެ. އެގޮތުން އޭނާ ވިދާޅުވީ ރާއްޖެއަށް ކުރިމަތިވެފައި އޮތް ތިމާވެށީގެ އެންމެ ބޮޑު މައްސަލައަކީ ކުނި މެނޭޖު ކުރުމުގެ މައްސަލަ ކަމަށާއި މީގެ ކުރީގެ ސަރުކާރުތަކުގައި "ބައެއް" ބޭބޭފުޅުން ތިމާވެށީގެ ވަރަށް ބޮޑެތި މީހުންނަށް ވެވަޑައިގެން އުޅުއްވި ކަމަށެވެ. ނަމަވެސް އެކަން ވެސް ހައްލު ކޮށްދެއްވާފައި ވަނީ މިސަރުކާރުގައި ކަމަށް އަސްލަމް ވިދާޅުވި އެވެ.
"އަޅުގަނޑުމެންނަކަށް ނުފެނޭ ރައީސް ސޯލިހު ކޯޓު ލައްވާފައި ކަނޑު އަޑީގައި ހުންނަވާ ތަނެއް، މިކަހަލަ މަންޒަރުތަކެއް ނޫން ފެންނަނީކީ، ފެންނަނީ މިއިން އެއްވެސް ވާހަކައެއް ނުދައްކައި މިއިން އެއްވެސް ފޮޓޯއެއް ނުނަންގަވައި ކަން ކުރައްވާތަން މި ފެންނަނީ، ތިމާވެށި ހިމާޔަތް ކޮށްދެއްވާ ތަން މި ފެންނަނީ،" އޭނާ ވިދާޅުވި އެވެ.
