ސިފައިން ފޮނުވައިގެން ގދ. ތިނަދޫއަށް އަރައި ރަށުން މީހުން ބޭރުކޮށް ރަށް ފަޅުކޮށްލި މައްސަލައިގައި ސަރުކާރުގެ ނަމުގައި ރައީސް އިބްރާހިމް މުހައްމަދު ސޯލިހު އެ ރަށު ރައްޔިތުންގެ ކިބައިން މައާފަށް މިރޭ އެދިވަޑައިގަނެފި އެވެ.
ރިޔާސީ އިންތިހާބުގެ ކެމްޕެއިނަށް ތިނަދޫއަށް ވަޑައިގެން ވާހަކަ ދައްކަވަމުން ރައީސް ވިދާޅުވީ ރަށް ފަޅުކޮށްލުމުގެ ކުރިން ތިނަދޫއަކީ މުއްސަނދި، ވިޔަފާރީގެ ގޮތުން ކުރިއަރާފައިވާ ތަރައްގީ ރަށެއް ކަމަށެވެ. އަދި ވިދާޅުވީ އެއިރު ރައީސް އިބްރާހިމް ނާސިރުގެ ސަރުކާރުން އަމަލު ކުރީ "އެއްވެސް ރައްޔިތަކާ ދޭތެރޭގައި އަމަލު ކުރަންވާނެ ގޮތަކަށް ނޫން" ކަމަށެވެ.
"1960 ގެ ތެރޭގައި ތިނަދޫ ފަޅުވެގެންދިޔަ ހިތާމަވެރި ހާދިސާއެއް. އަޅުގަނޑު ދަންނަވާނީ އެއްވެސް ސަރުކާރަކުން ރައްޔިތަކާ ދޭތެރޭގައި އަމަލު ކުރަންވާނެ ގޮތަކެއް ނޫނޭ އެއިރުގެ ސަރުކާރުން ކަންކޮށްފައި އޮތީ. އެއީ މިއަދު ވެސް އެކަމާ ދޭތެރޭގައި މައާފަށް އެދެންޖެހޭ ކަމެއް،" އެމަނިކުފާނު ވިދާޅުވި އެވެ. "ސަރުކާރުގެ ވެރިއެއްގެ ހައިސިއްޔަތުން އަޅުގަނޑު އެކަމާ މައާފަށް އެދެން."
އޭގެ އިތުރުން މިރޭގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ އެމަނިކުފާނު "ހުވަދު އަތޮޅަށާއި ތިނަދޫއަށް ގެންނަން މި އުޅެނީ ހެޔޮ ބަދަލެއް، ބޮޑު ބަދަލެއް" ކަމަށެވެ. އަދި "ސިނާއީ ގޮތުން ބޮޑު ބަދަލެއް މި ސިޓީއަށް ގެންނަން އަޅުގަނޑުމެން ބޭނުން" ކަމަށް ވެސް ރައީސް ވިދާޅުވި އެވެ.
"އިރާދަކުރެއްވިއްޔާ އަހަރެއް، ދޮޅު އަހަރެއްގެ ތެރޭގައި މި ސިނާއަތަށް [މަސްވެރިކަމަށް] މިއިން ދުވަހު ނާންނަވަރުގެ ބޮޑު ބަދަލެއް ތިޔަ ބޭފުޅުންނަށް ފެނިގެންދާނެ،" ރައީސް ވިދާޅުވި އެވެ.
ރައީސް މިއަދު ތިނަދޫއަށް ވަޑައިގެންނެވީ އެ ރަށަށް ސިޓީއެއްގެ ދަރަޖަ ދިނުމުގެ ގަރާރެއްގައި ސޮއި ކުރެއްވުމަށްފަހެވެ. އެއީ އެމްޑީޕީގެ ރިޔާސީ ޕްރައިމަރީގައި މިދިޔަ ޖެނުއަރީ މަހު އެމަނިކުފާނު ވެވަޑައިގެންނެވި ވައުދެކެވެ.
މީގެ ކުރިން އޯގަސްޓް، 2011، ގައި އެއިރުގެ ރައީސް މުހައްމަދު ނަޝީދު ވެސް ވަނީ ސަރުކާރުގެ ފަރާތުން ތިނަދޫގެ ރައްޔިތުންގެ ކިބައިން މައާފަށް އެދިވަޑައިގަނެފަ އެވެ.
ނާސިރުގެ ވެރިކަމުގައި 1962 ގައި ތިނަދޫ ފަޅުކޮށްލުމުން ހަތަރު އަަހަރު އެ ރަށް ފަޅަށް އޮތެވެ. އަލުން އެ ރަށުގަި މީހުން އާބާދުވީ 1966 ވަނަ އަހަރެވެ.
