ހިންދޫ ދީނުގެ ފާދިރީއަކު މާލޭގައި "ސްޕިރިޗުއަލް ހީލިން" ކްލާސްތަކެއް ބާއްވަން އިސްތިހާރު ކޮށް އެފަދަ ކްލާސްތަކެއް ހިންގަން އުޅުމުން އޭނާ ހައްޔަރުކޮށްފި އެވެ.
ޑރ. ގަނޭޝް ޑުބޭ ނަމަކަށް ކިޔާ ހިންދޫ ފާދިރީއަކު މި މަހުގެ 29 އިން ފެށިގެން އަންނަ މަހުގެ 3 ވަނަ ދުވަހުގެ ނިޔަލަށް މާލޭގައި އެ ދީނާ ގުޅޭ ކްލާސްތަކެއް ބާއްވަން ހަދާފައިވާ އިސްތިހާރު ޕޯސްޓަރުތަކެއް މިއަދު ސޯޝަލް މީޑިއާގައި ދައުރުވާން ފެށުމުން ގިނަ ބަޔަކު ކަންބޮޑުވުން ފާޅުކުރި އެވެ.
އޭނާ މިހާރު ފުލުހުންގެ ބެލުމުގެ ދަށަށް ގެނެސްފައިވާ ކަމަށް ފުލުހުން ވަނީ މައުލޫމާތު ދީފަ އެވެ. އަދި, މިއީ ރާއްޖޭގެ ދީނީ އެއްބައިވަންތަކަމުގެ ގާނޫނާ ހިލާފު ކަމަކަށްވާތީ ކަމާ ގުޅުން ހުރި އިދާރާތަކާ ގުޅިގެން އަޅަން ޖެހޭ ފިޔަވަޅުތައް އަޅަމުންދާނެ ކަމަށް ވެސް ފުލުހުން ބުންޏެވެ. އެ މައްސަލާގައި ހިމެނޭ އިތުރު މީހަކު ވެސް ވަނީ ހައްޔަރުކޮށްފަ އެވެ.
އެކަމާ ގުޅިގެން މިއަދު އިސްލާމިކް މިނިސްޓަރު އަހުމަދު ޒާހިރު ކުރެއްވި ޓްވީޓެއްގައި ވިދާޅުވީ، މާލޭގެ ހޮޓަލެއްގައި "ސްޕިރިޗުއަލް ހީލާއެއް"ގެ ނަމުގައި ދީނީ އެއްބައިވަންތަކަން ހިމާޔަތް ކުރުމުގެ ގާނޫނާ ހިލާފު އަމަލުތަކެއް ހިންގަން އިސްތިހާރު ކުރާ ކަމުގެ މައުލޫމާތު ލިބިގެން އެ މައްސަލަ ބަލައި ފިޔަވަޅު އެޅުމަށް ފުލުހުންނަށް ހުށަހަޅާފައިވާ ކަމަށެވެ.
ސޯޝަލް މީޑިއާގައި ދައުރުވަމުންދާ ޕޯސްޓުގައިވާ ގޮތުން ގަނޭޝް އޭނާގެ ކްލާސްތައް އިސްތިހާރުކޮށްފައި ވަނީ މީހަކަށް 100 ޑޮލަރަށެވެ. އަދި އެ ކްލާސްތަކުން ހިންދޫ ސްޕިރިޗުއަލް ހީލިން މެދުވެރިކޮށް ދިރިއުޅުމުގެ އެކި މައްސަލަތައް ހައްލުކޮށްދޭނެ ކަމަށް އެ ޕޯސްޓުތަކުގައިވެ އެވެ.
އެ އިސްތިހާރުގައިވާ ގޮތުން އެ ކްލާސްތައް ބާއްވަން ހަމެޖެހިފައި ވަނީ އުނިމާ ގްރޭންޑް ހޮޓަލުގަ އެވެ. އެހެންނަމަވެސް، މި ނޫހުން އުނިމާ ގްރޭންޑަށް ގުޅުމުން އެ ހޮޓަލުން ބުނީ އެފަދަ އިވެންޓެއް ނުބާއްވާ ކަމަށެވެ.
އުނިމާއިން އެކަމާ ގުޅިގެން ނެރުނު ނޫސްބަޔާނެއްގައި ވަނީ އެ މީހުން ކޮށްފައިވާ ޕޯސްޓުތަކަކީ އެ ހޮޓަލަށް އެނގިގެން ކޮށްފައިވާ ޕޯސްޓުތަކެއް ނޫން ކަމަށެވެ. އަދި އެ ހޮޓަލްއަށް ޗެކިއިންވި އިންޑިއާގެ ދެ މީހަކު އެ އެ ހޮޓަލުގެ އުސޫލުތަކާ ހިލާފުވުމުން ޗެކްއައުޓް ކޮށްފައިވާ ކަމަށް ވެސް ބުނެފައިވެ އެވެ.
