މާލޭގެ މަގުތައް ޕާކިން ޒޯނުތަކުގެ ގޮތުގައި ވިއްކައިގެން ކެމްޕޭން ކުރުމުގެ ފުރުސަތު ނޯންނާނެ ކަމަށް ވިދާޅުވެ ޕީއެންސީގެ ރިޔާސީ ކެންޑިޑޭޓު އަދި މާލެ ސިޓީގެ މޭޔަރު ޑރ. މުހައްމަދު މުއިއްޒުއަށް ރައީސް އިބްރާހިމް މުހައްމަދު ސޯލިހުގެ ބަހުގެ ވަރުގަދަ ހަމަލާއެއް އަމާޒުކުރައްވައިފި އެވެ.
މިރޭ ކާނިވާ ސަރަހައްދުގައި އެތައް ހާސް ސަޕޯޓަރުންނާ އެކު ބޭއްވި ޖަލްްސާގައި ރައީސް ވަނީ އެ ސަރަހައްދުން ސިޓީ ކައުންސިލުން ވިއްކާފައިވާ ޕާކިން ސްލޮޓްތަކަށް އިޝާރާތް ކުރައްވައި އެކަންކަން އެމްޑީޕީގެ ދެެން އަންނަ ސަރުކާރެއްގައި ރަނގަޅު ކުރަން ޖެހޭ ކަމަށް ވިދާޅުވެފަ އެވެ. އެމަނިކުފާނު އެ ވިދާޅުވީ މުއިއްޒުގެ މޭޔަރު ކަމުގައި މާލޭގެ އެކި މަގުތަކުން ވިއްކާފައިވާ ޕާކިން ސްލޮޓްތަކަށެވެ.
"އަޅުގަނޑުމެންގެ ސިޔާސަތަކީ މަގުތައް ހުސްކޮށް ޕާކިންއަށް ވަކި ސަރަހައްދުތަކެއް ކަނޑައެޅުން. މިހެންނެއް މާލޭގެ މަގުތައް ވިއްކައިގެން ކެމްޕޭން ކުރުމުގެ ފުރުސަތެއް ނޯންނާނެ," އެތަނުން ވިއްކާފައިވާ ޕާކިން ސްލޮޓްތަކަށް އިޝާރާތް ކުރައްވަމުން ރައީސް ސޯލިހު ވިދާޅުވި އެވެ.
މިރޭގެ ޖަލްސާގެ ބައިވެރިން، "އިބޫ 2023" ޖަހާފައި ބޯޑުތައް ދައްކާލަނީ. -- ފޮޓޯ: އަބްދުﷲ އިޔާން/ އަދަދު
ޕާކިން އަށް ނަގާފައިވާ ގޮޅިތައް ނަގައި ފަސޭހައިން ހިނގޭނެ ތަނަކަށް މާލެ ހަދައިދޭނެ ކަމަށް ރައީސް ސޯލިހު ވައުދުވެވަޑައިގެންނެވި އެވެ.
"ކުރިއަށް އޮތް ތަނުގައި ވެސް އެކަކު ވެސް ބާކީނުކުރާނަން. އެންމެ ރަށެއް ވެސް ބާކީ ނުކުރާނަން. ތަފާތެއް ނުކުރާނަން. އެތައް ދަތި އުނދަގުލެއް ތެރެއިން އައިސް އަޅުގަނޑުމެން ހޯދަން މި އުޅެނީ އުފާވެރި އަމާން ރާއްޖެއެއް,"
ލޯންޗުގައި ބާރު ސްޕީޑުގައި ދުއްވާފައި ގޮސް ބަނދަރަށް ފައިބައި ކާރުގައި ތަންތަނަށް ދާ މީހުންނަށް ރައްޔިތުންގެ ހާލު ނޭނގޭނެ ކަމަށް ވިދާޅުވެ އެމަނިކުފާނުގެ ވާދަވެރިންނަށް ބަހުގެ ހޫނު ހަމަލާއެއް ދެއްވި އެވެ.
"ކަރަންޓު ނެތިގެން ފުޅި ބައްތި ދިއްލައިގެން ރައްޔިތުން އުޅޭ ހާލު ނޭނގޭނެ އެކަން ތަހައްމަލް ނުކުރާ ބަޔަކަށް. އެކަން އެންމެ ރަނގަޅަށް އެނގޭނީ އަޅުގަނޑުމެންނަށް. އެހެންވެ ރަށްރަށުގެ ކަރަންޓުގެ ހިދުމަތް އަޅުގަނޑުމެން ރަނގަޅު މިކޮށްދެނީ," ވަރަށް ޖޯޝުގައި ވާހަކަފުޅު ދައްކަވަމުން ރައީސް ވިދާޅުވި އެވެ.
