ރައްޔިތުންގެ މަޖިލީހުގެ މިއަދުގެ ޖަލްސާ ފަށާ ގަޑި ޖެހުނު އިރު ވަޑައިގެން ތިއްބެވީ އެންމެ 10 މެމްބަރުން ކަމަށް ވާތީ، ޖަލްސާ ނުފެށި، ކޯރަމް ހަމަވޭތޯ ބަލަން މަޑުކޮށްފި އެވެ.
މަޖިލީހުގައި ޖުމްލަ 87 މެމްބަރުން ތިއްބަވާ އިރު ޖަލްސާއެއްގެ ކޯރަމް ހަމަވަނީ 22 މެމްބަރުން ވަޑައިގެންނެވުމުންނެވެ. މިއަދުގެ ޖަލްސާ ފަށާ ގަޑި ޖެހުނު އިރު ތިއްބެވީ އެންމެ 10 މެމްބަރުން ކަމަށް ވާތީ ރިޔާސަތުން ވިލުފުށި ދާއިރާގެ މެމްބަރު ހަސަން އަފީފު ވިދާޅުވީ ކޯރަމް ހަމަވާ ވަރަށް މެމްބަރުން ވަޑައިގަންނަވާތޯ 9:30 ވަންދެން ބައްލަވާނެ ކަމަށެވެ.
ވެރިކަން ކުރާ ކޯލިޝަނުގެ މައިޕާޓީ އެމްޑީޕީގެ މެޖޯރިޓީ އޮންނަ މަޖިލީހުގެ މަސައްކަތްތައް މިއަހަރުގެ ދެވަނަ ދައުރާ ހިސާބުން އޮތީ ގާތްގަނޑަކަށް ހުއްޓިފަ އެވެ. މަޖިލިސް ހުއްޓުމަކަށް އައީ މަޖިލީހުގެ ރަައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައެއް މަޖިލީހަށް ހުށަހެޅި ހިސާބުން އުފެދުނު ހައިޖާނެއްގަ އެވެ.
އާ ޕާޓީ ހެދުމުގެ މަސައްކަތް ފެށުމާއި އެކު، އެކަމުގައި އިސްކޮށް އުޅުއްވި މެމްބަރުން މަޖިލީހުގައި ސަރުކާރަށް ފާޑުވިދާޅުވާން ފެށުމާއި ރިޔާސަތުން ރައީސް މުހައްމަދު ނަޝީދު އަމަލުކުރައްވާ ގޮތާ މެދު އެމްޑީޕީން ހިތްހަމަ ނުޖެހި، އެމަނިކުފާނުގެ އިތުބާރު ނެތްކަމުގެ މައްސަލައެއް ހުށަހެޅި އެވެ. މަޖިލީހުގެ ނައިބުރައީސް އީވާ އަބްދުﷲގެ އިތުބާރު ނެތް ކަމުގެ މައްސަލަ ވެސް އެމްޑީޕީން ހުށަހެޅި އެވެ.
އެމައްސަލަތައް ވެއްދުމުން ނަޝީދާއި އީވާ މަޖިލީހުގެ ރިޔާސަތު ނުބަލަހައްޓަވަން ފެށްޓެވުމާ އެކު މަޖިލީހުގައި އޮތީ މަރުތަޅެއް އެޅިފަ އެވެ.
އެމްޑީޕީން މެމްބަރުންތަކެއް ވަކިވުމުން، މަޖިލީހުގެ ދާއިމީ ކޮމިޓީތަކުގެ އެކުލެވުމަށް ބަދަލު ގެންނަން އެޕާޓީން ވަނީ ހުށަހަޅައިފަ އެވެ. މިއަދު ބާއްވަން އުޅުނު ޖަލްސާއަށް ވެސް އެޖެންޑާކޮށްފައި އޮތީ އެ މައްސަލަ އެވެ.
