ލ. އަތޮޅުގެ ދެކުނު ބިތުގައި އެއާޕޯޓެއް ތަރައްގީކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ވައުދުވެވަޑައިގެންފި އެވެ.
ލ. ކުނަހަންދޫގައި ވާހަކަ ދައްކަވަމުން ރައީސް ވިދާޅުވީ ލ. އަތޮޅުގެ ދެކުނު ބިތުގައި އެއާޕޯޓެއް އެޅުމަށް އެ ސަރަހައްދުގެ ރަށްތަކުގެ ރައްޔިތުން ވަރަށް ބޮޑަށް އެދޭ ކަމަށާއި އެހެންކަމުން ދެން އަންނަ ދައުރެއްގައި ހިތަދޫ ފަޅު ހިއްކައިގެން އެ ހިސާބުގެ ރައްޔިތުންނަށް އެއާޕޯޓެއް އަޅައިދެއްވާނެ ކަމަށެވެ.
ލ. ހިތަދޫ، މީދޫ އަދި ކުނަހަންދޫ ވެސް އޮންނަނީ އެއް ފަޅެއްގަ އެވެ. އެއީ އެ އަތޮޅުގެ އެންމެ ދެކުނުން އޮންނަ ތިން ރަށެވެ.
"މިދާއިރާގެ ހުރިހާ ރަށަކުންވެސް އެންމެ ބޮޑަށް ބޭނުންވާ އެއް ކަމަކީ ވައިގެ މަގުން މިހިސާބަށް ދަތުރުކުރެވޭނެ ފަސޭހަ ލުއިގޮތެއް ހަދައި ދިނުން. އިރާދަކުރެއްވިއްޔާ މި ފަޅުތެރޭގައި އެއާޕޯޓެއް ކުރިއަށް އޮތް ދައުރުގެ ތެރޭގައި އަޅުގަނޑުމެން އަޅައިދޭނަން،" ރައީސް ވިދާޅުވި އެވެ.
ހިތަދޫ ރައްޔިތުންނާ ބައްދަލުކުރައްވައި ވާހަކަ ދައްކަވަމުން ރައީސް ވިދާޅުވީ ސަރުކާރުގެ އަމާޒަކީ މި އަހަރު ނިމުމުގެ ކުރިން ލ. އަތޮޅަށް އާރްޓީއެލް ފެރީގެ ހިދުމަތް ތައާރަފްކުރުން ކަމަށެވެ. އަދި ކުރިއަށް އޮތް ދައުރުގައި އެ ރަށުގެ ބޮޑެތި މަގުތަކުގައި ތާރު އެޅުމާއި ސިއްހީމަރުކަޒު ތަރައްގީ ކުރުމާއި އެރަށުގެ ފުޓްބޯޅަ ދަނޑުގައި ޓާފް އެޅުމާއި ޒަމާނީ ފެންވަރުގެ ވޮލީ ކޯޓެއް އެޅުމަށް ވެސް ރައީސް ވައުދުވެވަޑައިގެންނެވި އެވެ.
އޭގެ އިތުރުން، ކުނަހަންދޫގައި ބޭއްވި ޖަލްސާގައި ރައީސް ވަނީ ކުރިއަށް އޮތް ދައުރުގައި އެރަށުގައި ކުރިއަށްގެންދަން ރަވާފައިވާ މަޝްރޫއުތަކަށް އަލި އަޅުއްވާފަ އެވެ.
އެގޮތުން ހިތަދޫ އާއި ކުނަހަންދޫ ގުޅާލަން އަޅާ ކޯޒްވޭގެ މަސައްކަތް ފެށުމަށް އެމްޓީސީސީން ތައްޔާރުވަމުން އަންނަ ކަމަށާއި އެ މަސައްކަތް ވެސް އަންނަ ދައުރުގައި ނިމޭނެ ކަމަށް ރައީސް ވިދާޅުވި އެވެ.
ކުނަހަންދޫ ބަނދަރު އަޕްގްރޭޑް ކުރުމާއި އެ ރަށު ސިއްހީ މަރުކަޒަށް އެކްސްޓެންޝަން އިމާރާތަކާއި ލެބޯޓްރީއެއް ގާއިމުކޮށްދެއްވަންވެސް އެމަނިކުފާނު ވަނީ މިއަދު ވައުދުވެވަޑައިގެންފަ އެެވެ. އަދި ކުނަހަންދޫ ޒުވާނުން ބޭނުންވާ ގޮތަށް އެރަށުގައި ޓާފް ފުޓުބޯޅަ ދަނޑަކާއި ޒަމާނީ ވޮލީ ކޯޓެއް އަޅުއްވާނެ ކަމަށް ވެސް ވިދާޅުވި އެވެ.
