ބޮޑުތަކުރުފާނު މަގުގައި އިންދާފައި ހުރި ކަދުރު ރުއްތަކުގައި ދަމާފައި ހުރި ރިޔާސީ އިންތިހާބުގައި ވާދަ ކުރައްވާ ކެންޑިޑޭޓުންގެ ކެމްޕޭނު ބެނާތައް ސިޓީ ކައުންސިލުން ނަގައިފި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ވާދަ ކުރައްވާ މާލޭ ސިޓީގެ މޭޔަރު އަދި ޕީއެންސީގެ ކެންޑިޑޭޓު ޑރ. މުހައްމަދު މުއިއްޒުގެ ބެނާތައް ރުއްތަކުގައި ހަރުކޮށްފައެއް ނެތެވެ. އެ ރުއްތަކުގައި އެންމެ ފުރަތަމަ ހަރުކޮށްފައި ހުރީ އެމްޑީޕީގެ ބެނާއެވެ. އެއަށް ފަހު އެހެން ބައެއް ކެންޑިޑޭޓުންގެ ބެނާ ވެސް ދެމި އެވެ.
ރުއްތަކަށް ގެއްލުންވާ ކަމަށް ބުނެ ބެނާތައް ނެގުމަށް މި މަހުގެ 24 ވަނަ ދުވަހު ސިޓީ ކައުންސިލުން އިއުލާނު ކުރި އެވެ. އެހެންވެ، އެ ފޮތިތައް ނެގުމަށް މިރޭ ސިޓީ ކައުންސިލުގެ މުވައްޒަފުން ހަރަކާތްތެރި ވަމުންނެވެ.
"ކަދުރު ރުއްތަކަށް ވާންކޮށްފައި އެއްވެސް ބެނާއެއް ހަރު ނުކުރުމަށްވެސް އެ އިޢުލާނުގައި ވާނީ ދަންނަވާފައެވެ. އެހެންކަމުން މި ބެނާތައް މާލެސިޓީ ކައުންސިލްގެ ޓީމުން ވަނީ ނަގާފަ އެވެ," ސިޓީ ކައުންސިލްގެ ޓްވީޓުގައިވެ އެވެ.
ކެމްޕޭން ބެނާ އަދި ދިދަ ދެމުމަށް ނަގަން ޖެހޭ ހުއްދަ ނެގުމަށް ސިޓީ ކައުންސިލުން އެދިފައި ވެއެވެ. އެ ކައުންސިލުން ބުނީ ބެނާ އަދި ދިދަ ދެމުމުގެ ހުއްދަ ދެވޭނީ ހޮޅިދަނޑިތަކުގައި އެކަނި ކަމަށެވެ. ބައެއް ކެންޑިޑޭޓުންގެ ދިދަފަތި މަޖީދީ މަގުގައި ދެމުމަށް ޕޭވްމެންޓު މައްޗަށް ވަނީ ދަގަނޑު ހޮޅި ޖަހައިފަ އެވެ
