ސިނަމާލެ ބްރިޖަށް ދެ ލޭން އިތުރުކޮށް، ލައިޓް ރޭލް ތައާރަފު ކުރުމަށް އެމްޑީޕީގެ ރިޔާސީ ކެންޑިޑޭޓު ރައީސް އިބްރާހިމް މުހައްމަދު ސޯލިހުގެ "އުފާވެރި މާލެ" މެނިފެސްޓޯގައި ހިމަނައިފި އެވެ.
މިރޭ ލޯންޗުކުރި "އުފާވެރި މާލެ" މެނިފެސްޓޯގައި ތޮއްޖެހިފައިވާ މާލޭގެ މަގުތަކުގެ ކާރޫބާރޫ ކުޑަކުރުމަށް ސިޔާސަތުތަކާއި މަޝްރޫއުތަކެއް ހިމަނާފައިވެ އެވެ.
"ކާރޫބާރޫ ބޮޑު މަގުތަކުން މިންޖުވުން" ސުރުހީގެ ދަށުން ހިމަނާފައިވާ ސިޔާސަތުތަކުގެ ތެރޭގައި ބްރިޖަށް ދެ ލޭން އިތުރުކުރުމާއި ރޭލް ތައާރަފުކޮށް މުޅި މާލެ ސަރަހައްދަށް ރޭލްގެ ހިދުމަތް ފުޅާކުރުމަށް ހިމަނާފައިވެ އެވެ. އެއީ މާލެ، ހުޅުލެ، ހުޅުމާލެ، އަދި ވިލިމާލެ އާއި ގުޅިފަޅު، ތިލަފުށީ އަދި ގިރާވަރެވެ.
މާލެ ވެހިކަލްތަކުން ފުރިބާރުވަމުން ދާއިރު، އެމްޑީޕީން މިރޭ ތައާރަފުކުރި މެނިފެސްޓޯގައި އުޅަނދުތައް ލިމިޓުކުރަން ކަނޑައަޅާފައިވެ އެވެ. މި ބަދަލުގެ އިތުރުން އިނގާ މީހުންނަށް އިސްކަން ދީގެން ބައެއް މަގުތަކަށް ބަދަލު ގެނައުން ވެސް މެނިފެސްޓޯގައިވެ އެވެ.
ކާރޫބާރޫ ކުޑަކުރަން ހިމަނާފައިވާ އިތުރު ވައުދުތައް
- ގްރޭޓާ މާލެ މަގުތައް ތަރައްގީ ކުރުމުގެ ޕްރޮޖެކްޓް ކުރިއަށް ގެންދިއުން
- މާލެ ސަރަހައްދުގައި ވެހިކަލް ފޭސްއައުޓް ކުރުމަށް މާސްޓަ ޕްލޭނެއް ތައްޔާރުކުރުން
- ގްރޭޓާ މާލޭގައި ޒަމާނީ ޕަބްލިކް ޓްރާންސްޕޯޓް ސިސްޓަމެއް ތައާރަފުކުރުން
- ސްކޫލް ދަރިވަރުންނަށް ހާއްސަ ސްކޫލް ބަސް ތައާރަފު ކުރުން
- ދުވަސްވީ ވެހިކަލް މަދުކުރަން އުޅަނދުގެ ވެރިފަރާތް ކަށަވަރުކޮށް، ޕަބްލިކް ޓްރާންސްޕޯޓަށް ރިބޭޓް ނިޒާމެއް ގެނައުން
- ހަތަރު ފުރޮޅުލީ ވެހިކަލްތަކަށް ހާއްސަ ޕާކިން ފެސިލިޓީ، އަދި މޮޓޯ ވެހިކަލްތަކަށް ނެއިބާހުޑް ޕާކިން ތައާރަފުކޮށް މަގުމަތިން ޕާކިން ހުސްކޮށްލުން
- ޓްރެފިކް އެންފޯސްމަންޓް ޓެކްނޮލޮޖީ ބޭނުންކުރާ މިންވަރު އިތުރުކުރުން
ލާމަރުކަޒީ ގާނޫނު ބުނާ ގޮތުން އެ ސަރަހައްދެއްގެ ވެހިކަލް ކެޕް ކަނޑައެޅުމުގެ ބާރު އޮންނަނީ ކައުންސިލަށެވެ. މާލެ ސިޓީ ކައުންސިލަށް ވެހިކަލް ކެޕް ކަނޑަނޭޅި ލަސްވަމުންދާއިރު މާލޭގެ މޭޔަރު ޑރ. މުހައްމަދު މުއިއްޒު ވެސް ޕީއެންސީގެ ޓިކެޓުގައި މި ރިޔާސީ އިންތިހާބުގައި ވާދަކުރައްވަ އެވެ.
ސިނަމާލެ ބްރިޖަށް އިތުރު ދެ ލޭން ހަދަން މެނިފެސްޓޯގައި ހިމެނޭއިރު، މާލޭން ހުޅަނގަށް އޮތް ވިލިމާލެއާއި ގުޅީފަޅާއި ތިލަފުށި ގުޅުވައިދޭ ބްރިޖުގެ މަޝްރޫއު ކުރިއަށް އެބަ ދެ އެވެ. މި މަޝްރޫއަކީ އިންޑިއާ އެގްޒިމް ބޭންކުގެ 400 މިލިއަން ޑޮލަރުގެ ކްރެޑިޓް ފެސިލިޓީއާއި އިންޑިއާ ސަރުކާރުން ދިން 100 މިލިއަން ޑޮލަރުގެ ހިލޭ އެހީން ހިންގާ ޕްރޮޖެކްޓެކެވެ.
ތިލަފުށިން ހުޅަނގަށް އޮންނަ ގިރާވަރު ފަޅު ވެސް ހިއްކި އިރު ވަކި މަޝްރޫއެއް ގޮތަށް އެ ދެމެދު ވެސް ބްރިޖު އެލުމަށް ސަރުކާރުން ނިންމާފައިވެ އެވެ.
ދިގުމިނުގައި 1.39 ކިލޯމީޓަރުގެ ސިނަމާލެ ބްރިޖަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި ހިންގި 200 މިލިއަން ޑޮލަރުގެ ޕްރޮޖެކްޓެކެވެ. އެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ އެވެ. އަދި 72 މިލިއަން ޑޮލަރަކީ ޗައިނާގެ ލޯނު އެހީ އެވެ. ދިވެހި ސަރުކާރުން 12 މިލިއަން ޑޮލަރު ހޭދަކޮށްފައިވެ އެވެ.
