އެއްގަމު އުޅަނދުގައި ޑޮމެއިން ބޭނުންކުރުމުގެ ގަވާއިދާ ހިލާފަށް ޑޮމެއިންތައް ދޫކުރަމުންދާ ކަން ފާހަގަކުރިގެން ކަމަށް ބުނެ ޓްރާންސްޕޯޓް މިނިސްޓްރީން ޑޮމެއިން ވިއްކުން ހުއްޓާލަން ރައީސް އޮފީހުން އަންގައިފި އެވެ.
ޑޮމެއިން ވިއްކުން ހުއްޓާލަން ރައީސް އޮފީހުން ޓްރާންސްޕޯޓަށް އެންގީ އާދިއްތަ ދުވަހެވެ.
އެގޮތުން ޓްރާންސްޕޯޓް މިނިސްޓަރު އައިޝަތު ނަހުލާއަށް އެޑްރެސްކުރައްވާ، ރައީސް އޮފީހުގެ ޗީފް އޮފް ސްޓާފް އަލީ ޒާހިރު ފޮނުއްވި ސިޓީއެއްގައި ވަނީ އެ އޮފީހުން ވަކި ގޮތެއް އަންގަން ދެން ޑޮމެއިންއާ ގުޅޭ އެއްވެސް މުއާމަލާތެއް ނުކުރަމަށް ވަނީ އަންގާފަ އެވެ.
ރައީސް އޮފީހުން ފޮނުވި ސިޓީގައި ފާހަގަކޮށްފައިވާ މައްސަލަތަކުގެ ތެރޭގައި ޑޮމެއިން ގަވާއިދުގައިވާ ފަދައިން ޑޮމެއިން ވިއްކުމާ ގުޅޭ މައްސަލަ ހައްލުކުރުމަށް ކޮމިޓީއެއް އެކުލަވާލާފައި ނެތުމާއި، އާންމުކޮށް އިއުލާން ކުރުމެއް ނެތި ޑޮމެއިން ވިއްކުން ހިމެނެ އެވެ.
"[ޑޮމެއިން] ގަވާއިދުގައި ބަޔާންކުރާ ކޮމިޓީ ތިޔަ މިނިސްޓްރީން އެކުލަވާލާފައިވާ ކަމަށް ނުފެންނާތީ އާއި ޑޮމެއިން ވިއްކައިގެން ދައުލަތަށް ލިބެންޖެހޭ މަންފާ ނުލިބޭ ފަދައަކުން، ހަވާލާދެވުނު ގަވާއިދުގެ އިސްވެ ބަޔާންކުރެވުނު މާއްދާތަކާ ހިލާފަށް ޑޮމެއިން ވިއްކުމުގެ ކަންކަން ގެންދަވާކަން މި އޮފީހަށް ވަނީ ފާހަގަކުރެވިފަ،" ސިޓީގައި ބަޔާންކޮށްފައި ވެ އެވެ.
އޭގެ އިތުރުން ރައީސް އޮފީހުން ވަނީ މި ދައުރުގެ ތެރޭގައި ހިދުމަތް ޑޮމެއިން ތަކާ ގުޅޭ ތަފުސީލާއި، ޑޮމެއިން ވިއްކުމުގައި މިނިސްޓްރީން އަމަލުކުރަމުން ގެންދާ އުސޫލާއި ގަވާއިދާ އެއްގޮތަށް ޑޮމެއިން ވިއްކުމުގެ ކަންކަން ނުހިންގިވާ ސަބަބެއް އެ އޮފީހާ ހިއްސާކުރަން ވެސް އަންގާފަ އެވެ.
ޑޮމެއިން ވިއްކުން ހުއްޓާލަން ޓްރާންސްޕޯޓަށް އަންގާފައި މިވަނީ އެ މިނިސްޓްރީގެ ތެރެއިން ނުގަވައިދުން މިކަން ހިނގަމުންދާ ކަމުގެ އަޑުތައް ފެތުރުނުތާ އެތައް ދުވަހެއް ފަހުންނެވެ.
