ސެޕްޓެމްބަރު 9، ގައި ބާއްވާ ރިޔާސީ އިންތިހާބުގައި ކުދި ޕާޓީތަކުގެ ތާއީދު ހޯއްދަވަން ކުރައްވާ މަޝްވަރާތައް އަދިވެސް ކުރިއަށް އެބަދާ ކަމަށް ރައީސް އިބްރާހީމް މުހައްމަދު ސޯލިހު މިރޭ ވިދާޅުވެއްޖެ އެވެ.
އެމްޑީޕީގެ ރިޔާސީ ކެންޑިޑޭޓްގެ ހައިސިއްޔަތުން ތ. އަތޮޅަށާއި ލ.އަތޮޅަށް ކުރެއްވި ދަތުރުފުޅު ނިންމަވައިލެއްވުމަށް ފަހު ނޫސްވެރިންގެ ސުވާލުތަކަށް ޖަވާބުދެއްވަމުން ރައީސް ވިދާޅުވީ ރިޔާސީ އިންތިހާބުގައި ވާދަކުރާ ޕާޓީތަކާ އެކު އެކި ފެންވަރުގައި މަޝްވަރާތައް ކުރިއަށް އެބަދާ ކަަމަށެވެ. އެޕާޓީތަކަށް ރިޔާސީ އިންތިހާބުގެ ފުރަތަމަ ބުރުގައި އުއްމީދެއް ނެތްކަން ކެންޑިޑޭޓުންނަށް މިހާރު ގަބޫލުކުރެއްވޭނެ ކަމަށް ދެކެވަޑައިގަންނަވާ ކަމަށް ވެސް އެމަނިކުފާނު ވިދާޅުވި އެވެ.
"[ޕީޕީއެމް/ޕީއެންސީ ފިޔަވައި] ދެން ހުރި ޕާޓީތަކުގެ އެކި ލެވެލްގައި އަަޅުގަނޑުމެންނަށް ވާހަކަ އެބަ ދެކެވޭ. އަޅުގަނޑު ހިތުން މިހާރު އޭގެ ތެރެއިން ބައެއް ބޭފުޅުންނަށް ގަބޫލުފުޅުކުރެއްވޭނެ އެބޭފުޅުންނަށް ފުރަތަމަ ބުރުގައި އުއްމީދެއް ނެތްކަން،" ރައީސް ވިދާޅުވި އެވެ.
ކެމްޕެއިން ގާތްގަނޑަކަށް ނިމުމަކަށް ދާ އިރު، ރަށްރަށުގައި ވޯޓު ބެހިފައި ހުރި ގޮތް ވެސް އެ ޕާޓީތަކުގެ ކެންޑިޑޭޓުންނަށް ސާފުވާނެ ކަމަށް އެމަނިކުފާނު ވިދާޅުވި އެވެ. މިމޭރުމުން ވާހަކަފުޅު ދެއްކެވި އިރު، މަޝްވަރާކުރިއަށް ގެންދަވަނީ ސީދާ ކޮންކޮން ޕާޓީތަކަކާ ކަމެއް އެމަނިކުފާނު ވިދާޅެއް ނުވެ އެވެ.
ރިޔާސީ އިންތިހާބުގައި އެމްޑީޕީއާ ވާދަވެރި ޕީޕީއެމް/ޕީއެންސީގެ އިތުރުން ދެން ވާދަކުރަނީ ޖުމްހޫރީ ޕާޓީއާއި އެމްއެންޕީ އަދި ދަ ޑިމޮކްރެޓްސް އެވެ.
ރައީސް ވިދާޅުވީ ރައްޔިތުންނަށް ކުރިއެރުމެއް ބޭނުންވެވަޑައިގަންނަވާ ބޭފުޅުން، އެ ޕާޓީތަކުގެ ކެންޑިޑޭޓުންގެ ތެރޭގައި ތިއްބެވި ނަމަ އަދިވެސް މިއީ ނިންމުމެއް ނިންމެވިދާނެ ކަމަށެވެ.
"އަޅުގަނޑު ހިތުން އެ ބޭފުޅުން އެއާ ދޭތެރޭގައި ވިސްނާވަޑައިގަންނަވާނެ،" އެމަނިކުފާނު ވިދާޅުވި އެވެ.
މިފަހަރުގެ ރިޔާސީ އިންތިހާބުގައި ރައީސް ސޯލިހުގެ އިތުރުން ވާދަކުރައްވަނީ ޕީއެންސީގެ ކެންޑިޑޭޓް ޑރ.މުހައްމަދު މުއިއްޒު، ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމް، އެމްއެންޕީގެ ކެންޑިޑޭޓް މުހައްމަދު ނާޒިމް، ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބް އަދި އަމިއްލަ ގޮތުން ވާދަކުރައްވާ ދެ ބޭފުޅެކެވެ. އަމިއްލަ ގޮތުން ވާދަކުރައްވަނީ ކުރީގެ ހޯމް މިނިސްޓަރު އުމަރު ނަސީރާއި ހަސަަން ޒަމީލް ނަމަކަށް ކިޔާ ބޭފުޅެކެވެ.
