ތަރައްގީ ގެނައުމުގައި އެ ރަށެއްގެ އާބާދީއަށް ބަލާފައި އެއްވެސް ރަށެއް ތަފާތު ނުކުރައްވާނެ ކަމަށް އިދިކޮޅު ޕީޕީއެމް/ޕީއެންސީގެ ކެންޑިޑޭޓު ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރިޔާސީ އިންތިހާބުގެ ކެމްޕެއިނަށް ބ. މާޅޮހަށް ވަޑައިގެން އެ ރަށުގައި ވާހަކަ ދައްކަވަމުން މުއިއްޒު ވިދާޅުވީ، ހުރިހާ ރަށަކަށް ވެސް އަސާސީ ހައްގުތަކާއި ތަރައްގީ ބޭނުންވާ ކަމަށާއި އެއީ އާބާދީއަށް ބަލާފައި ކުރަންޖެހޭ ކަމެއް ނޫން ކަމަށެވެ.
"އަޅުގަނޑަށް މި ފާހަގަވަނީ ވަރަށް ބޮޑަށް މި ރަށް ބާކީވެފައި އޮތް ތަން. އަޅުގަނޑު ދަންނަވާލަން ބޭނުންވަނީ އަޅުގަނޑުމެންގެ ސިޔާސަތުގައި އެއްގޮތަކަށް ވެސް ތަފާތެއް ނުކުރާނެ ކަމަށް. އާބާދީގެ ގޮތަކުން ނުވާނެ ތަފާތެއް،" މުއިއްޒު ވިދާޅުވި އެވެ.
ތަރައްގީ ގެންނައިރު އާބާދީ ބޮޑެތި ރަށްތައް ތަފާތު ނުކުރައްވާނެ ކަމަށް މުއިއްޒު ވިދާޅުވިއިރު އޭނާ މީގެ ކުރިން ބުނެފައި ވަނީ ތަރައްގީ ގެންނައިރު އަތޮޅުތަކުގެ ވެރިކަން ކުރާ ރަށްތަކާއި އާބާދީ ބޮޑެތި ރަށްތަކަށް އިސްކަންދެއްވާނެ ކަމަށެވެ.
"ހުރިހާ ރައްޔިތުންނަކީ ހަމަހަމަ ބައެއްކަން ގާނޫނުއަސާސީ ކަށަވަރުކޮށްދޭ. އޭގެ އިތުރަށް ގިނަ ރައްޔިތުން ތިބި ތަނަކަށް އިސްކަންދިނުން. އެންމެ ގިނަ މީހުން ތިބި ތަނަކަށް ކޮށްދޭން ޖެހޭ ކަންތައްތަކަށް ދިނުން. މިކަމަކީ ކޮންމެހެން ކޮށްދޭން ޖެހޭނެ ކަމެއް. އަދުލުވެރިވުމަކީ ނިސްބަތުން ކުރެވޭ ކަމެއް،" މުއިއްޒު ވިދާޅުވެފައިވެ އެވެ.
އަންނަ ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ޑރ. މުއިއްޒުގެ އިތުރުން ވާދަ ކުރައްވަނީ މިހާރުގެ ރައީސް އަދި އެމްޑީޕީގެ ކެންޑިޑޭޓް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ގާސިމް އިބްރާހިމާއި ޑިމޮކްރެޓްސްގެ އިލްޔާސް ލަބީބާއި އެމްއެންޕީގެ މުހައްމަދު ނާޒިމެވެ.
އޭގެ އިތުރުން އަމިއްލަ ގޮތުން ތިން ކެންޑިޑޭޓުން ވާދަ ކުރައްވަ އެވެ. އެއީ ކުރީގެ ހޯމް މިނިސްޓަރު އުމަރު ނަސީރާއި ކުރީގެ ރައީސް މައުމޫން އަބްދުލްގައްޔޫމްގެ ދަރިކަލުން ފާރިސް މައުމޫން އާއި ހަސަން ޒަމީލެވެ. ޒަމީލަކީ ޑިފެންސް މިނިސްޓްރީގެ ޑެޕިއުޓީއަކަށް ހުންނެވި ބޭފުޅެކެވެ.
