ވާރޭވެހި ފެންބޮޑުވާ ރަށްރަށަށް އެހީތެރިވުމުގެ ގޮތުން ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ފަސް ރަށަކަށް ޑީވޯޓަރިން ޕަމްޕު ފޯރުކޮށްދީފި އެވެ.
އެ އޮތޯރިޓީ އިން އެކުލަވާލާފައިވާ ޑީވޯޓަރިން ޕަމްޕު ފޯރުކޮށް ދިނުމުގެ ޕްރޮޖެކްޓްގެ ދަށުން ފެންހިއްކާ ޕަންޕާއި އަޔަށް ބޭނުންވާ ސާމާނު ހަވާލުކޮށްފައިވަނީ ބ. މާޅޮސް، ބ. ކެންދޫ، ބ. ތުޅާދޫ، ޅ. ނައިފަރު އަދި ޅ. ހިންނަވަރު ކައުންސިލާ އެވެ.
އެންޑީއެމްއޭއިން ބުނީ ޕަމްޕުތައް ހަވާލުކުރުމަށް އެ އޮތޯރިޓީއާއި މިނިސްޓްރީ އޮފް ޑިފެންންސް އަދި އެމްއެންޑީއެފުން ރަށްތަކަށް ޒިޔާރާތްކުރީ އޮގަސްޓް 27، 28 އަދި މިއަދު ކަމަށެވެ.
އެ ފަސް ރަށުގެ ކައުންސިލުތަކާއި ތަކެތި ހަވާލުކޮށްދިނީ މިނިސްޓްރީ އޮފް ޑިފެންސްގެ ނައިބު ހުސެން ޒާހިރު އެވެ. މި ދަތުރުގައި އެންޑީއެމްއޭގެ ޗީފް އެގްޒެކެޓިވް ހިސާން ހަސަން އަދި ވައިސް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުލް ރަހީމް އަބްދުލް ލަތީފް ވަނީ ބައިވެރިވެވަޑައިގަނެފަ އެވެ.
އެންޑީއެމްއޭއިން ވަނީ ފެންބޮޑުވުމުގެ ހާދިސާތައް ތަކުރާރުކޮށް ދިމާވާ ރަށްތަކުގެ ތެރެއިން ސަލާމަތީ ވަސީލަތެއް ނެތް 18 ރަށެއް އެކަށައަޅައި، ބޭނުންވާ ވަސީލަތްތައް ފޯރުކޮށްދިނުމުގެ ދިނުމުގެ ޕްރޮޖެކްޓެއް އެކުލަވާލާފަ އެވެ. އެގޮތުން މިހާތަނަށް މި ޕްރޮޖެކްޓަށް ދައުލަތުން 1.4 މިލިއަން ރުފިޔާ ހޭދަކޮށްފައިވާ ކަމަށް އެ އޮތޯރިޓީން މައުލޫމާތު ދެއެވެ.
އެ ޕްރޮޖެކްޓްގެ ދަށުން ޑީވޯޓަރިން ޕަމްޕު ފޯރުކޮށްދިނުމަށް ކަނޑައަޅިފައިވާ ބާކީ 13 ރަށަށް ބޭނުންވާ ވަސީލަތްތައް ވީ އެންމެ އަވަހަކަށް އެރަށްތަކަށް ފޯރުކޮށްދިނުމުގެ މަސައްކަތްވެސް އެ އޮތޯރިޓީއިން ކުރަމުން އަންނަކަމަށް އެންޑީއެމްއޭއިން ބުނެ އެވެ.
